Hubo 48 - Ndebele Bible (iBhayibhili Elingcwele) 1978

IZiyone ingumuzi kaNkulunkulu

1Yinkulu iNkosi, ifanele ukudunyiswa kakhulu emzini

kaNkulunkulu wethu osentabeni yayo engcwele.

2Yinhle ngokuphakama intaba yaseZiyone;

iyikuthokoza kuwo wonke umhlaba;

umi ngasenyakatho umuzi weNkosi enkulu.

3Ezigodlweni zawo uNkulunkulu uyaziwa ukuthi uyinqaba eqinileyo.

4Ngoba, khangela, amakhosi abuthana,

aqhubeke kanyekanye;

5athi ukuba awubone, amangala,

atshaywa luvalo, aphaphatheka,

6ehlelwa lapho yikuthuthumela layibuhlungu,

njengowesifazana ohelelwayo.

7Ngoba ngomoya wasempumalanga wayiphahlaza imikolo emikhulu.

8Esikuzwileyo

sikubonile emzini weNkosi yamabandla,

emzini kaNkulunkulu wethu,

uNkulunkulu awumise kuze kube nininini.

9Sikhumbula uthando lwakho olungapheliyo, Nkulunkulu,

siphakathi kwethempeli lakho.

10Njengalo ibizo lakho, Nkulunkulu,

ukudunyiswa kwakho kufinyelela emikhawulweni yomhlaba;

isandla sakho sokunene sigcwele ukulunga.

11Kayithokoze intaba yaseZiyone,

lemizi yakoJuda ithabe ngenxa yezahlulelo zakho.

12Ibhodeni iZiyone,

libale imiphotshongo yayo,

13liqaphelise imithangala yayo,

lidabule ezigodlweni zayo,

ukuze lixoxele isizukulwana esizayo,

14ukuthi lo nguNkulunkulu,

unguNkulunkulu wethu kuze kube nininini;

yena uzakusihola kuze kube nini lanini.