uAmosi 5 - Ndebele Bible (iBhayibhili Elingcwele) 1978

UIsrayeli utshelwa ukuba aphenduke

1Zwanini lelilizwi engilitsho ngani, libe yisililo, lina ndlu kaIsrayeli.

2Iwile intombi enguIsrayeli, kayisayikuvuka futhi;

iwele phansi emhlabathini wayo,

kakho ongayivusa.

3INkosi uNkulunkulu ithi:

Emzini okwaphuma kiwo abayinkulungwane kuzasala ikhulu nje,

lokwaphuma kiwo abalikhulu kuzasala itshumi nje koIsrayeli.

4Ngoba iNkosi ithi kuIsrayeli:

Ngidingani ukuze liphile;

5kodwa lingadingi iBetheli,

lingangeni eGiligali, loba lidlulele eBerisheba,

ngoba iGiligali lizathunjwa, leBetheli lizachitheka.

6Dingani iNkosi ukuze liphile,

funa ilumathe endlini kaJosefa njengomlilo otshisa uqothule,

kungabi khona owucimayo eBetheli,

7lina elihlanekela ukwahlulela likwenze kube yinto ebabayo,

liphosele phansi ukulunga.

8Yiyo eyenza inkanyezi ezithiwa yisiLimela lezithiwa yiziNja,

lephendula umnyama omkhulu ube yikusa,

iphendule imini ibe yibusuku,

ibize amanzi olwandle iwanisele phezu komhlabathi;

yiNkosi ibizo layo.

9Yehlisela abalamandla ukuchitheka,

lencithakalo phezu kwenqaba.

10Liyamzonda obakhuzayo enkundleni abonayo,

linengwe ngokhuluma iqiniso.

11Ngenxa yokuba linyathezela phansi abayanga,

libize kibo isipho samabele,

kaliyikuhlala kuzo izindlu zamatshe abaziweyo elizakhileyo;

lihlanyela izivini ezinhle,

kodwa kaliyikunatha iwayini lazo.

12Ngoba ngiyazi ukuba iziphambeko zenu zinengi kangakanani,

lokuba izono zenu zinkulu kangakanani,

lina elihlupha abalungileyo,

lamukele umvuzo wokuthengwa,

lixotshe abaswelayo enkundleni.

13Ngakhoke ohlakaniphileyo uzakuzithulela ngalesosikhathi,

ngoba kuyisikhathi esibi.

14Dingani okuhle, atshi okubi, ukuba liphile,

ukuze ibe lani iNkosi uNkulunkulu wamabandla njengokutsho kwenu.

15Zondani okubi lithande okuhle,

lenze okufaneleyo enkundleni;

mhlawumbe iNkosi uNkulunkulu wamabandla ingaba lomusa kwabaseleyo koJosefa.

16INkosi uNkulunkulu wamabandla ithi:

Emidangeni yenu yonke kuzakuba khona ukulila,

lakuzo zonke indlela bazakuthi: Maye! Maye!

Bazabiza abalimi ukuba balile, labakwaziyo ukukhala ukuba balile.

17Lakuzo zonke izivini kuzakuba khona ukulila,

ngoba ngizadabula phakathi kwenu, kutsho iNkosi.

18Maye kini, lina elifisa usuku lweNkosi!

Usuku lweNkosi luzakulisizani na?

Ngoba lungumnyama, kalusikho ukukhanya.

19Kunjengomuntu obalekele isilwane, ehlangane lebhere,

loba angene endlini abambelele ngesandla emdulini, alunywe yinyoka.

20Angithi usuku lweNkosi lungumnyama, kalusikho ukukhanya,

usuku lomnyama ongelakukhanya, na?

21Ngiyayizonda, ngiyayidelela imikhosi yenu,

kangithokozi ngezinkonzo zenu.

22Lanxa linikela kimi iminikelo yenu yokutshiswa kanye leyempuphu,

kangiyikuyamukela,

leminikelo yenu yokuthula eyezinkomo ezinonileyo kangiyikuyinanza.

23Susani kimi umsindo wezingoma zenu,

kangiyikulalela lokukhala kwamachacho enu.

24Kodwa okufaneleyo kakugobhoze njengamanzi,

lokulunga kugeleze njengemifula engacimiyo.

25Lina ndlu kaIsrayeli lake laletha kimi imihlatshelo leminikelo enkangala okweminyaka engamatshumi amane na?Seb 7:42–43

26Lizakuthwala uSakuthi inkosi yenu loKayiwane inkanyezi kankulunkulu wenu, izithombe zenu elizenzele zona.

27Ngakhoke ngizakulenza ukuba lithunjelwe ngaphambi kweDamaseko, kutsho iNkosi, ebizwa ngokuthi nguNkulunkulu wamabandla.