Hlu 19 - Ndebele Bible (iBhayibhili Elingcwele) 1978

UmLevi othile lomfazi wakhe

1Ngalezonsuku, kungelankosi koIsrayeli, umLevi othile wayehlala phakathi kwezintaba zakoEfrayimi, wazithathela omunye umfazi eBetlehema koJuda.

2Lowomfazi wamthukuthelela, wasuka wabuyela emzini kayise eBetlehema koJuda, wahlala khona inyanga ezine.

3Umkakhe wasuka wamlandela ukumncenga ukuba abuye. Wahamba lenceku yakhe labobabhemi ababili, wayafika emzini kayise. Umfazi wamngenisa endlini. Kwathi lapho uyise wentombi embona wamhlangabeza ngokuthokoza.

4Uyisezala wabalibazisa, bahlala khona insuku ezintathu, besidla benatha.

5Ngosuku lwesine bavuka ekuseni kakhulu, balungisela ukuhamba; kodwa uyise wentombi wathi kumkhwenyana wakhe: Ake lidle kuqala lingakahambi.

6Ngakho lawomadoda amabili ahlala adla anatha wonke. Uyise wentombi wasesithi kulowomuntu: Ake ulale khonapha lamhla uzithokozise.

7Lapho lowomuntu esesukuma ukuba ahambe, uyisezala wamncenga waze wabuya walala lapho futhi.

8Ngosuku lwesihlanu wavuka ekuseni kakhulu ukuba ahambe. Uyise wentombi wathi kuye: Akudle kuqala, uhlale ilanga lize likhothame. Basebesidla bobabili.

9Kwathi lapho lowomuntu lomunye umfazi wakhe lenceku yakhe sebesuka ukuba bahambe, uyisezala wathi kuye: Khangela, ilanga selitshona, sekuzakuhlwa; akuhlale lapha ubusuku bonke. Ilanga selitshonile, lala khonapha uthokoze, kusasa uzavuka ekuseni kakhulu, uhamba uye ekhaya.

10Kodwa kavumanga lowomuntu ukuhlala lobobusuku. Wasuka wahamba, wayafika maqondana leJebusi okutsho iJerusalema. Wayelabobabhemi ababili abathweleyo, lomunye umfazi wakhe.

11Sebebanga eJebusi ilanga laselitshonile, inceku yasisithi enkosini yayo: Asiphambuke singene emzini lo wamaJebusi, silale khona.

12Inkosi yathi kuyo: Kasiyikuphambukela emzini wabezizwe abantu abangesibo abakoIsrayeli, kodwa sizadlulela eGibeya.

13Woza sidlulele phambili, siyelala eGibeya kumbe eRama.

14Basebesedlula behamba; ilanga labatshonela sebebanga eGibeya elakoBenjamini.

15Basebephambuka ukuba bayelala eGibeya. UmLevi wangena wahlala phansi emdangeni womuzi, kodwa kwakungekho muntu owabangenisa endlini yakhe ukuba balale khona.

16Kwafika ixhegu kusihlwa livela emsebenzini walo ensimini. Leloxhegu lalingelezintabeni zakoEfrayimi lihlala eGibeya. Abantu baleyondawo babe ngabakoBenjamini.

17Lakhangela labona lesisihambi emdangeni womuzi, lathi: Uya ngaphi? Uvelaphi?

18Yena wathi kulo: Siyedlula sivela eBetlehema koJuda, siya phakathi kwezintaba zakoEfrayimi, lapho ngivela khona. Bengiye eBetlehema koJuda, sengibuyela ekhaya; kakulamuntu ongingenisa endlini yakhe.

19Silotshani lokudla kwabobabhemi bethu, silokudla kwami lewayini, lokomfazi wami lokwenceku yami; kasiswelanga lutho.

20Leloxhegu laselisithi: Ukuthula kakube kuwe. Ngizalidingela konke elikuswelayo. Kuphela nje lingalali emdangeni.

21Ngakhoke laselibasa endlini yalo, lanika obabhemi ukudla. Bageza inyawo zabo, badla banatha.

22Besathokoza kwasekufika abantu bomuzi, abantu ababi, bayizingelezela indlu, batshaya isivalo besithi kuleloxhegu elingumnikazindlu: Khupha lowomuntu ongene endlini yakho ukuze simenze umfazi.

23Umnikazindlu waphuma waya kibo, wathi: Atshi, bafowethu, lingenzi okubi kangaka; lokhu lumuntu uyisethekeli sami, lingenzi linto embi.

24Khangelani, nansi indodakazi yami eyintombi. Kahleni ngiyikhuphe. Liyidlove, lizenzele elikuthandayo kiyo; kodwa kulumuntu lingayenzi linto embi.

25Kodwa labobantu kabalilalelanga ixhegu. Ngakho lowomLevi wasebamba omunye umfazi wakhe, wamkhuphela kibo. Bamdlova ubusuku bonke kwaze kwasa. Kwathi emadabukakusa bamyekela bahamba.

26Ekuphumeni kwelanga owesifazana weza wawela phansi emnyango wendlu yaleloxhegu lapho kwakukhona umkakhe, wahlala khona kwaze kwakhanya.

27Umkakhe wavuka ekuseni, wavula iminyango yendlu, waphuma ukuba ahambe, wabona omunye umfazi bakhe elele emnyango wendlu, izandla zakhe zisembundwini womnyango.

28Wathi kuye: Vuka, sihambe. Kodwa kakubanga lampendulo. Wasemkhweza ubabhemi, wasuka wahamba, waya ekhaya.

29Lapho esefikile ekhaya wathatha ingqamu, wambamba wamqumaquma iziqa ezilitshumi lambili; wazithumela kulo lonke ilizwe lakoIsrayeli.

30Watshela labobantu ayebathume lazo ukuba bathi kubo bonke abakoIsrayeli: Kwake kwenzeka okunje ingabe kwake kwabonwa kusukela esikhathini uIsrayeli aphuma ngaso eGibithe kuze kube lamhla na? Cabangani phakathi kwenu, likhulumisane. Ngakho bonke abazibonayo bathi: Kakuzanga kwenzeke okunje loba kubonwe ngaphambili.