Zek 13 - Ndebele Bible (iBhayibhili Elingcwele) 1978

1Ngalolosuku umthombo uzavulelwa indlu kaDavida labakhileyo eJerusalema ukuba bahlanjululwe ezonweni lasek ungcoleni.

2Kuzakuthi ngalolosuku, kutsho iNkosi yamabandla, ngiqede amabizo ezithombe elizweni, zingabe zisakhunjulwa futhi; ngizaqeda labaprofethi lomoya ongcolileyo.

3Uba kuvela futhi umuntu ongumprofethi, uyise lonina abamzalayo bazakuthi kuye: Kawuyikuphila, ngoba ukhuluma amanga ebizweni leNkosi. Uyise lonina abamzalayo bamgwaze esaprofetha.

4Ngalolosuku bonke abaprofethi bazakuba lenhloni ngemibono yabo nxa beprofetha; kabayikugqoka izigqoko zoboya ukuba bakhohlise,

5kodwa omunye lomunye wabo uzakuthi: Kangisuye mprofethi mina, ngingumlimi womhlabathi; ngoba ilizwe laba yilifa lami kusukela ebutsheni bami.

6Uba sekuthiwa kuye: Ngawani lamanxeba asemzimbeni wakho na? uzakuthi: Ngamanxeba okutshaywa kwami endlini yabangane bami.

Umalusi wamanga uzabulawa

7Vuka, mkhonto, uvukele umalusi wami,

uvukele umuntu ongumngane wami,

kutsho iNkosi yamabandla.

Tshaya umalusi ukuba izimvu zichitheke;

ngizaphendulela isandla sami kwezincinyane.

8Kuzakuthi kulo lonke ilizwe kubulawe ebantwini ingxenye ezimbili kwezintathu,

kutsho iNkosi.

9Ngizakuyifaka emlilweni lingxenye yesithathu,

ngibancibilikise njengomuntu encibilikisa isiliva,

ngibahlole njengokuhlolwa kwegolide.

Bazabiza ibizo lami, ngibaphendule;

ngithi: Bangabantu bami;

labo bathi: INkosi inguNkulunkulu wethu.