Jer 50 - Ndebele Bible (iBhayibhili Elingcwele) 1978

Ilizwi ngeBabiloni

1Ilizwi iNkosi eyalikhuluma ngeBabiloni, ngelizwe lamaKaladiya, ngoJeremiya umprofethi, lisithi:

2Memezani phakathi kwezizwe, litshumayele;

misani uphawu, litshumayele, lingakufihli, lithi:

IBabiloni linqotshiwe, uBali uyangekile, loMerodaki uchithiwe.

Izithombe zalo ziyangisiwe, lemifanekiso yalo emibi ichithekile.

3Ngoba kuzile kulo isizwe esivela enyakatho,

esizachitha ilizwe lalo,

abantu lenyamazana kuzabaleka, kungabi khona ohlala kulo.

4Ngalezonsuku langalesosikhathi, kutsho iNkosi,

abantu bakoIsrayeli labantu bakoJuda bazabuthana ndawonye,

bazahamba bekhala, bedinga iNkosi uNkulunkulu wabo.

5Bazabuza indlela eya eZiyone, bekhangele ngakulo, bathi:

Wozani, sizihlanganise leNkosi ngesivumelwano esingapheliyo esingayikukhohlakala.

6Abantu bami bebeyizimvu ezilahlekileyo;

abelusi babo babaduhisile, bebebalusela ezintabeni;

besuka entabeni besiya kwenye, bakhohlwa isibaya sabo.

7Bonke ababafumanayo babadla,

lezitha zabo zathi: Kasilacala ngoba bonile eNkosini,

iNkosi elikhaya labo eliqotho lethemba laboyise.

8Balekani liphume eBabiloni,

liphume elizweni lamaKaladiya,

libe njengezintondolo phambi komhlambi.

9Ngoba ngivusela iBabiloni ixuku lezizwe ezinkulu;

zizavela enyakatho, zehlele ngakulo, zilithathe khona.

Imitshoko yazo injengeqhawe elihlakaniphileyo elingabuyi lingelalutho.

10IKaladiya lizaphangwa,

labaliphangayo bonke bazakwaneliswa, kutsho iNkosi.

11Lanxa lithokoza, lanxa lijabula,

lina baphangi belizwe lami,

lanxa liqolotsha njengethokazi elisotshanini,

likhale njengamabhiza amaduna,

12unyoko uzakuba lenhloni, lowalizalayo ayangeke.

IBabiloni lizakuba ngelokucina phakathi kwezizwe,

libe yinkangala eyomileyo logwadule.

13Ngenxa yolaka lweNkosi kaliyikuhlalwa muntu,

kodwa lizachitheka impela;

wonke umuntu odlula eBabiloni uzamangala,

ancife ngenxa yazo zonke inhlupheko zalo.

14Zihleleleni iBabiloni inxa zonke,

lina lonke eligobisa amadandili,

lilitshoke, lingatshiyi mtshoko,

ngoba lonile eNkosini.

15Memezani kulo inxa zonke;

selizinikele, inqaba zalo sezidilikile,

lemiduli yalo ibhidliziwe;

ngoba lokho kuyimpindiselo yeNkosi;

phindiselani kulo, lenze kulo njengokwenza kwalo.

16Qedani umhlanyeli eBabiloni,

kanye laye ophatha isikela ngesikhathi sokuvuna;

ngenxa yempi yomchithi, wonke umuntu uzabuyela kwabakibo,

wonke umuntu uzabalekela kwelakibo ilizwe.

17UIsrayeli uyimvu ezingelwayo, exotshwa yizilwane. Kuqala wadliwa yinkosi yaseAsiriya, emva kwalokho uNebukadineza inkosi yaseBabiloni uqhobile amathambo akhe.

18Ngakhoke iNkosi yamabandla, uNkulunkulu kaIsrayeli, ithi: Ngizayitshaya inkosi yaseBabiloni lelizwe layo, njengalokho ngayitshaya inkosi yaseAsiriya.

19Ngizabuyisela uIsrayeli edlelweni lakhe, uzakudla eKarmeli laseBashani, lokufisa kwakhe kukholiswe emaqaqeni akoEfrayimi laseGileyadi.

20Ngalezonsuku langalesosikhathi, kutsho iNkosi, kuzadingwa ukona koIsrayeli, kodwa kungafunyanwa; kudingwe lesono koJuda, kodwa singafunyanwa; ngoba ngizabathethelela labo abayingcosana engibatshiyayo.

21Hambani liye elizweni laseMerathayimi lilwe lalo,

lilwe labakhileyo ePekodi,

libabulale, libaqede nya, kutsho iNkosi,

lenze konke engililayele khona.

22Kukhona umsindo wokulwa elizweni, lokuchitheka okukhulu.

23Yeka ukufa lokwephuka kwesando somhlaba wonke!

Yeka ukwenziwa kweBabiloni into eyesabekayo phakathi kwezizwe!

