Hez 20 - Ndebele Bible (iBhayibhili Elingcwele) 1978

Ukuhlamuka kukaIsrayeli uNkulunkulu

1Kwathi ngomnyaka wesikhombisa, ngosuku lwetshumi enyangeni yesihlanu, abadala abathile bakoIsrayeli beza ukubuza eNkosini, bahlala phambi kwami.

2Ilizwi leNkosi lafika kimi lathi:

3Ndoda, khuluma kwabadala bakoIsrayeli, uthi kibo: INkosi uNkulunkulu ithi: Kambe lizile ukubuza kimi na? Ngiyazifunga, kutsho iNkosi uNkulunkulu, kangiyikubuzwa yini.

4Uzabathonisisa, ndoda, uzabathonisisa na? Ngakho batshele amanyala abokhokho babo,

5uthi kibo: INkosi uNkulunkulu ithi: Ngosuku engakhetha ngalo abakoIsrayeli, ngafunga kuyo inzalo kaJakobe, ngazibonakalisa kibo elizweni laseGibithe, ngafunga kibo ngathi: Mina ngiyiNkosi uNkulunkulu wenu.Eks 6:2–8

6Ngalolosuku ngafunga kibo ukuba ngibakhuphe elizweni laseGibithe, ngibese elizweni engabadingela lona, ilizwe eligcwele uchago lenyosi, ilizwe elihle kulawo wonke amazwe.

7Ngathi kibo: Lahlani izinto ezenyanyekayo elizibukayo lina lonke, lingazigcolisi ngezithombe zaseGibithe. NgiyiNkosi uNkulunkulu wenu.

8Kodwa bangihlamuka, kabaze bangilalela. Bonke kabazilahlanga izinto ezenyanyekayo ababezibuka, kabazitshiyanga lezithombe zaseGibithe. Ngasengisithi ngizakwehlisa ukuthukuthela kwami phezu kwabo, ngibaqede ngolaka lwami phakathi kwelizwe laseGibithe.

9Kodwa kangikwenzanga ngenxa yebizo lami ukuba lingangcoliswa phambi kwezizwe ababehlala phakathi kwazo, engaziveza kibo phambi kwazo ukuba ngibakhuphe eGibithe.

10Ngakhoke ngabakhupha elizweni laseGibithe, ngabesa enkangala.

11Ngabanika izimiso zami, ngabatshengisa lemithetho yami, umuntu azaphila ngayo uba eyenza.Levi 18:5

12Futhi ngabanika amaSabatha ami ukuba abe yisibonakaliso phakathi kwami labo, ukuba bazi ukuthi mina Nkosi ngiyabenza babe ngcwele.Eks 31:13–17

13Kodwa abakoIsrayeli bangihlamuka enkangala, kabahambanga ngezimiso zami, bala imithetho yami, umuntu azaphila ngayo uba eyenza, lamaSabatha ami bawangcolisa kakhulu. Ngasengisithi ngizakwehlisela ukuthukuthela kwami phezu kwabo enkangala, ngibaqede nya.Levi 18:5

14Kodwa kangikwenzanga ngenxa yebizo lami ukuba lingangcoliswa phambi kwezizwe engabakhupha phambi kwazo.

15Futhi ngafunga kibo enkangala ukuba kangiyikubaletha elizweni engangilinike bona, ilizwe eligcwele uchago lenyosi, ilizwe elihle kulawo wonke amazwe,Nani 14:26–35

16ngoba bala imithetho yami, kabahambanga ngezimiso zami, bangcolisa amaSabatha ami, ngoba inhliziyo zabo zathanda izithombe zabo.

17Kanti ngabahawukela, kangibabhubhisanga ngabaqeda nya enkangala.

18Ngatsho kubantwana babo enkangala ngathi: Lingahambi ngezimiso zaboyihlo, lingagcini imithetho yabo, lingazingcolisi ngezithombe zabo.

19Mina Nkosi nginguNkulunkulu wenu. Hambani ngezimiso zami, liqaphelise ukugcina imithetho yami,

20lihloniphe amaSabatha ami ukuba abe yisibonakaliso phakathi kwami lani, ukuba lazi ukuthi ngiyiNkosi uNkulunkulu wenu.

21Kodwa labantwana bangihlamuka, kabaze bahamba ngezimiso zami, kabaqaphelisanga ukugcina imithetho yami, umuntu azaphila ngayo uba eyenza; bawangcolisa amaSabatha ami. Ngasengisithi ngizakwehlisela ukuthukuthela kwami phezu kwabo, ngibaqede ngolaka lwami enkangala.

22Kodwa ngazinqanda ngenxa yebizo lami, ukuba lingangcoliswa phambi kwezizwe engangibakhuphe phambi kwazo.

23Ngafunga kibo futhi enkangala ukuthi ngizabachithachitha phakathi kwezizwe, ngibahlakazele emazweni wonke,Levi 26:33

24ngoba bengayenzanga imithetho yami, bezalile izimiso zami, bangcolisa amaSabatha ami, bathanda ukukhonza izithombe zokhokho babo.

