Jer 36 - Ndebele Bible (iBhayibhili Elingcwele) 1978

Ukubalwa lokutshiswa komqulu wencwadi

1Kwathi ngomnyaka wesine wokubusa kukaJehoyakimi indodana kaJosiya, inkosi yakoJuda, lelilizwi leNkosi lafika kuJeremiya, lathi:2 Kho 24:1; 2 Lan 36:5–7; Dan 1:1–2

2Thatha umqulu wencwadi, ulobe kiwo wonke amazwi engiwakhulume kuwe ngoIsrayeli langoJuda langazo zonke izizwe, kusukela osukwini engakhulume kuwe ngoIsrayeli langoJuda langazo zonke izizwe, kusukela osukwini engakhuluma ngalo kuwe, ensukwini zikaJosiya, kuze kube lamhla.

3Mhlawumbe indlu yakoJuda izakuzwa konke okubi engicabanga ukukwenza kiyo, ukuba baphenduke bonke endleleni yabo embi, ukuze ngithethelele ububi babo lesono sabo.

4UJeremiya wasebiza uBaruki indodana kaNeriya, uBaruki waloba emqulwini wencwadi wonke amazwi kaJeremiya, wonke amazwi iNkosi eyayiwakhulume kuye.

5UJeremiya wasesithi kuBaruki: Mina ngivinjelwe ukungena ethempelini;

6hamba wena, mhla wosuku lokuzila ukudla, ufunde emqulwini wencwadi owulobileyo wonke amazwi eNkosi engikutshele wona, uwafunde phambi kwabantu bonke ethempelini; uwafunde futhi phambi kwabantu bonke bakoJuda abavela emizini yabo.

7Mhlawumbe ukukhuleka kwabo kungezwakala eNkosini, baphenduke bonke endleleni yabo embi, ngoba ulaka lweNkosi lukhulu kanye lokuthukuthela kwayo ngalababantu.

8UBaruki indodana kaNeriya wakwenza konke uJeremiya umprofethi ayemlaye khona, ukuba afunde amazwi eNkosi asemqulwini ethempelini.

9Emnyakeni wesihlanu wokubusa kukaJehoyakimi indodana kaJosiya, inkosi yakoJuda, ngenyanga yesificamunwemunye, bonke abantu abaseJerusalema, labantu bonke abavela emizini yakoJuda besiza eJerusalema, bamemezela usuku lokuzila ukudla phambi kweNkosi.

10UBaruki wawafunda wonke amazwi kaJeremiya asemqulwini wencwadi phambi kwabo bonke abantu ethempelini, endlini kaGemariya indodana kaShafani, umbhali, eyayisegumeni elingaphezulu, ekungeneni kweSango elitsha lethempeli.

11Kwathi lapho uMikaya indodana kaGemariya, indodana kaShafani, esizwa wonke amazwi eNkosi avela emqulwini wencwadi,

12waya esigodlweni, wangena endlini yombhali; zonke izikhulu zazikhona lapho, oElishama umbhali, loDelaya indodana kaShemaya, loElinathani indodana kaAkibori, loGemariya indodana kaShafani, loZedekiya indodana kaHananiya, lezinye zonke izikhulu.

13UMikaya wabatshela wonke amazwi ayewezwile, lapho uBaruki efunda umqulu wencwadi phambi kwabantu.

14Zonke izikhulu zasezithuma uJehudi indodana kaNethaniya, indodana kaShelemiya, indodana kaKushi, ukuba athi kuBaruki: Thatha umqulu wencwadi owufunde phambi kwabantu, uze lawo. Ngakho uBaruki indodana kaNeriya wawuthatha umqulu wencwadi, waya kuzo.

15Bathi kuye: Hlala phansi, uwufunde. UBaruki wasebafundela.

16Bathi ukuwezwa wonke amazwi, bakhangelana bethukile, bathi kuBaruki: Sizakuyitshela inkosi wonke amazwi la.

17Bambuza uBaruki bathi: Sitshele, wawaloba njani wonke lamazwi? UJeremiya wakutshela wona na?

18UBaruki wathi: UJeremiya wangitshela wonke lamazwi, ngawabhala ngeyinki emqulwini wencwadi.

19Izikhulu zasezisithi kuBaruki: Hamba uyecatsha, wena loJeremiya, ungatsheli muntu lapho likhona.

20Zasezingena enkosini egumeni, seziwubekile umqulu wencwadi endlini kaElishama umbhali; zayibikela inkosi wonke amazwi.

21Inkosi yasithuma uJehudi ukuba awulande umqulu wencwadi; wawuthatha endlini kaElishama umbhali; uJehudi wayifundela inkosi lazo zonke izikhulu ezazilenkosi.

22Kwakuyinyanga yesificamunwemunye, inkosi yayihlezi endlini yobusika, kubasiwe umlilo embawuleni phambi kwayo.

23Kwathi lapho uJehudi esefundile amakhasi amathathu lobe amane, inkosi yawasika ngengqamu, yawaphosela emlilweni osembawuleni, waze watsha waphela wonke umqulu wencwadi.

24Kodwa inkosi lezinceku zayo ezawezwayo wonke lamazwi kabesabanga, kabadabulanga ingubo zabo.

25Kwathi lalapho oElinathani loDelaya loGemariya beyincenga inkosi ukuba ingawutshisi umqulu, kayibalalelanga.

26Inkosi yalaya uJerameli indodana yenkosi, loSeraya indodana kaAziriyeli, loShelemiya indodana kaAbideli, ukuba babambe uBaruki umbhali loJeremiya umprofethi; kodwa iNkosi uNkulunkulu yabafihla.

27Kwathi lapho inkosi uJehoyakimi isiwutshisile umqulu owawulamazwi kaJeremiya ayelotshwe nguBaruki, ilizwi leNkosi lafika kuJeremiya lathi:

28Thatha omunye umqulu wencwadi, ulobe kuwo wonke amazwi ayesemqulwini wokuqala owatshiswa nguJehoyakimi inkosi yakoJuda.

29Mayelana loJehoyakimi inkosi yakoJuda uzakuthi: INkosi uNkulunkulu ithi: Uwutshisile umqulu wencwadi, wathi: Ulobeleni kiwo ukuthi inkosi yaseBabiloni izafika impela, ilichithe lelilizwe, ibulale bonke abantu lenyamazana na?

30Ngakhoke iNkosi ithi mayelana loJehoyakimi inkosi yakoJuda: Kayikuba lamuntu wokuhlala esihlalweni sobukhosi sikaDavida; lesidumbu sakhe sizaphoselwa ekutshiseni kwelanga lasekuqandeni kobusuku.

31Ngizamtshaya yena kanye lenzalo yakhe, lenceku zakhe ngenxa yobubi babo; ngizakwehlisela phezu kwabo laphezu kwabo bonke abakhileyo eJerusalema laphezu kwabantu bakoJuda konke okubi engikukhulume ngabo, ngoba bengalalelanga.

32UJeremiya wasethatha omunye umqulu, wawunika uBaruki umbhali indodana kaNeriya, owaloba kiwo wonke amazwi kaJeremiya, wonke amazwi omqulu wokuqala owatshiswa nguJehoyakimi inkosi yakoJuda; kwengezelelwa kiwo amazwi amanengi afana lawo.