Hubo 76 - Ndebele Bible (iBhayibhili Elingcwele) 1978

UNkulunkulu onqobayo lowahlulelayo

1UNkulunkulu uyaziwa koJuda,

lebizo lakhe likhulu koIsrayeli.

2Umisile ithente lakhe eSalema,

lendlu yakhe eZiyone.

3Lapho waphula imitshoko,

lezihlangu, lemikhonto, lezikhali zempi.

4Uyakhazimula, Nkosi, umkhulu ngobukhosi

ukwedlula izintaba ezingelakuphela.

5Baphangiwe abalesibindi, balele ubuthongo;

wonke amadoda empi ahlulekile ukusebenzisa izandla zawo.

6Ekubakhalimeni kwakho, Nkulunkulu kaJakobe,

ibhiza kanye lomkhweli walo kwawela phansi, kwaqaleka.

7Wena, yebo wena, uyesabeka.

Ngubani ongema phambi kwakho lapho usuthukuthela na?

8Wahlulela usezulwini;

umhlaba wesaba wathula,

9mhla uNkulunkulu evuka ukuba amise ukwahlulela,

akhulule bonke abacindezelweyo emhlabeni.

10Ulaka lwabantu luzakwandisa udumo lwakho;

uzalugqoka.

11Yenzani izifungo zenu eNkosini uNkulunkulu wenu, libuye lizigcwalise.

Bonke abamphahlileyo kabalethe izipho kuye owesabekayo,

12yena othobayo ukuzigqaja kwezikhulu,

owesabekayo emakhosini omhlaba.