Seb 19 - Ndebele Bible (iBhayibhili Elingcwele) 1978

UPawuli useEfesu

1Kwathi uApolo eseKorinte, uPawuli wafika eEfesu esedabule ilizwe elingasenhla, wafumana abafundi abathile khona,

2wathi kubo: Lamamukela yini uMoya oNgcwele mhla likholwayo na? Bathi: Atshi, kasizanga sizwe ukuthi kukhona uMoya oNgcwele.

3Wathi: Pho, labhaphathizwa ngobhaphathizo bani na? Bathi: Ngobhaphathizo lukaJohane.

4UPawuli wathi: UJohane wabhaphathiza ngobhaphathizo lokuphenduka, etshela abantu ukuba bakholwe kulowo owayezakuza emva kwakhe, okutsho uJesu.Mat 3:11; Mark 1:4, 7, 8; Luka 3:4, 16; Joha 1:26, 27

5Bathi ukuzwa lokho, babhaphathizwa ebizweni leNkosi uJesu.

6Wathi uPawuli esebekile izandla zakhe phezu kwabo, uMoya oNgcwele wehlela kubo; bakhuluma ngendimi, bazisela.

7Babengaba litshumi lambili bebonke.

8Wangena esinagogeni, wakhuluma ngesibindi inyanga ezintathu, etshumayela efundisa ngombuso kaNkulunkulu.

9Kodwa kwathi uba abanye besiba lukhuni bengakholwa, bekhuluma kubi ngaleyoNdlela phambi kwabantu, wasuka kubo waqegula abafundi wafundisa insuku ngensuku esikolweni sikaTiranu.

10Lokhu kwaqhubeka iminyaka emibili, baze balizwa ilizwi leNkosi bonke abakhileyo eAsiya, amaJuda lamaGriki.

11UNkulunkulu wenza imisebenzi yamandla engejwayelekanga ngezandla zikaPawuli,

12baze bathatha amadukwe lamalembu emzimbeni wakhe, bawesa kwabagulayo; izifo zasuka kubo, labomoya ababi baphuma.

13Kwathi abanye kubaJuda, abayizanuse ezizulayo, bathanda ukuphatha ibizo leNkosi uJesu kulabo abangenwe ngomoya ababi besithi: Ngiyakufungisa uJesu amtshumayelayo uPawuli.

14Kwakukhona amadodana ayisikhombisa ompristi omkhulu wabaJuda othiwa nguSikeva, ayekwenza lokho.

15Kodwa umoya omubi waphendula wathi: UJesu ngiyamazi, loPawuli ngiyamazi; kodwa lina lingobani?

16Lowomuntu owayelomoya omubi wabadumela, wabehlula bonke, wabanqoba, baze baphuma kuleyondlu, bagijima beze, belimele.

17Lokhu kwezwakala kubo bonke abakhileyo eEfesu, abaJuda kanye lamaGriki; ukwesaba kwabehlela bonke; kwadunyiswa ibizo leNkosi uJesu;

18labanengi abakholwayo beza bezivuma, beziveza obala izenzo zabo.

19Abanengi kubo ababesenza imilingo baletha incwadi zabo ndawonye, bazitshisa phambi kwabo bonke; babala imali yazo, bayifumanisa izinkulungwane ezingamatshumi amahlanu esiliva.

20Ngakho ilizwi leNkosi lakhula, lanqoba.

21Ngemva kwalezizinto uPawuli wazimisela emoyeni ukuya eJerusalema esedabule eMakedoniya leAkaya, wathi: Emva kokufika kwami khona ngimele ukubona iRoma layo.

22Esethumele eMakedoniya ababili kubasizi bakhe oTimothi loErastu, yena wahlala eAsiya isikhatshana.

Isiphithiphithi sikaDemetriyu

23Kodwa ngalesosikhathi kwasuka isiphithiphithi esikhulu mayelana laleyoNdlela.

24Ngoba umuntu othile othiwa nguDemetriyu, umkhandi wesiliva owenza amathempelana kaDiyana, wazuzisa abakhandi besiliva inzuzo enengi.

25Wasebaqoqa bona kanye labanye abasebenza umsebenzi onjalo, wathi: Madoda, liyazi ukuthi kulumsebenzi kuvela inotho yethu,

26njalo liyabona, liyazi futhi ukuba kakusikho lapha eEfesu kodwa kuphose ukuba kube kulo lonke elaseAsiya uPawuli lo ubaphambukisile abantu ngokubenza bakholwe ukuthi kayisibo onkulunkulu abenziwe ngezandla.

27Kayisikho lokhu kuphela okokuthi umsebenzi wethu lo usengozini, kodwa lethempeli likankulunkulukazi omkhulu uDiyana lalo lizakuthiwa liyinto engesilutho, lobukhulukazi bakhe buzakuphela yena elimkhonzayo lonke elaseAsiya lomhlaba wonke.

28Bathi bekuzwa lokhu, bathukuthela, bamemeza besithi: Mkhulu uDiyana wabaseEfesu!

29Umuzi wonke wagcwala isiphithiphithi, batheleka kanyekanye endaweni yokudlalela, babamba uGayu loAristako, abaseMakedoniya, ababehamba loPawuli.

30UPawuli wafuna ukungena phakathi kwexuku, kodwa abafundi kabamvumelanga.

31Lababusi baseAsiya abathile ababengabangane bakhe, bathumela kuye bemncenga ukuba angalingi ukungena endaweni yokudlalela.

32Kwathi abanye bamemeza okunye labanye okunye; ngoba ixuku lonke laliyaluzela nje, labanengi babengazi ukuthi babuthene lapho ngenxa yani.

33Abathile phakathi kwexuku bachasisela uAleksandro indaba, yena owayeqhutshelwe phambili ngabaJuda; uAleksandro waqhweba ngesandla efuna ukuchasisa ebantwini.

34Bathi ukuba bezwe ukuthi ungumJuda, bamemeza bonke ngalizwi linye isibanga esingaba ziawa ezimbili besithi: Mkhulu uDiyana wabaseEfesu!

35Kwathi umabhalane womuzi eselithulisile ixuku wathi: Madoda aseEfesu, kukhona yini phakathi kwabantu ongaziyo ukuthi umuzi waseEfesu ungumlondolozi wethempeli likaDiyana omkhulu lowesithombe esawa sivela ezulwini na?

36Njengokuba lezizinto zingephikwe, kufanele lithule, lingenzi lutho ngamawala.

37Ngoba lilethe lamadoda lapha angesibo abaphangi bamathempeli loba abahlambaza unkulunkulukazi wethu.

38Ngakho uba uDemetriyu kanye labakhandi belensolo ngomuntu, zikhona indawo zokuthethela amacala, bakhona lababusi, kabamangalelane.

39Kodwa uba lifuna ulutho oluphezu kwalokhu, kuzalungiswa emhlanganweni omisiweyo.

40Ngoba sisengozini yokumangalelwa ngomsindo walamhla ongelasisusa, esingazilandulela ngaso ngalesisiphithiphithi.

41Esetshilo lokho wawuchitha umhlangano.