Josh 18 - Ndebele Bible (iBhayibhili Elingcwele) 1978

Ukwabiwa kwelizwe eShilo

1Ibandla lonke lakoIsrayeli labuthana eShilo, lamisa khona ithente lokuhlangana. Ilizwe laselinqotshiwe.

2Kwasekusele phakathi kwabakoIsrayeli izizwe eziyisikhombisa ezazingakabelwa amazwe azo.

3UJoshuwa wasesithi kwabakoIsrayeli: Lizadonda kuze kube nini ukuyathatha ilizwe iNkosi, uNkulunkulu wabokhokho benu, elinike lona?

4Khethani amadoda amathathu kuleso lalesosizwe; ngizawathuma ukuba ahambe adabule lonke ilizwe, alihlole ukuze labiwe, abuye azengitshela.

5Azalahlukanisa libe yizabelo eziyisikhombisa; uJuda uzahlala endaweni yakhe ngaseningizimu, labakoJosefa bahlale endaweni yabo ngasenyakatho.

6Lizaloba ilizwe ngezigaba eziyisikhombisa, beseliletha kimi elikulobileyo, ukuba ngilenzele inkatho khona lapha phambi kweNkosi uNkulunkulu wenu.

7AbakoLevi kabalasabelo phakathi kwenu, ngoba ubupristi beNkosi buyisabelo sabo. AbakoGadi labakoRubeni lengxenye yesizwe sabakoManase sebelabelwe ilizwe labo ngaphetsheya kweJordani kusiya empumalanga, uMose inceku yeNkosi eyabanika lona.

8Asehambake amadoda. UJoshuwa wathi kulabo abahambayo ukuhlola ilizwe: Dabulani ilizwe lilihlole, libuye kimi; mina ngizalenzela inkatho khonapha phambi kweNkosi eShilo.

9Ngakho lawomadoda adabula ilizwe, aloba ogwalweni lokho akubonileyo ngemizi ngemizi ezigabeni eziyisikhombisa; asebuya kuJoshuwa ezihonqweni eShilo.

10UJoshuwa wasebenzela inkatho eShilo phambi kweNkosi, wababela abakoIsrayeli ilizwe, kwaba yilowo lalowo isabelo sakhe.

Ilizwe elanikwa isizwe sakoBenjamini

11Inkatho yadla isizwe sakoBenjamini ngosendo lwaso, sanikwa ilizwe eliphakathi kwesizwe sakoJuda lesakoJosefa.

12Ngasenyakatho umngcele wabo waqalisa eJordani, wakhwela iwatha ngasenyakatho kweJeriko, wasukhwela udabula ezintabeni waqonda entshonalanga, waphelela enkangala yaseBeti‐Aveni.

13Wasuka lapho waqonda eningizimu usiya eLuzi, wafika ewatheni laseLuzi, lona liyiBetheli, wehla waqonda eAtarothi‐Adari, waya entabeni engaseningizimu kweBeti‐Horoni elingaphansi;

14wawusuqonda kwenye indawo, waphenduka ngasentshonalanga waqonda eningizimu maqondana leBeti‐Horoni, waphelela eKiriyathi‐Bali, okutsho iKiriyathi‐Jeyarimi, umuzi wesizwe sakoJuda. Lo ngumhlubulo wentshonalanga.

15Umhlubulo waseningizimu waqalisa emaphethelweni eKiriyathi‐Jeyarimi; umngcele wasuka lapho wayafika emthonjeni wamanzi aseNefitowa,

16wasusehla uqonda emaphethelweni entaba ekhangele isihotsha saseBeni‐Hinomu ngasenyakatho kwesihotsha saseRefayimi, wasusehla isihotsha saseHinomu ngaseningizimu kwewatha lamaJebusi, wehlela eEni‐Rogeli;

17wasuphendukela enyakatho usiya eEni‐Shemeshi, wadlulela eGelilothi elimaqondana lomqanso waseAdumimi, wehlela elitsheni likaBohani indodana kaRubeni,

18wadlulela enyakatho kwewatha laseBeti‐Araba, wehlela eAraba,

19wasudlulela enyakatho kwewatha laseBeti‐Hogila, waphelela ngasenyakatho koLwandle lweTshwayi, ekupheleni kweJordani ngaseningizimu. Lo wawungumngcele waseningizimu.

20IJordani lingumngcele walo ngasempumalanga. Leyo yimingcele yesizwe sakoBenjamini ngosendo lwaso.

21Imizi yesizwe sakoBenjamini ngosendo lwaso yayiyile; iJeriko leBeti‐Hogila leEmeki‐Kezizi

22leBeti‐Araba leZemarayimi leBetheli

23leAvimi lePara leOfira

24leKefari‐Amoni leOfini leGeba; iyonke ilitshumi lambili lemizana yayo.

25Kukhona leGibeyoni leRama leBeyerothi

26leMizipe leKefira leMoza

27leRekemi leIripeli leTarala

28leZela leHayelefi leJebusi, okutsho iJerusalema, leGibeya leKiriyathi‐Jeyarimi; iyonke ilitshumi lane lemizana yayo. Leli liyilizwe lesizwe sakoBenjamini ngosendo lwaso.