25Futhi ngabanika izimiso ezazingalunganga lemithetho ababengeke baphile ngayo;

26ngabayekela ukuba bazingcolise ngeminikelo yabo uqobo, lokuba banikele ngamazibulo abo wonke ngokuwatshisa ngomlilo ukuze ngibesabise. Ngakwenza lokho ukuba bazi ukuba ngiyiNkosi.

27Ngalokho, ndoda, khuluma labakoIsrayeli, uthi kibo: INkosi uNkulunkulu ithi: Lakulokho futhi okhokho benu bangihlambaza ngokungikhohlisa.

28Ngoba ngathi sengibalethile elizweni engangifunge ukubanika lona, kwathi lapho bebona intaba eziphakemeyo lezihlahla ezilamahlamvu amanengi, banikela imihlatshelo yabo lapho, kanye leminikelo eyangithukuthelisayo: banikela lapho iminikelo elephunga elihle, leminikelo yokuthululwa.

29Ngathi kibo: Iyini indawo ephakemeyo yokukhonzela eliya kiyo na? Ngakho ibizo layo lithiwa yiNdawo ephakemeyo yokukhonzela kuze kube lamuhla.

30Ngalokhoke tshono kwabakoIsrayeli uthi: INkosi uNkulunkulu ithi: Lisazingcolisa njengokhokho benu, lilandele izinto zabo ezenyanyekayo na?

31Lapho linikela iminikelo yenu, linikela abantwana benu ngokubatshisa ngomlilo, liyazingcolisa ngezithombe zenu zonke kuze kube lamhla. Ngizabuzwa yini, Israyeli na? Ngiyazifunga, kutsho iNkosi uNkulunkulu, kangiyikubuzwa yini.

32Umcabango elilawo kawuyikwenzeka othi: Asifane lezizwe, labantu bamanye amazwe abakhonza isigodo lelitshe.

33Ngiyazifunga, kutsho iNkosi uNkulunkulu, impela ngizalibusa ngesandla esilamandla lengalo eqinileyo langolaka lwami;

34ngilikhuphe phakathi kwezizwe, ngiliqoqe lasemazweni lapho lichithachithelwe khona ngesandla esilamandla langengalo eqinileyo langolaka lwami,

35ngililethe enkangala yezizwe, ngilithonisise lapho sikhangelene ubuso lobuso.

36Njengalokhu ngabathonisisa labokhokho benu enkangala yelizwe laseGibithe, ngokunjalo ngizalithonisisa lani, kutsho iNkosi uNkulunkulu.

37Ngizalidlulisa ngaphansi kwentonga, ngilingenise esivumelwaneni,

38ngikhuphe phakathi kwenu abahlamukayo labo bonke abonayo kimi, ngibakhuphe elizweni abahlala kilo, kodwa kabayikungena elizweni lakoIsrayeli. Ng’khona lizakwazi ukuba ngiyiNkosi.

39Linake, Israyeli, kutsho iNkosi uNkulunkulu, hambani lonke liyekhonza izithombe zenu! Kodwa ngithi lizangilalela ekucineni; lizayekela ukungcolisa ibizo lami elingcwele ngeminikelo yenu langezithombe zenu.

40Ngoba entabeni engcwele, entabeni ende yakoIsrayeli, kutsho iNkosi uNkulunkulu, lapho bonke abakoIsrayeli, bonke ngoluthi lwabo, bazangikhonza elizweni; ngizabamukela khona, ngibize khona iminikelo yenu, leziphiwo zenu ezinhle, lakho konke okungcwele kwenu.

41Ngizalamukela njengephunga elimnandi nxa ngilikhupha ezizweni, ngiliqoqa emazweni lapho belichithachithelwe khona; ngizabonakalisa ubungcwele bami phakathi kwenu phambi kwezizwe.

42Lizakwazi ukuba ngiyiNkosi lapho sengilibuyise elizweni lakoIsrayeli, ilizwe engafunga ukulinika okhokho benu.

43Laphoke lizakhumbula indlela zenu lezenzo zenu zonke elazingcolisa ngazo; lizazizonda ngenxa yazo zonke izinto ezimbi elazenzayo.

44Lizakwazi ukuba ngiyiNkosi nxa ngiliphatha ngenxa yebizo lami, ngingaliphathi ngokwendlela zenu ezimbi langokwezenzo zenu ezimbi, lina bakoIsrayeli, kutsho iNkosi uNkulunkulu.

Ilizwi leNkosi ngeningizimu

45Ilizwi leNkosi lafika kimi lathi:

46Ndoda, khangelisa ubuso bakho ngaseningizimu, utshumayele ngeningizimu, utshumayele ngelizwe lamagusu eliseNegebi.

47Uthi kilo igusu laseNegebi: Zwana ilizwi leNkosi. INkosi uNkulunkulu ithi: Ngizaphemba umlilo phakathi kwakho ozatshisa zonke izihlahla eziluhlaza ezikuwe lezihlahla ezomileyo; ilangabi elivuthayo kaliyikucimeka, lizatshisa konke kusukela eningizimu kuze kufike enyakatho.

48Bonke abantu bazabona ukuthi mina Nkosi ngiwuphembile, kawuyikucimeka.

49Ngasengisithi: Hawu, Nkosi Nkulunkulu! sebesithi ngami: Yena kasumqambi wemifanekiso na?