Hez 45 - Ndebele Bible (iBhayibhili Elingcwele) 1978

Ukwahlukaniswa kwelizwe; isabelo seNkosi

1Ekwahlukaniseni kwenu ilizwe ngenkatho ukuba zonke izizwe zinikwe isabelo, lizakwahlukanisela iNkosi ingxenye yelizwe ibe yindawo engcwele, ubude bayo bube zingalo ezizinkulungwane ezingamatshumi amabili lanhlanu, lobubanzi bayo bube zingalo ezizinkulungwane ezingamatshumi amabili. Yonke izakuba ngcwele.

2Kulokhu indawo eyizingalo ezingamakhulu amahlanu ubude, lamakhulu amahlanu ububanzi, izakuba yindawo yendlu engcwele, ibe legceke eliyibhodayo elizingalo ezingamatshumi amahlanu.

3Endaweni engcwele lizalinganisa isigaba, ubude baso bube zingalo ezizinkulungwane ezingamatshumi amabili lanhlanu, lobubanzi baso bube zingalo ezizinkulungwane ezilitshumi, okuzakuba khona indlu engcwele, indawo engcwele kakhulu.

4Sibe yingxenye engcwele yelizwe, sizakuba ngesabapristi abakhonzayo endlini engcwele, abasondela ukukhonza iNkosi, sizakuba yindawo yezindlu zabo lendawo engcwele yendlu engcwele.

5Esinye isigaba ubude baso buzingalo ezizinkulungwane ezingamatshumi amabili lanhlanu, lobubanzi baso bube zingalo ezizinkulungwane ezilitshumi, sizakuba ngesamaLevi akhonzayo ethempelini, sibe ngesemizi yawo ahlala kiyo.

6Lizanika umuzi indawo phansi kwelizwe lendlu engcwele, ubude bayo bube zingalo ezizinkulungwane ezingamatshumi amabili lanhlanu, lobubanzi bayo bube zingalo ezizinkulungwane ezinhlanu, izakuba ngeyakhe wonke uIsrayeli.

7Indawo esemaceleni womabili endawo engcwele lawendawo yomuzi izakuba ngeyesikhulu, lendawo eseduze lendawo engcwele leseduze lomuzi, esuka entshonalanga eqonda entshonalanga, lesuka empumalanga eqonda empumalanga, ubukhulu bayo bulingana lesinye sezigaba phakathi kwentshonalanga lempumalanga yemingcele yelizwe.

8Izakuba yindawo yesikhulu koIsrayeli. Izikhulu zami kaziyikubacindezela abantu bami, kodwa zizavumela abakoIsrayeli balisebenzise ilizwe libe ngelezizwe zabo.

9INkosi uNkulunkulu ithi: Kwanele, lina zikhulu zakoIsrayeli! Lahlani isihluku lokucindezela, lenze ukwahlulela lokulunga, likhawule ukuxotsha abantu bami, kutsho iNkosi uNkulunkulu.

10Lizakuba lezilinganiso ezilungileyo, ihefa eliqondileyo letanka eliqondileyo.