Zaga 31 - Ndebele Bible (iBhayibhili Elingcwele) 1978

Izeluleko inkosi ezinikwa ngunina

1Nanka amazwi kaLemuweli inkosi yaseMasa, awafundiswa ngunina.

2Wathi:

Mntanami! Wena owaphuma esiswini sami!

Wena oyisipho semikhuleko yami!

3Ungachitheli amandla akho kwabesifazana,

ungazinikeli kubo abachitha amakhosi.

4Lemuweli, kakulunganga ukuba amakhosi anathe iwayini,

lokuba ababusi bafise utshwala;

5ngoba uba benatha, bazakhohlwa izimiso,

bahlanekele amalungelo abahluphekayo.

6Baphe ababhubhayo utshwala,

labalosizi olukhulu iwayini,

7banathe, bakhohlwe ubuyanga babo,

bangabe besakhumbula usizi lwabo.

8Khulumela abangelamandla okukhuluma,

ubaphendulele bonke abangelabasizi.

9Khuluma, uthonisise ngokulunga,

umele amalungelo abayanga labaswelayo.

Umfazi olungileyo

10Ngubani ongathola umfazi olungileyo na?

Uligugu elidlula amatshe amahle.

11Umkakhe uthemba kuye ngenhliziyo yakhe yonke,

kayikuswela lutho.

12Uyamenzela okuhle, kungabi okubi,

ekuphileni kwakhe konke.

13Uzuza uboya bezimvu lesikusha,

akhuthale emsebenzini wakhe.

14Uletha emzini ukudla okuvela khatshana njengemikolo yabathengi.

15Vuka kusesemnyama, aphekele abomuzi wakhe,

azinike incekukazi zakhe imisebenzi yazo.

16Esenakane ngensimu uyayithenga,

ngenzuzo yakhe ahlanyele kuyo amavini.

17Uyaziqinisa ukuba ukhuthalele umsebenzi wakhe.

18Uyabona ukuthi imisebenzi yakhe izuza inzuzo,

kacitshi isibane sakhe ebusuku.

19Uphatha uluthi lokuphotha intambo ngezakhe izandla,

langezandla zakhe abambe isigodo esilezintambo.

20Vulela abayanga isandla sakhe,

uyaphana kwabaswelayo.

21Lapho kuqanda kakhulu, kesabi ngabomuzi wakhe,

ngoba bonke begqoke izigqoko ezikhudumezayo.

22Uzenzela amalembu emibheda,

agqoke izigqoko zelembu elihle leliyibubende.

23Umkakhe uyaziwa enkundleni,

lapho ehlezi labadala belizwe.

24Lumfazi wenza izambatho ngelembu elihle, azithengise,

enzele abathengi amabhanti.

25Wambethe amandla lodumo,

uyathaba engesabi isikhathi esizayo.

26Lapho evula umlomo wakhe, ukhuluma ngokuhlakanipha,

afundise ngamazwi omusa.

27Ulondoloza kuhle umuzi wakhe,

udla isithukuthuku sakhe.

28Abantwana bakhe bayambonga,

lomkakhe laye uyamdumisa,

29esithi: Banengi abafazi abalungileyo,

kodwa wena ubadlula bonke.

30Ukubukeka kuyakhohlisa, lobuhle bulize,

kodwa owesifazana owesaba iNkosi udumisekile.

31Mnikeni udumo ngakho konke akwenzayo,

ahlonitshwe ngabantu ngenxa yemisebenzi yakhe.