Eks 35 - Ndebele Bible (iBhayibhili Elingcwele) 1978

Umthetho weSabatha

1UMose wasebuthanisa lonke ibandla labakoIsrayeli, wathi kulo: Yilokhu iNkosi elilaye khona ukuba likwenze.

2Kuzasetshenzwa insuku eziyisithupha, kodwa usuku lwesikhombisa luzakuba lusuku olungcwele kini, lube liSabatha lokuphumula leNkosi; lowo osebenza ngalo uzakubulawa.Eks 20:8–11; 23:12; 31:15; 34:21; Levi 23:3; Dute 5:12–14

3Lingabasi umlilo ngeSabatha kuyo yonke imizi yenu.

Ukunikela umnikelo eNkosini

4UMose wasekhuluma kilo lonke ibandla lakoIsrayeli, wathi: Yilokhu iNkosi ekulayileyo isithi:

5Thathelani iNkosi umnikelo phakathi kwenu; lowo ovumayo kalethe umnikelo eNkosini, igolide lesiliva lethusi,

6lelembu eliluhlaza leliyibubende lelibomvu, lelembu elihle, loboya bembuzi,

7lezikhumba ezibomvu zezinqama, lezinzwezwe, lezihlahla zomvagazi,

8lamafutha ezibane, lamakha amagcobo okugcoba lempepha elephunga elimnandi,

9lamatshe athiwa amaonikse, lamatshe okubekwa engutsheni yamahlombe leyesifuba.

Izinto zeTabernakeli

10Bonke abahlakaniphileyo kabasuke benze lokho iNkosi ekutshiloyo;Eks 39:32–43

11iTabernakeli lethente lalo, lesifulelo salo, lengwegwe zalo, lamapulanka alo, lemithando yalo, lensika zalo, lenyawo zalo;

12lomtshokotsho lemijabo yawo, lesihlalo somusa, leveli elilikhetheni;

13letafula lemijabo yayo, lezitsha zayo zonke, lezinkwa ezahlukaniselwe iNkosi;

14loluthi lwesibane sokukhanyisa, lezitsha zalo, lezibane zalo, lamafutha okukhanyisa;

15lealtare yempepha, lemijabo yalo, lamagcobo okugcoba, lempepha elephunga elimnandi, leveli lomnyango ngasemnyango weTabernakeli;

16ialtare lomnikelo wokutshiswa kanye lesihlengo salo sethusi, lemijabo yalo, lazo zonke izitsha zalo, lomkolo lenyawo zawo;

17amakhetheni eguma, lensika zalo, lenyawo zalo, leveli lesango leguma;

18lezikhonkwane zeTabernakeli, lezikhonkwane zeguma lentambo zazo;

19lezambatho ezenziwe kuhle zokukhonza endaweni engcwele, izambatho ezingcwele zikaAroni umpristi, lezambatho zamadodana akhe, ukuba babe ngabapristi bokuphatha umsebenzi wami.

Abantu banikela umnikelo wabo

20Lonke ibandla labakoIsrayeli laselisuka kuMose.

21Beza bonke abathunywa zinhliziyo zabo, abathunywa ngumoya wabo, baletha umnikelo wokunikela eNkosini, ube ngowomsebenzi wethente lokuhlangana lowenkonzo yonke yalo lowezambatho ezingcwele.

22Bezake abesilisa labesifazana, bonke abavumayo, beletha iziceco lamacici lendandatho lamasongo, zonke izinto zegolide; bonke banikela into yegolide eNkosini.

23Bonke ababelamalembu aluhlaza layibubende labomvu lamalembu amahle loboya bembuzi lezikhumba zenqama ezibomvu lezinzwezwe bakuletha.

24Bonke ababelento yesiliva leyethusi baziletha ukuba bazinikele eNkosini; labo bonke ababelezigodo zomvagazi ezingasetshenziswa emsebenzini baziletha.

25Bonke abesifazana ababehlakaniphile baphotha ngezandla zabo, baletha okuphothiweyo kwelembu eliluhlaza leliyibubende lelibomvu lelembu elihle.

26Labo bonke abesifazana ababelolwazi abathunywa zinhliziyo zabo baphotha uboya bembuzi.

27Lezinduna zaletha amatshe athiwa amaonikse lamatshe amahle okubekwa engutsheni zamahlombe lasengutsheni zesifuba,

28lamakha, lamafutha esibane lawokugcoba lawempepha elephunga elimnandi.

29AbakoIsrayeli baletha umnikelo wesihle eNkosini; bonke abesilisa labesifazana ababethunywa zinhliziyo zabo bawuletha ukuba ube ngowomsebenzi iNkosi eyayilaye uMose ngawo ukuze wenziwe.

Ukubizwa kukaBezaleli loOholiyaba

30UMose wasesithi ebantwini bakoIsrayeli: INkosi imkhethile uBezaleli indodana kaUri, indodana kaHuri owesizwe sakoJuda;Eks 31:1–6

31imgcwalisile ngomoya kaNkulunkulu ukuba abe lokuhlakanipha lokuqedisisa lokwazi lamandla okwenza yonke imisebenzi,

32lokuba aqambe imisebenzi yobungcitshi, asebenze ngegolide langesiliva langethusi,

33lokuba abaze amatshe okufakwa, abaze njalo izigodo, enze yonke imisebenzi yobungcitshi.

34Imnikile amandla okufundisa, yena loOholiyaba indodana kaAhisamaki owesizwe sakoDani.

35Ibagcwalisile ngokuhlakanipha ukuba benze imisebenzi yonke yombazi wamatshe, leyengcitshi, leyomthungi othunga ilembu eliluhlaza leliyibubende lelibomvu lelembu elihle, leyomaluki; benze imisebeni yonke loba yiyiphi leyabaqamba imisebenzi yobungcitshi.