Hez 19 - Ndebele Bible (iBhayibhili Elingcwele) 1978

Isililo ngezikhulu zakoIsrayeli

1Khala isililo ngezikhulu zakoIsrayeli,

2uthi:

Yeka isilwanekazi esasingunyoko!

Salala phakathi kwezilwane, sondla imidlwane yaso.

3Sakhulisa omunye wemidlwane yaso,

waba yisilwane, wafunda ukubamba impango,

wadla abantu.

4Izizwe zahlabelana umkhosi ngawo,

wawela emgodini wazo,

zawukhupha ngezingwegwe,

zawusa elizweni laseGibithe.

5Nxa sibona ukuba sahlulekile,

lokuba ithemba laso liphelile,

sathatha omunye wemidlwane yaso,

sawenza waba yisilwane.

6Wahambahamba phakathi kwezilwane,

waba yisilwane,

wafunda ukubamba impango,

wadla abantu.

7Wabhidliza inqaba zabo,

wachitha imizi yabo.

Ilizwe lamangala labo bonke ababekilo

ngenxa yokubhonga kwawo.

8Izizwe zaseziwuhlasela zivela emazweni awuzingelezelayo;

zaphosela amambule azo phezu kwawo,

wawela emgodini wazo.

9Zawufaka endlwaneni ngezingwegwe,

zawusa enkosini yaseBabiloni,

zawuvalela enqabeni ukuze ilizwi lawo

lingabe lisazwakala futhi phezu kwentaba zakoIsrayeli.

10Unyoko wayenjengesihlahla sevini esivinini

esigxunyekwe ngasemanzini,

esilezithelo lamahlamvu amanengi

ngenxa yamanzi amanengi.

11Isigodo saso esiqinileyo saba yintonga yombusi;

isihlahla sasiside siphakeme phakathi kwengatsha eziqatha,

sibonakala ngobude baso langobunengi bengatsha zaso.

12Kodwa isihlahla sevini sasitshunwa ngokuthukuthela,

saphoselwa phansi,

lomoya wasempumalanga wasomisa,

lezithelo zaso zaphephuka,

isigodo saso esiqinileyo soma,

umlilo wasitshisa.

13Khathesi sesigxunyekwe enkangala,

elizweni elitshisayo lelomileyo.

14Umlilo ulumethe esigodweni saso,

watshisa ingatsha zaso lezithelo zaso,

ukuze kungasali isigodo esiqinileyo

sokwenza intonga yombusi.

Lesi yisililo esesisetshenziswa.