Zaga 11 - Ndebele Bible (iBhayibhili Elingcwele) 1978

1Isilinganiso esikhohlisayo siyisinengiso eNkosini,

kodwa isilinganiso esilungileyo siyayithabisa.

2Nxa kufika ukuzigqaja, kufika lokudelela;

kodwa kwabathobekileyo kukhona ukuhlakanipha.

3Ubuqotho buyabaqondisa abaqotho,

kodwa ububi buyababhubhisa ababi.

4Inotho kayisizi ngosuku lolaka,

kodwa ukulunga kukhulula ekufeni.

5Ukulunga kuqondisa indlela yolungileyo,

kodwa omubi uwiswa yibubi bakhe.

6Ubuqotho bukhulula abaqotho,

kodwa ababi babanjwa zinkanuko zabo.

7Nxa umuntu omubi esifa, ithemba lakhe liyaphela,

lethemba labangamesabiyo uNkulunkulu liyabhubha.

8Olungileyo ukhululwa ekuhluphekeni,

kodwa omubi ungena kukho.

9Ngomlomo wakhe umuntu ongamesabiyo uNkulunkulu angamchitha umakhelwana wakhe,

kodwa ngokwazi abalungileyo bayakhululwa.

10Nxa abalungileyo bephumelela, umuzi uyathokoza;

lapho ababi bebhubha, kukhona ukujabula.

11Ngokubusiswa kwabaqotho umuzi uyadunyiswa,

kodwa ngamazwi ababi uyachitheka.

12Odelela umakhelwana wakhe kalangqondo,

kodwa oqedisisayo uyazithulela.

13Onyeyayo uyahlakaza imfihlakalo,

kodwa othembekileyo kambuli izindaba.

14Lapho kungekho izeluleko, abantu bayachitheka;

kodwa lapho kukhona abeluleki abanengi, kukhona ukuvikeleka.

15Okhuphela owezizwe isibambiso uzahlupheka;

kodwa ozonda ukunika isibambiso uvikelekile.

16Owesifazana olomusa uzuza udumo,

amadoda akhutheleyo azuza inotho.

17Umuntu olomusa uzenzela okuhle,

kodwa umuntu olesihluku uyazilimaza.

18Omubi uzuza umvuzo oyinkohliso,

kodwa ohlanyela ukulunga uzazuza umvuzo weqiniso.

19Olandela ukulunga uzakuphila,

kodwa olandela ububi uzakufa.

20Abantu abalengqondo ezimbi bayazondwa yiNkosi.

kodwa labo abalendlela ezilungileyo bayintokozo kuyo.

21Impela omubi kayikuyekelwa,

kodwa abalungileyo bazakhululwa.

22Njengesongo legolide empumulweni yengulube,

unjalo owesifazana obukekayo ongelangqondo.

23Izifiso zabalungileyo zizaveza okuhle,

kodwa lokho abakufisayo ababi kuzaveza okulize.

24Umuntu angaphana, kanti anothe kakhulu;

omunye angancitshana kakhulu, kanti uzakuswela.

25Ophanayo uzakunotha,

losizayo uzasizwa.

26Ogodla amabele elindele ukukhwela kwentengo uzaqalekiswa ngabantu,

kodwa obathengiselayo ngesikhathi sokuswela kwabo bazambusisa.

27Odingisisa okuhle uthola umusa,

kodwa okubi kwehlela okudingayo.

28Othemba inotho yakhe uzawohloka njengamahlamvu ebusika,

kodwa olungileyo uzahluma njengamahlamvu ehlobo.

29Oletha inkathazo emzini wakhe uzakudla ilifa eliyize,

lesithutha sizakuba yinceku yohlakaniphileyo.

30Izithelo zokulunga zinjengesihlahla esiletha ukuphila,

kodwa isihluku sichitha ukuphila.

31Uba olungileyo ezuza umvuzo wakhe emhlabeni,

kakhulu kangakanani omubi lesoni!