1 Sam 30 - Ndebele Bible (iBhayibhili Elingcwele) 1978

UDavida uchitha amaAmaleki

1Ngosuku lwesithathu uDavida labantu bakhe bafika eZiklagi. AmaAmaleki ayehlasele iNegebi leZiklagi; alichitha iZiklagi, alitshisa ngomlilo,

2athumba abesifazana labo bonke ababephakathi kwalo, abakhulu labancinyane; kawabulalanga muntu, kodwa abathatha, ahamba.

3Lapho uDavida labantu bakhe befika emzini, bawufica usutshisiwe ngomlilo; omkabo, lamadodana abo lamadodakazi abo sebethunjiwe.

4UDavida labantu ababelaye badazuluka, bakhala baze behluleka ukukhala.

5OmkaDavida bobabili labo babethunjiwe, uAhinowama waseJezereli loAbigayili umkaNabali waseKarmeli.1 Sam 25:42, 43

6UDavida wahlupheka kakhulu; ngoba abantu bebekhuluma ngokumkhanda ngamatshe, ngoba inhliziyo zabo bonke zazidabukile ngenxa yamadodana lamadodakazi abo. Kodwa uDavida waziqinisa ngeNkosi uNkulunkulu wakhe.

7UDavida wasesithi kuAbiyatha umpristi indodana kaAhimeleki: Akungilethele ingubo yamahlombe. UAbiyatha waseyiletha ingubo yamahlombe kuDavida.1 Sam 22:20–23

8UDavida wasebuza eNkosini uNkulunkulu esithi: Ngixotshane lalo leloxuku na? Ngingalifica na? Yamphendula yathi: Xotshana lalo, ngoba uzalifica impela, ubakhulule bonke.

9Ngakhoke uDavida wasehamba, yena labantu abangamakhulu ayisithupha ababelaye, bafika esifuleni iBesori lapho abanye basala khona.

10Kodwa uDavida labantu abangamakhulu amane baqhubekela phambili; abangamakhulu amabili abasebekhathele kakhulu basala emuva, kabasiwelanga isifula iBesori.

11Bafica umGibithe emmangweni; bamletha kuDavida, bamnika ukudla, wadla, bamnathisa lamanzi.

12Bamnika lesinkwa somkhiwa lamahlukuzo amabili ezithelo zevini ezomisiweyo. Kwathi esedlile waqaqabuka, ngoba wayengadlanga lutho, enganathanga manzi insuku ezintathu lobusuku obuthathu.

13UDavida wambuza wathi: Ungokabani na? Uvela ngaphi na? Yena wathi: Ngiyinsizwa yaseGibithe, inceku yomAmaleki; inkosi yami ingitshiyile ngoba sengilensuku ezintathu ngigula.

14Besihlasela iNegebi yamaKerethi, lengxenye yakoJuda, leNegebi yakoKalebi; satshisa iZiklagi ngomlilo.

15UDavida wasesithi kuye: Ungangisa kuleloxuku na? Yena wathi: Funga kimi ngoNkulunkulu ukuthi kawuyikungibulala, kawuyikunginikela enkosini yami; ngizakukusa kuleloxuku.

16Wasemusa khona, babafumanisa begcwele indawo yonke, besidla, benatha, bethokozela impango enkulu ababeyithumbile elizweni lamaFilistiya lelakoJuda.

17UDavida wababulala kusukela ekuseni kwaze kwakusihlwa, waphinda langosuku olulandelayo. Kakuphunyukanga muntu, kuphela insizwa ezingamakhulu amane, ezagada amakamela zabaleka.

18UDavida wakhulula bonke ababethunjiwe ngamaAmaleki kanye labomkakhe bobabili.

19Kakusilelanga muntu omncinyane lomkhulu, indodana loba indodakazi, impango loba okunye okwakuthunjiwe; uDavida wakuthatha konke.

20UDavida wathumba zonke izimvu lenkomo. Abantu baziqhuba inkomo phambi kwakhe besithi: Yimpango kaDavida le.

21UDavida wafika kulabobantu abangamakhulu amabili ababekhathele kakhulu abehluleka ukumlandela, basala esifuleni iBesori; baphuma ukumhlangabeza yena labantu ababelaye. Lapho uDavida esondela kubo, wababingelela.

22Kodwa bonke abantu ababi labonakeleyo phakathi kwabantu ababehambe loDavida bathi: Njengoba bengahambanga lathi, kasiyikubanika lutho empangweni esiyithumbileyo, kuphela nje ukuba leyo laleyondoda ithathe umkayo labantwana bayo, ihambe.

23Kodwa uDavida wasesithi: Kaliyikwenza njalo; ngoba khumbulani lokho esikuphiwe yiNkosi uNkulunkulu, lokuthi yasilondoloza, yanikela ezandleni zethu ixuku elasihlaselayo.

24Ngubani ozalilalela kulindaba na? Isabelo salowo oya ekulweni sizafanana lesabelo salowo osala empahleni; bazakwabelwa ngokulinganayo.

25Kusukela mhlalokho kusiya phambili wakumisa lokhu, kwaba yisimiso lomthetho koIsrayeli kuze kube lamuhla.

26UDavida esefikile eZiklagi, wathumela enye impango kwabadala bakoJuda lakubangane bakhe, wathi: Nanso isiphiwo senu esivela empangweni yezitha zeNkosi uNkulunkulu.

27Wayithumela kwabaseBetheli, labaseRamothi laseNegebi, labaseJatiri,

28labaseAroweri, labaseSifimothi, labaseEshitemowa,

29labaseRakali, labasemizini yamaJerameli, labasemizini yamaKeni,

30labaseHorma, labaseBorashani, labaseAthaki,

31labaseHebroni; lasendaweni zonke lapho uDavida labantu bakhe babejwayele ukuhamba khona.