Josh 4 - Ndebele Bible (iBhayibhili Elingcwele) 1978

Amatshe alitshumi lambili athathwa eJordani abe yisikhumbuzo

1Lapho bonke abantu sebelichaphile iJordani, iNkosi yathi kuJoshuwa:

2Khetha amadoda alitshumi lambili ebantwini, indoda ibenye kuleso lalesosizwe,

3uwatshele uthi: Thathani amatshe alitshumi lambili phakathi kweJordani, kuyona leyondawo lapho bekumi khona abapristi, liwathwale likhuphuke lawo, liwabeke endaweni lapho lizamisa khona lamuhla.

4UJoshuwa wasebiza amadoda alitshumi lambili ebantwini bakoIsrayeli ayewakhethile, indoda yabanye kuleso lalesosizwe,

5wathi kuwo: Dlulani phambi komtshokotsho weNkosi uNkulunkulu wenu, lingene phakathi kweJordani, lowo lalowo wenu athathe ilitshe, aletshate ehlombe, ilitshe elilodwa limele isizwe sinye sakoIsrayeli,

6ukuba lokhu kube yisiboniso phakathi kwenu nxa abantwana benu belibuza ngesikhathi esizayo besithi: Lamatshe atshoni kini na?

7Lizabatshelake ukuba amanzi eJordani aqamuka phambi komtshotsho wesivumelwano seNkosi, lapho uchapha iJordani. Ngakho lamatshe azakuba yisikhumbuzo ebantwini bakoIsrayeli kokuphela.

8Amadoda akoIsrayeli enza njengokuwatshela kwakhe uJoshuwa, athatha amatshe alitshumi lambili phakathi kweJordani, alingana lobunengi bezizwe zakoIsrayeli, njengokutsho kweNkosi kuJoshuwa; akhuphuka lawo, awesa endaweni lapho babemise khona, awabeka khona.

9UJoshuwa wasemisa amatshe alitshumi lambili phakathi kweJordani endaweni lapho abapristi ababethwele umtshokotsho wesivumelwano babemi khona; asekhona lapho kuze kube lamuhla.

10Ngoba abapristi ababethwele umtshokotsho bema phakathi kweJordani kwaze kwaphela konke lokho iNkosi eyayimlaye khona uJoshuwa ukukutshela abantu, ngakho konke uMose ayekutshele uJoshuwa. Abantu bachapha masinyane.

11Kwathi bonke abantu sebechaphile, abapristi bachapha lomtshokotsho weNkosi, bahamba phambi kwabantu.

12AbakoRubeni labakoGadi lengxenye yesizwe sakoManase bachapha phambi kwabakoIsrayeli behlomile, njengokubalaya kukaMose;

13babeyizinkulungwane ezingamatshumi amane behlomele ukulwa, bachapha phambi kweNkosi ukuya ezigodini zeJeriko.

14Ngalolosuku iNkosi yamphakamisa uJoshuwa phambi kwabo bonke abakoIsrayeli, bamhlonipha njengalokhu babemhlonipha uMose insuku zonke zokuphila kwakhe.

15INkosi yasisithi kuJoshuwa:

16Tshela abapristi abathwala umtshokotsho wesivumelwano ukuba bakhuphuke eJordani.

17UJoshuwa wasebatshela abapristi esithi: Khuphukani eJordani.

18Kwathi lapho abapristi ababethwele umtshokotsho wesivumelwano seNkosi sebekhuphukile eJordani, sebemi emhlabathini owomileyo, amanzi eJordani abuyela endaweni yawo, afohla zonke inkumbi zawo njengakuqala.

19Abantu bachapha iJordani ngosuku lwetshumi lwenyanga yokuqala, bamisa eGiligali ngasempumalanga kweJeriko.

20Lawomatshe alitshumi lambili abawakupha eJordani uJoshuwa wawamisa eGiligali.

21Wathi kwabakoIsrayeli: Nxa abantwana benu belibuza ensukwini ezizayo ukuthi atshoni lamatshe,

22lizakubatshelake abantwana benu lithi: UIsrayeli walichapha leliJordani emhlabathini owomileyo.

23Ngoba iNkosi uNkulunkulu wenu yenza amanzi aseJordani atsha phambi kwenu laze lachapha, njengokwenza kwayo oLwandle oluBomvu eyalutshisa phambi kwethu saze sachapha,

24ukuze bonke abantu bomhlaba bazi ukuba iNkosi ilamandla, ukuba liyesabe iNkosi uNkulunkulu wenu kokuphela.