Hubo 85 - Ndebele Bible (iBhayibhili Elingcwele) 1978

Umkhuleko wokucelela uIsrayeli ukuthula

1Nkosi, ube lomusa elizweni lakho.

Umbuyisele uJakobe okuhle;

2wabathethelela ububi abantu bakho,

wazithethelela zonke izono zabo.

3Ukususile konke ukuthukuthela kwakho,

wakudedisa ukuvutha kolaka lwakho.

4Sibuyise futhi, Nkulunkulu wokukhululwa kwethu,

ususe kithi isigcono sakho.

5Uzakusithukuthelela kokuphela na?

Uzakudlulisela ulaka lwakho ezizukulwaneni zonke na?

6Kawuyikusivuselela,

ukuze abantu bakho bathokoze ngawe na?

7Sitshengise uthando lwakho olungapheliyo, Nkosi,

usinike ukukhulula kwakho.

8Ake ngizwe lokho uNkulunkulu iNkosi azakukukhuluma,

ngoba uzakukhuluma ukuthula ebantwini bakhe,

kubo abangcwele bakhe,

abaphendukela kuye ngenhliziyo yabo yonke.

9Impela ukukhulula kwakhe kuseduze kulabo abamesabayo,

ukuze kuhlale udumo elizweni lakithi.

10Kuzahlangabezana uthando olungapheliyo lobuqotho,

ukulunga lokuthula kwangane.

11Ubuqotho buzakuvela emhlabeni,

ukulunga kulunguze kusezulwini.

12Yebo, iNkosi izakuveza okuhle,

lelizwe lakithi lizakuthela izithelo zalo.

13Ukulunga kuzakuhamba phambi kwayo,

kwenzele inyawo zayo indlela.