1 Lan 28 - Ndebele Bible (iBhayibhili Elingcwele) 1978

USolomoni ukhethwa ukwakha ithempeli

1UDavida wabuthanisa eJerusalema zonke izinduna zakoIsrayeli lezinduna zezizwe lezinduna zezigaba ezazisebenzela inkosi, labaphathi bezinkulungwane labamakhulu, labaphathi bempahla yonke labezifuyo zenkosi labezamadodana ayo labathenwa basesigodlweni, lamaqhawe, lawo wonke amadoda empi alamandla.

2Inkosi uDavida yasisukuma isithi: Lalelani, zihlobo zami labantu bami; bengizimisele ukwakhela umtshokotsho wesivumelwano seNkosi indlu yokuhlala leyisigcabha senyawo zikaNkulunkulu wethu, ngenza amalungiselelo okwakha.2 Sam 7:1–16; 1 Lan 17:1–14

3Kodwa uNkulunkulu wathi kimi: Kawuyikulakhela indlu ibizo lami, ngoba wena ungumuntu wempi, uchithe igazi.

4Kanti iNkosi uNkulunkulu kaIsrayeli yangikhetha kubo bonke abendlu kababa ukuba ngibe yinkosi yakoIsrayeli kuze kube nini lanini; ngoba yakhetha isizwe sakoJuda ukuba sibe yinhloko, lendlini yakoJuda yakhetha indlu kababa, phakathi kwamadodana kababa kwayithokozisa ukuba ingibeke ngibe yinkosi yakoIsrayeli wonke.

5Kuwo wonke amadodana ami, ngoba iNkosi yanginika amadodana amanengi, yakhetha uSolomoni indodana yami ukuba abe yinkosi koIsrayeli, umbuso weNkosi uNkulunkulu.

6Yathi kimi: NguSolomoni indodana yakho ozakwakha indlu yami lamaguma ami, ngoba ngimkhethile abe yindodana yami, lami ngizakuba nguyise.

7Ngizawuqinisa umbuso wakhe kuze kube nininini uba eqina ekugcineni imilayo yami lemithetho yami njengalamhla.

8Ngakhoke phambi kwakhe uIsrayeli wonke, ibandla leNkosi uNkulunkulu, laphambi kukaNkulunkulu wethu, gcinani ngokunanzelela yonke imilayo yeNkosi uNkulunkulu wenu ukuze lihlale kulelizwe elihle, lilitshiyele abantwana benu, libe ngelabo kuze kube nininini.

9Wenake, Solomoni mntanami, ubomazi uNkulunkulu kaIsrayeli, umkhonze ngenhliziyo yonke langengqondo evumayo; ngoba iNkosi iyazihlola zonke inhliziyo, iyawazi amacebo wonke lemicabango yonke. Uba wena uyidinga, izakuziveza kuwe; kodwa uba uyitshiya, izakukulahla kokuphela.

10Qaphelake, ngoba iNkosi ikukhethile ukuba wakhe indlu ezakuba yindlu engcwele; dodake uyakhe.

11UDavida wasenika uSolomoni indodana yakhe umfanekiso womkoto wethempeli lowezindlu zalo, lowezindlu zenotho, lowezindlu zangaphezulu, lowezindlu zangaphakathi, lowendlu yesihlalo somusa.

12Wamnika lomfanekiso wakho konke ayekucabanga ngamaguma ethempeli, lowezindlu eziwazingelezeleyo, lowendlu yenotho yethempeli, lowendlu yenotho yezinto ezingcwele.

13Wamtshela langesimo sezigaba zabapristi lezamaLevi, langawo wonke umsebenzi wethempeli, langezitsha zonke zenkonzo,

14langobunzima begolide lazo zonke izitsha zegolide zaleyo laleyonkonzo, langobunzima bezitsha zesiliva zaleyo laleyonkonzo,

15langobunzima bezinti zezibane zegolide kanye lezibane zazo, langobunzima begolide balolo lalololuthi lwesibane lezibane zalo, lobunzima besiliva balolo lalololuthi lwesibane lezibane zalo, njengokusetshenziswa kwazo enkonzweni,

16langobunzima begolide balelo lalelotafula yezinkwa ezahlukaniselwe uNkulunkulu lobesiliva samatafula esiliva.

17Wamtshela langobunzima begolide elihle lamafolokwe, lobemiganu yokuchela lobezinkezo, lobunzima baleso lalesositsha segolide, lobaleso lalesositsha sesiliva.

18Wamtshela langesimo sealtare lempepha elenziwe ngegolide elihle lobunzima balo; langomfanekiso wesihlalo esingamakherubi egolide elule amaphiko awo agubuzele umtshokotsho wesivumelwano seNkosi.

19UDavida wasesithi: Konke lokhu kwalotshwa ngesandla seNkosi; owami umsebenzi kube yikuchasisa umsebenzi wonke womfanekiso.

20UDavida wasesithi kuSolomoni indodana yakhe: Dodake ume isibindi, usebenze; ungesabi utshaywe luvalo; ngoba iNkosi uNkulunkulu, yebo uNkulunkulu wami, ulawe. Kasoze wakulahla, kasoze akutshiye, uze uphele wonke umsebenzi wenkonzo yethempeli.

21Nanzi izigaba zabapristi lezamaLevi zenkonzo yonke yendlu kaNkulunkulu; kuwo wonke umsebenzi uzakusizwa yizingcitshi zenhlobo zonke zomsebenzi ezizinikeleyo, labaphathi labo bonke abantu bazakuba ngaphansi kwakho.