Jobe 35 - Ndebele Bible (iBhayibhili Elingcwele) 1978

1Wasesithi uElihu:

2Uzaqhubeka ngokuqinisa ukuthi uqondile, wena Jobe,

uqhubeke ngokubambelela ekutheni kawulacala phambi kukaNkulunkulu

3uze uthi: Kungangisizani na?

Ngingazuza okungakanani ngokona na?

4Ngizakukuphendula wena kanye labangane bakho.

5Khangela iphezulu ubone,

ukhangele amayezi angaphezu kwakho.

6Uba wonile, wenzani kuye na?

Uba iziphambeko zakho zizinengi, wenzani kuye na?

7Uba ulungile, umnikani wena na?

Wamukelani esandleni sakho na?

8Ububi bakho buqondana lomuntu onjengawe,

lokulunga kwakho kuthinta umuntu nje.

9Abantu bayakhala ngenxa yobunzima bokucindezelwa;

bacele ukusizwa ngenxa yezandla zabalamandla.

10Kodwa kakho othi: Ungaphi uNkulunkulu uMenzi wami,

owenza amahubo okuthokoza azwakale ebusuku,

11osinika ukwazi okwedlula okwenyamazana zomhlaba,

asiphe ukuhlakanipha okwedlula okwenyoni zaphezulu na?

12Ngakho lapho bekhala, kaphenduli,

ngoba bezigqaja, bebabi.

13Impela uNkulunkulu kakuzwa ukukhala okuyize,

loSomandla kakunanzi.

14Kuzakuba kubi kuwe uba usithi: UNkulunkulu kangiboni.

Uzithobe phambi kwakhe, ulindele ilizwi lakhe,

15Phoke, ngoba uNkulunkulu engathukutheli, atshaye,

ngoba eyekela ububi bedlule engabunanzi,

16uJobe uyakhuluma ize nje,

akhulume amazwi amanengi engelakwazi.