Hubo 107 - Ndebele Bible (iBhayibhili Elingcwele) 1978

UGWALO LWESIHLANUUkubonga iNkosi ngokulunga kwayo

1Ibongeni iNkosi, ngoba ilungile,

ngoba uthando lwayo kalulakuphela.

2Kabatsho njalo abahlengiweyo beNkosi

ebahlengileyo ezitheni,

3yababutha emazweni, empumalanga lasentshonalanga,

enyakatho laseningizimu.

4Abanye bazula enkangala

bengafumani indlela eya emzini abangahlala kuwo,

5balamba boma,

umphefumulo wabo waphela amandla.

6Basebekhuleka eNkosini ekuhluphekeni kwabo,

yabakhulula osizini lwabo;

7yabahola ngendlela eqondileyo,

baze bafika emzini abangahlala kuwo.

8Kabayibonge iNkosi ngothando lwayo olungapheliyo

langemisebenzi yayo emangalisayo ebantwaneni babantu.

9Ngoba iyamkholisa owomileyo,

imsuthise ngokuhle olambileyo.

10Abanye bahlala emnyameni lasethunzini lokufa,

besosozini bebotshiwe ngensimbi,

11ngoba baphambana lamazwi kaNkulunkulu,

badelela iseluleko soPhezukonke.

12Inhliziyo zabo zadabuka ngenxa yokuhlupheka;

bawa kungekho ongabasiza.

13Basebekhuleka eNkosini ekuhluphekeni kwabo,

yabakhulula osizini lwabo;

14yabakhupha emnyameni lasethunzini lokufa,

yaqamula izibopho zabo.

15Kabayibonge iNkosi ngothando lwayo olungapheliyo,

langemisebenzi yayo emangalisayo ebantwaneni babantu.

16Ngoba ibulele izivalo zethusi,

yaphula imigoqo yensimbi.

17Abanye babeyizithutha,

ngenxa yezono zabo

langenxa yobubi babo bahlupheka;

18benyanya ukudla konke,

basondela eduze lokufa.

19Basebekhuleka eNkosini ekuhluphekeni kwabo,

yabakhulula osizini lwabo;

20yathumela ilizwi layo, yabasilisa,

yabakhulula ekubhujisweni.

21Kabayibonge iNkosi ngothando lwayo olungapheliyo,

langemisebenzi yayo emangalisayo ebantwaneni babantu.

22Kabanikele umnikelo wokubonga,

bahlabelele izenzo zayo ngokuthaba.

23Abanye bahamba olwandle ngemikolo,

bethengiselana emanzini amakhulu;

24babona izenzo zeNkosi,

lemisebenzi yayo emangalisayo olwandle.

25Ngoba yalaya, kwavuka isiphepha somoya

esavusa amavinqo olwandle.

26Baphakamela phezulu ezulwini,

behlela phansi enzikini;

baphelelwa yisibindi ekuhluphekeni kwabo.

27Babhadazela bedayizela njengezidakwa,

kwaphela ukuhlakanipha kwabo.

28Basebekhuleka eNkosini ekuhluphekeni kwabo,

yabakhulula osizini lwabo;

29yathulisa isiphepha,

kwathula amavinqo olwandle.

30Basebethokoza ngoba kwasekukhona ukuthula,

yabafikisa ethekwini ababesiya kulo.

31Kabayibonge iNkosi ngothando lwayo olungapheliyo,

32kabayidumise ebandleni labantu,

bayidumise emhlanganweni wabadala.

33Iphendula imifula ibe yinkangala,

imithombo yamanzi ibe ngumhlaba owomileyo,

34umhlabathi ovundileyo ube lugwadule lwetshwayi,

ngenxa yobubi babahlezi khona.

35Iphendula inkangala ibe yiziziba zamanzi,

lelizwe elomileyo libe yimithombo yamanzi,

36ihlalise khona abalambileyo,

bakhe umuzi wokuhlala;

37balime amasimu, bagxumeke isivini, batshaye inala.

38Ngokubusisa kwayo bayanda kakhulu,

lenkomo zabo kazinciphi.

39Babuya bancipha, bathotshiswa

ngokucindezelwa lokuhlupheka losizi.

40Ithela ihlazo phezu kwezikhulu,

ibazulisa enkangala engelandlela;

41kodwa ongumyanga iyamkhupha ekuhluphekeni,

ibenze abantwana bakhe bande babe njengomhlambi.

42Abaqotho bayakubona lokhu bathokoze,

kodwa ababi bathuliswe.

43Lowo ohlakaniphileyo kaqaphelise lokhu,

aqedisise uthando olungapheliyo lweNkosi.