Hez 33 - Ndebele Bible (iBhayibhili Elingcwele) 1978

Umprofethi ngumlindi koIsrayeli

1Ilizwi leNkosi lafika kimi lathi:Hez 3:16–21

2Ndoda, tshono kibo abantu bakini uthi: Uba ngiletha impi elizweni, labantu belizwe bathathe omunye phakathi kwabo, bambeke abe ngumlindi wabo,

3nxa ebona impi isiza elizweni, akhalise uphondo, axwayise abantu,

4uba omunye esizwa ukukhala kophondo angananzi, impi ifike imbulale, kuzakuba ngumlandu wakhe.

5Uzwile ukukhala kophondo, kazananza, ngoba umlandu uzakuba ngowakhe. Kodwa uba ebexwayile, ubezaphepha.

6Kodwa nxa umlindi ebona impi isiza, angalukhalisi uphondo, abantu bengaxwayiswa, impi ifike ibulale omunye wabo, lowomuntu afele esonweni sakhe, umlandu uzakuba ngowomlindi.

7Wenake, ndoda, ngikubeke ube ngumlindi koIsrayeli; nxa usizwa ilizwi elivela kimi, ubaxwayise.

8Uba ngisithi komubi: Wena muntu omubi, uzakufa impela; uba ungakhulumi wena ukumxwayisa omubi ukuba atshiye indlela yakhe, lowomuntu omubi uzafela esonweni sakhe, kodwa umlandu uzakuba ngowakho.

9Kodwa uba umxwayisa omubi ukuba aphenduke endleleni yakhe, angatshiyi indlela yakhe, uzafela esonweni sakhe, kodwa wena uzakuphepha.

Indlela kaNkulunkulu ilungile

10Wenake, ndoda, tshono kuIsrayeli uthi: Lina lithi: Iziphambeko zethu lezono zethu zisehlele, siyaphela ngenxa yazo; sizakuphila njani na?

11Tshono kibo uthi: INkosi ithi: Ngiyazifunga mina, kangithokozi ngokufa komubi, kodwa ngokuba omubi atshiye indlela yakhe aphile; tshiyanike, tshiyani indlela zenu ezimbi, ngoba lizafelani, lina bakoIsrayeli na?

12Wenake, ndoda, tshono ebantwini bakini uthi: Ukulunga kolungileyo kakuyikumkhulula uba esona; lobubi bomubi kabuyikumbulala uba etshiya ububi bakhe; lolungileyo kayikuphila ngokulunga kwakhe uba esona.

13Lapho ngisitsho kolungileyo ukuthi uzaphila impela, kanti uba ethemba ukulunga kwakhe, enze isono, kakuyikukhunjulwa lesisodwa isenzo sakhe esilungileyo, kodwa uzafela esonweni asenzileyo.

14Futhi uba ngisitsho komubi ukuthi uzakufa impela, kanti uba ephenduka ezonweni zakhe, enze okufaneleyo lokulungileyo,

15uba ebuyisela isibambiso, abuyisele lokho akuphangileyo, ahambe ngezimiso zokuphila, angenzi okubi, uzakuphila impela, angafi.

16Kakusayikukhunjulwa lesisodwa sezono azenzileyo; ngoba wenzile okufaneleyo lokulungileyo, uzakuphila impela.

17Kodwa abantu bakini bathi: Indlela yeNkosi kayilunganga; kanti ngezabo indlela ezingalunganga.

18Nxa olungileyo etshiya ukulunga kwakhe, enze okubi, uzakufa ngenxa yakho.

19Nxa omubi etshiya ububi bakhe, enze okufaneleyo lokulungileyo, uzakuphila ngenxa yakho.

20Kanti lina lithi: Indlela yeNkosi kayilunganga. Lina bakoIsrayeli, ngizalithonisisa lonke ngokufanele izindlela zenu.

Ukuwa kweJerusalema

21Ngomnyaka wetshumi lambili wokuthunjwa kwethu, ngosuku lwesihlanu lwenyanga yetshumi, umuntu owayephunyukile eJerusalema wafika kimi wathi: Umuzi usuchithekile.2 Kho 25:3–10; Jer 39:2–8; 52:4–14

22Isandla seNkosi sasiphezu kwami kusihlwa kungakafiki ophunyukileyo; yavula umlomo wami ngesikhathi lowomuntu engakafiki kimi ekuseni. Umlomo wami wavuleka, angabe ngisaba yisimungulu.

23Ilizwi leNkosi lafika kimi lathi:

24Ndoda, abakhileyo endaweni ezichithekileyo elizweni lakoIsrayeli, balokhu besithi: UAbrahama wayemunye lapho enikwa ilizwe, kodwa thina sibanengi; ilizwe silinikiwe impela ukuhlala kilo.

25Ngalokhoke tshono kibo uthi: INkosi uNkulunkulu ithi: Lidla inyama elegazi, liphakamisele amehlo enu ezithombeni zenu, lichithe igazi; lizahlala kilo ilizwe na?

26Lithemba umkhonto, lenze amanyala, lowo lalowo angcolise umfazi womakhelwana wakhe; kambe lizahlala kilo ilizwe na?

27Tshono lokhu kibo uthi: INkosi uNkulunkulu ithi: Ngiyazifunga mina, impela labo abasendaweni ezichithekileyo bazakubulawa; labo abasegangeni ngizabanikela ezilweni zibabulale, lalabo abasezinqabeni labasembalwini bazabulawa yisifo.

28Ngizalichitha ilizwe libe yinkangala, lamandla alo aziphakamisayo azaphela, lentaba zakoIsrayeli zibe yinkangala ukuba kungadluli muntu kuzo.

29Ng’khona bazakwazi ukuba ngiyiNkosi lapho sengilichithile ilizwe laba yinkangala ngenxa yamanyala abo wonke abawenzileyo.

30Wenake, ndoda, abantu bakini bakhuluma ngawe emidulini laseminyango yezindlu, lowo lalowo uthi kumfowabo: Woza, sizwe ukuba ilizwi lithini elivela eNkosini.

31Ngakho abantu bami bayeza kuwe, bahlale phambi kwakho, bezwe okutshoyo, kodwa kabayikukwenza. Ngoba bathanda ngomlomo wabo, kodwa inhliziyo zabo zisenzuzweni yabo.

32Kibo unjengomuntu ohlabela ingoma ezinhle, olelizwi elihle, owazi ukutshaya kuhle ichacho, ngoba bayezwa okutshoyo kodwa kabayikukwenza.

33Nxa lokhu kufika, ngoba kuzafika impela, ng’khona bazakwazi ukuba bekukhona umprofethi phakathi kwabo.