Isa 59 - Ndebele Bible (iBhayibhili Elingcwele) 1978

Izono zabakoIsrayeli

1Isandla seNkosi kasifinyezwanga ukuze singasizi,

lendlebe yayo kayibuthundu ukuze ingezwa.

2Kodwa ububi benu bulahlukanisile loNkulunkulu,

lezono zenu zibusithile ubuso bakhe ukuze angezwa.

3Ngoba izandla zenu zingcoliswe ligazi,

leminwe yenu ingcoliswe yibubi,

lomlomo wenu uqambe amanga,

lolimi lwenu lukhuluma ububi.

4Kakho omangala ngendlela eqondileyo,

kakho oya emthethweni ngendlela eqotho.

Bathemba okuyize, bakhulume amanga,

bamitha kubi, bazale ububi.

5Bachamusela amaqanda ebululu,

beluke ubulembu;

odlayo emaqanda alo uyafa,

kuthi kulo elichamuselweyo kuphume ibululu.

6Ubulembu babo kabuyikuba yizingubo,

labantu kabayikwambatha lokho abakwenzileyo.

Imisebenzi yabo ibanga ububi,

lezandla zabo zenza isihluku.

7Balamawala okwenza okubi,

baphangisa ukuchitha igazi elingelacala;

amacebo abo ngamacebo obubi,

lezindlela zabo zigcwele ukuchitheka lokubhubhisa.

8Kabayazi indlela yokuthula,

lezindlela zabo kazilakho ukulunga;

benze imigwaqo yabo yaba ngamazombezombe,

kakho ohamba ngayo owaziyo ukuthula.

AbakoIsrayeli bavuma izono zabo

9Ngalokhoke okufaneleyo kukhatshana lathi,

lokulunga kakufinyeleli kithi.

Sidinga ukukhanya, kodwa sifumana umnyama,

sidinge imini, kodwa sihambe emnyameni.

10Siphuthaza umduli njengesiphofu,

siphuthaze njengalabo abangelamehlo;

sikhubeke emini kungathi kukusihlwa,

sinjengabafileyo elizweni labafileyo.

11Siyabhonga njengamabhere,

sikhale njengamajuba;

Sidinga ukulunga, kodwa singakufumani,

sidinge ukukhululwa, kodwa kukhatshana lathi.

12Ngoba sonile kuwe kanenginengi,

lezono zethu zifakaze ngathi;

ngoba siyazikhumbula zonke iziphambeko zethu,

lobubi bethu siyabazi;

13siyaphambeka, siyiphike iNkosi,

simhlamuke uNkulunkulu wethu,

sikhulume ngokucindezela langokuhlamuka,

sicabange ngamanga enhliziyweni zethu siwakhulume.

14Okufaneleyo kubuyiselwa emuva,

lokulunga kumi khatshana;

ngoba iqiniso liyawa ezigcawini,

lobuqotho kabulandawo.

15Iqiniso kalikho,

lowahlukana lobubi uzenza impango.

INkosi yabona lokho,

kwaba kubi kuyo ukuthi ukulunga kakukho.

16Yabona ukuthi kwakungekho muntu osizayo,

yamangala ukuthi kwakungekho muntu olamulayo;

yasinqoba ngamandla ayo,

lokulunga kwayo kwayisekela.

17Yambatha ukulunga njengesivikelo sesifuba,

yathwala ingowane yokunqoba ekhanda layo;

yagqoka ingubo zokuphindisela,

yazigoqela ngentukuthelo njengengubo.

18Izakuphindisela njengokwenza kwabo,

yehlisela ulaka ezitheni zayo, impindiselo kwabamelana layo;

izakuphindisela lakuwo amazwe angasolwandle.

19Bazakulesaba ibizo leNkosi entshonalanga,

besabe ubukhulu bayo empumalanga;

ngoba izakufika njengomfula okhukhulayo,

ofuqwa ngumoya weNkosi.

20Izakufika eZiyone inguMhlengi,

lakulabo abakoJakobe abatshiya iziphambeko zabo,

kutsho iNkosi.

21Minake, lokhu kuyisivumelwano sami labo, itsho iNkosi, sokuthi umoya wami engikunike wona, lamazwi ami engiwafake emlonyeni wakho kawayikusuka emlonyeni wakho, lasemlonyeni wabantwana bakho, lasemlonyeni wabantwana babantwana bakho, kusukela kulesisikhathi kuze kube nininini.