Josh 6 - Ndebele Bible (iBhayibhili Elingcwele) 1978

Ukuchithwa kweJeriko

1IJeriko lalivaliwe lanxitshwa ngenxa yabakoIsrayeli, kungaphumi muntu, kungangeni muntu.

2INkosi yasisithi kuJoshuwa: Khangela, nginikele ezandleni zakho iJeriko kanye lenkosi yalo.

3Lizawubhoda umuzi, wonke amadoda empi awubhode kanye. Lizakwenza njalo okwensuku eziyisithupha.

4Abapristi abayisikhombisa bazaphatha impondo zenqama eziyisikhombisa, bahambe phambi komtshokotsho wesivumelwano; kuthi ngosuku lwesikhombisa liwubhode umuzi kasikhombisa, abapristi bekhalisa impondo.

5Lapho bekhalisa kakhulu impondo zenqama, lingawezwa amazwi azo, abantu kabamemeze kakhulu, umduli womuzi uzadilikela phansi; abantu bazangena, kube yilowo lalowo aqonde phambili nje.

6Ngakho uJoshuwa indodana kaNuni wabiza abapristi wathi kibo: Thwalani umtshokotsho wesivumelwano, kuthi abapristi abayisikhombisa bahambe phambi komtshokotsho weNkosi bephethe impondo zenqama eziyisikhombisa.

7Wasesithi ebantwini: Hambanike liwuzingelezele umuzi, lamadoda ahlomileyo ahambe phambi komtshokotsho weNkosi.

8Njengokutsho kukaJoshuwa ebantwini, abapristi abayisikhombisa bephethe impondo zenqama phambi kweNkosi bahamba bezikhalisa, belandelwa ngumtshokotsho wesivumelwano seNkosi.

9Amadoda ahlomileyo ahamba phambi kwabapristi ababekhalisa impondo, lesigaba sasemuva salandela umtshokotsho, lezimpondo zikhala njalonjalo.

10Kodwa uJoshuwa wathi ebantwini: Lingamemezi, loba lizwakalise ilizwi lenu; kungaphumi lizwi emilonyeni yenu kuze kube lusuku engizalitshela ngalo ukuba limemeze; beselimemezake.

11Wasesithi umtshokotsho weNkosi kawubhode umuzi, wahamba kanye; basebebuyela ezihonqweni, balala khona.

12UJoshuwa wasevuka ekuseni kakhulu, labapristi bathwala umtshokotsho weNkosi.

13Abapristi abayisikhombisa bephethe impondo zenqama eziyisikhombisa phambi komtshokotsho weNkosi bahamba njalo bekhalisa impondo, lamadoda ahlomileyo ehamba phambi kwabo, lesigaba sasemuva salandela umtshokotsho weNkosi, lempondo zikhala njalonjalo.

14Ngosuku lwesibili bawuzingelezela umuzi kanye, babuyela ezihonqweni. Benza njalo insuku eziyisithupha.

15Ngosuku lwesikhombisa bavuka ekuseni kakhulu emadabukakusa, bawubhoda umuzi kasikhombisa ngendlela efananayo. Kwaba ngalolosuku kuphela abawubhodayo umuzi kasikhombisa.

16Ngesikhathi sesikhombisa, nxa abapristi sebekhalisile impondo, uJoshuwa wathi ebantwini: Memezani, ngoba iNkosi ilinikile umuzi.

17Umuzi lakho konke okukuwo kunikwe iNkosi ukuba kubhujiswe; nguRahabi iwule kuphela labo bonke alabo endlini yakhe abazasila, ngoba wafihla izithunywa esazithumayo.

18Kodwa lina lingathathi izinto ezinikelwe ukubhujiswa, funa kuthi lapho selizinikele lithathe izinto ezinikelweyo, lenze izihonqo zakoIsrayeli zibe yinto yokubhujiswa, lehlisele uhlupho phezu kwazo.

19Kodwa sonke isiliva legolide, lezitsha zethusi lezensimbi zingcwele eNkosini, kuzasiwa endlini yeNkosi yenotho.

20Ngakho abantu basebememeza, kwakhaliswa lempondo. Kwathi abantu besizwa ukukhala kwempondo bamemeza kakhulu, umduli wadilikela phansi, labantu bangena phakathi komuzi, yilowo lalowo eqonda phambili nje, bawuthumba umuzi.

27INkosi yayilaye uJoshuwa, lodumo lwakhe lwanda elizweni.