uObadiya 1 - Ndebele Bible (iBhayibhili Elingcwele) 1978

Ukuthotshiswa kukaEdoma

1Lo ngumbono kaObadiya.

INkosi uNkulunkulu ithi ngoEdoma:

Sizwile imibiko evela eNkosini,

kuthunywe isithunywa phakathi kwezizwe ukuba sithi:

Vukani, simvukele silwe laye!

2Ngizakukwenza ube mncinyane phakathi kwezizwe,

udeleleke kakhulu.

3Ukuziqhenya kwenhliziyo yakho kukukhohlisile,

wena ohlala ezimbalwini zamawa,

olendawo ephakemeyo yokuhlala,

othi enhliziyweni yakho: Ngubani ozangehlisela phansi na?

4Loba uqonga njengokhozi,

loba isidleke sakho sakhiwe phakathi kwezinkanyezi,

ngizakukwethula khona, kutsho iNkosi.

5Uba amasela efika kuwe labaphangi ebusuku,

lanxa ukulahlekelwa kwakho kungaba kukhulu,

bebengayikuthatha lokho abakufunayo na?

Uba abavuna izithelo zevini befika kuwe,

bebengayikutshiya ingcosana na?

6Yeka ukuphangwa kukaEsawu!

Yeka ukufunisiswa kwamagugu akhe!

7Bonke abangane bakho besivumelwano bakukhohlisile,

bakuxotshela emngceleni;

ababehlalisene lawe ngokuthula bakwahlule,

labangane bakho abathembekileyo bakuthiyile;

kakho okuqedisisayo lokhu.

8INkosi ithi: Ngalolosuku ngizachitha abahlakaniphileyo eEdoma,

ngiqede lokuhlakanipha entabeni yakoEsawu.

9Amaqhawe akho, Temani, azatshaywa luvalo,

ukuze lowo lalowo abulawe entabeni kaEsawu.

10Ngenxa yesihluku esenziwa kumfowenu uJakobe

uzabanjwa zinhloni, uchithwe uphele nya.

11Ngosuku owema ngalo khatshana,

ngosuku abezizweni abathumba ngalo impahla yakhe,

bangena emasangweni akhe, benza inkatho ngeJerusalema

lawe wawunjengomunye wabo.

12Kodwa wawungafanelanga ukuthokoza ngomfowenu osukwini lokuhlupheka kwakhe;

wawungafanelanga ukuthokoza ngabantu bakoJuda osukwini lokuchitheka kwabo;

wawungafanelanga ukukloloda osukwini losizi lwakhe.

13Ngabe kawungenanga ngesango labantu bami osukwini lokuhlupheka kwabo;

ngabe kawuthokozanga ngezinhlupheko zabo osukwini lokuhlupheka kwabo;

ngabe kawuphanganga impahla yabo osukwini lokuhlupheka kwabo.

14Wawungafanelanga ukuma emahlukanweni endlela ukumvimbela ekubalekeni kwakhe;

wawungafanelanga ukunikela abaphunyukileyo bakhe osukwini losizi lwakhe.

15Ngoba usuku lweNkosi lusondele ezizweni zonke.

Njengokwenza kwakho kuzakwenziwa njalo lakuwe, Edoma,

izenzo zakho zizakwehliselwa ekhanda lakho.

16Njengokuba lina bakoIsrayeli linathile inkezo yolaka entabeni yami engcwele,

zonke izizwe ezikhona inxa zonke zizanatha kuyo kakhulu zinyamalale.

Ukuphakanyiswa kukaIsrayeli

17Kodwa entabeni yaseZiyone kuzakuba khona abaphunyukileyo,

izakuba ngcwele;

lendlu kaJakobe izakudla ilifa layo.

18Indlu kaJakobe izakuba ngumlilo,

lendlu kaJosefa ibe lilangabi,

indlu kaEsawu ibe ngamabibi;

bazakuwatshisa bawaqede;

kakuyikuba khona oseleyo endlini kaEsawu;

ngoba iNkosi isikhulumile.

19AbakoIsrayeli abaseNegebi bazakuthumba intaba kaEsawu,

abaseShefela bathumbe ilizwe lamaFilistiya,

kanye lelizwe lakoEfrayimi lelizwe laseSamariya,

loBenjamini athumbe iGileyadi.

20Abathunjiweyo bempi yakoIsrayeli bazakubuya bathumbe ilizwe lamaKanani,

kuze kufike eZarefathi;

labathunjiweyo baseJerusalema abaSerafadi bazakubuya bathumbe imizi yaseNegebi.

21Abasilileyo bakhwele entabeni yaseZiyone ukubusa intaba kaEsawu;

iNkosi yiyo ezakubusa.