1Umfana uSamuweli wayesebenzela iNkosi ngaphansi kukaEli. Ilizwi leNkosi lalingandanga ngalezonsuku, lombono ungekho.
2Ngalesosikhathi uEli wayelele endaweni yakhe lamehlo akhe ayesaqala ukufiphala engasaboni kuhle;
3isibane sikaNkulunkulu sasingakacinywa, uSamuweli wayelele ethempelini leNkosi, lapho kwakukhona umtshokotsho wesivumelwano sikaNkulunkulu.
4INkosi yammemeza, yathi: Samuweli, Samuweli! Yena wathi: Ngilapha.
5Wagijimela kuEli, wathi: Sengifikile, ngoba ungibizile. Yena wathi: Angikubizanga; buyela ulale. Wasehamba, walala.
6INkosi yabuya yamemeza futhi, yathi: Samuweli! USamuweli wavuka, waya kuEli, wathi: Sengifikile, ngoba ungibizile. Kodwa yena wathi: Angikubizanga, mntanami; buyela ulale futhi.
7USamuweli wayengakayazi iNkosi, lelizwi leNkosi wayengakalambulelwa.
8INkosi yambiza futhi uSamuweli ngokwesithathu. Wavuka waya kuEli wathi: Sengifikile, ngoba sibili ungibizile. UEli wasebona ukuthi iNkosi iyambiza umfana.
9Ngakho uEli wasesithi kuSamuweli: Hamba uyelala: lapho ubizwa futhi uzakuthi: Khuluma Nkosi, ngoba inceku yakho iyezwa. Wasehamba uSamuweli, wayalala endaweni yakhe.
10INkosi yafika, yema, yamemeza njengakwezinye izikhathi, yathi: Samuweli, Samuweli! Yena wathi: Khuluma, ngoba inceku yakho iyezwa.
11INkosi yathi kuSamuweli: Khangela, sengizakwenza into koIsrayeli ezabanda indlebe zombili zalabo abayizwayo.
12Ngalolosuku ngizakwenza kuEli konke engakukhuluma ngendlu yakhe, kusukela ekuqaleni kuze kufike ekucineni.
13Umtshele ukuthi sengizakuyijezisa indlu yakhe kokuphela, ngoba kwathi esazi ukuthi amadodana akhe ayehlambaza uNkulunkulu, kawakhuzanga.
14Ngakhoke ngiyafunga kuyo indlu kaEli ukuthi ububi bayo kabuyikuhlanjululwa ngomhlatshelo langomnikelo kuze kube nini lanini.
15USamuweli walala kwaze kwasa; wasevula iminyango yendlu yeNkosi, kodwa wesaba ukumtshela uEli ngombono.
16UEli wambiza uSamuweli, wathi: Samuweli, mntanami. Yena wathi: Ngilapha.
17UEli wathi: INkosi itheni kuwe na? Ungangifihleli; uNkulunkulu akuhlanekele ngokwengezelelweyo, uba ungifihlela konke akutshele khona.
18Ngakho uSamuweli wasemtshela konke, kazamfihlela lutho. Yena wathi: YiNkosi, kayenze lokho ekubona kulungile kuyo.
19Wakhulake uSamuweli; iNkosi yayilaye, kakuwelanga phansi lelilodwa ilizwi lakhe.
20Wonke uIsrayeli kusukela koDani kuze kube seBerisheba wazi ukuba uSamuweli umisiwe ukuba abe ngumprofethi weNkosi.
21INkosi yayilokhu ibonakala eShilo, ngoba iNkosi yazibonakalisa kuSamuweli eShilo ngelizwi layo.
Who We AreWhat We EelieveWhat We Do
2025 by iamachristian.org,Inc All rights reserved.