24Ngakuthiya ngomjibila, wabanjwa, wena Babiloni, ungakakwazi;

wafunyaniswa, wabanjwa, ngoba walwa leNkosi.

25INkosi ivalile indlu yayo yezikhali,

yakhupha izikali zolaka lwayo,

ngoba iNkosi, uNkulunkulu wamabandla, ilomsebenzi elizweni lamaKaladiya.

26Lifikeleni, livela inxa zonke, livule iziphala zalo,

lilibuthelele njengenqumbi yamabele, liliqede nya,

kungasali lutho kulo.

27Bulalani inkunzi zalo zonke, kazisiwe ekuhlatshweni.

Maye kuzo! ngoba usuku lwazo lufikile,

isikhathi sokutshaywa kwazo.

28Zwaninike, ababalekayo labaphunyukayo bavela elizweni laseBabiloni,

ukuba bamemeze eZiyone ukuphindisela kweNkosi uNkulunkulu wethu,

impindisela yethempeli layo.

29Bizani abaphatha imitshoko,

balwe leBabiloni bonke abakwazi ukutshoka;

lihanqeni inxa zonke, kungabi khona ophunyukayo,

liliphindisele njengezenzo zalo,

lenze kulo njengakho konke elikwenzileyo;

ngoba liyidelele iNkosi, oNgcwele kaIsrayeli.

30Ngakhoke insizwa zalo zizakuwa emagumeni alo,

lawo wonke amabutho alo azabhujiswa ngalolosuku, kutsho iNkosi.

31Khangela, ngilwa lawe, wena ozikhukhumezayo,

kutsho iNkosi, uNkulunkulu wamabandla;

ngoba usuku lwakho selufikile, isikhathi sokutshaywa kwakho.

32Ozikhukhumezayo uzakhubeka awe,

kungabi khona omvusayo;

ngizaphemba umlilo emizini yakhe ozatshisa konke okuseduze laye.

33INkosi yamabandla ithi:

Abantu bakoIsrayeli bacindezelwe kanye labantu bakoJuda;

bonke ababathumbileyo bababambile, bayala ukubayekela.

34Kanti umhlengi wabo ulamandla,

ubizwa ngokuthi yiNkosi yamabandla.

Impela uzamela indaba yabo,

ukuba anike umhlaba ukuthula,

kodwa anyakazise abakhileyo eBabiloni.

35Kawufike umkhonto phezu kwamaKaladiya, kutsho iNkosi,

laphezu kwabakhileyo eBabiloni,

phezu kwezikhulu zalo, labahlakaniphileyo balo.

36Kawufike umkhonto phezu kwabavumisi ukuba baphenduke iziphukuphuku,

laphezu kwamaqhawe ukuze abhujiswe.

37Kawufike umkhonto phezu kwamabhiza laphezu kwenqola zalo zokulwa,

laphezu kwawo wonke amabutho awezizwe aphakathi kwalo,

ukuze baphenduke babe ngabesifazana;

umkhonto ufike phezu kwenotho yalo, ukuba iphangwe.

38Kufike ukubalela kwelanga phezu kwamanzi alo ukuba acitshe,

ngoba liyilizwe lezithombe,

lemifanekiso yabo iyabahlanyisa.

39Ngakhoke amakhanka lezimpisi lezintshe kuzahlala eBabiloni;

kakusayikuhlala abantu khona kuze kube nininini,

kakusayikwakhelwa kulo ezizukulwaneni zonke.

40Njengoba uNkulunkulu wachitha iSodoma leGomora lemizi eyakhelene lalo, kutsho iNkosi,

ngokunjalo kakusayikusala muntu khona,

kakusayikuhamba muntu khona.

41Khangela, kuvela abantu enyakatho,

isizwe esikhulu lamakhosi amanengi avuka emikhawulweni yomhlaba.

42Baphethe imitshoko lemikhonto,

balesihluku, kabalasihawu.

Umdumo wabo unjengowolwandle,

bagade amabhiza, behleliwe njengabantu bokulwa lawe, Babiloni.

43Inkosi yaseBabiloni yezwa umbiko ngabo,

izandla zayo zaba buthakathaka;

usizi lwayibamba, lobuhlungu obunjengowesifazana ohelelwayo.

44Njengesilwane esiphuma ehlathini leJordani sisiya esibayeni sezimvu esiqinileyo,

ngizabajuma ngibaxotshe, basuke kulo,

ngilibekele lowo engimkhethileyo.

Ngoba ngubani ofanana lami?

Ngubani ozangibiza na?

Nguwuphi umalusi ongema phambi kwami na?

45Ngakhoke zwanini icebo iNkosi elenzayo ngeBabiloni,

lemikhumbulo elayo ngelizwe lamaKaladiya ukuthi:

Abancinyane bomhlambi bazadonswa basuswe,

lendawo yabo imangale ngokuphela kwabo.

46Ngomsindo wokuthunjwa kweBabiloni umhlaba uzathuthumela,

lelizwi lokukhala kwalo lizakuzwakala phakathi kwezizwe.