Isa 54 - Ndebele Bible (iBhayibhili Elingcwele) 1978

Uthando lweNkosi kuIsrayeli

1Hlabela, wena nyumba;

kekela uthokoze, wena ongawuzwanga umhelo.

Ngoba umfazi otshiywe yindoda

ulabantwana abanengi kulaye olendoda, itsho iNkosi.

2Qhelisa indawo yomuzi wakho,

welule kakhulu amakhetheni ethente lakho,

udonse kakhulu intambo zalo,

ubethelisise lezikhonkwane zakho.

3Ngoba uzaqhela ugcwale indawo zonke,

lenzalo yakho izakubusa indawo ebanzi,

yakhe futhi imizi esingamanxiwa.

4Ungesabi, ngoba kawuyikuyangeka;

ungabi lenhloni, ngoba kawuyikuyangiswa;

ngoba uzakhohlwa ihlazo lobutsha bakho,

ungabe usakhumbula ukuyangeka kobufelwakazi bakho.

5Ngoba uMenzi wakho nguye ongumkakho,

obizwa ngokuthi yiNkosi yamabandla;

loNgcwele kaIsrayeli unguMhlengi wakho,

obizwa ngokuthi nguNkulunkulu womhlaba wonke.

6Ngoba iNkosi ikubizile wena

unjengomfazi olahliweyo lodabukileyo emoyeni,

njengomfazi wobutsha lapho esaliwe,

kutsho uNkulunkulu wakho.

7Okomzuzwana omncinyane ngakutshiya,

kodwa ngesihawu esikhulu ngizakukubuyisa.

8Olakeni lwami olukhulu ngakufulathela okwesikhatshana,

kodwa ngothando olungapheliyo ngizakukuhawukela,

kutsho iNkosi, uMhlengi wakho.

9Ngoba lokho kunjengensukwini zikaNowa kimi;

ngoba njengalokhu ngafunga ukuba amanzi kaNowa

kawayikubuya agcwele umhlaba,

ngokunjalo ngifungile ukuthi kangiyikukuthukuthelela, ngikusole.

10Lanxa izintaba zingasuka, lamaqaqa asuswe,

kodwa uthando lwami olungapheliyo kaluyikusuka kuwe,

lesivumelwano sami sokuthula kasiyikususwa,

kutsho iNkosi ekuhawukelayo.

IJerusalema elitsha

11INkosi ithi: Wena ohluphekayo lohlukuluzwayo ongelamduduzi,

ngizakwakha amatshe akho abe mahle,

ngizibeke izisekelo zakho ngamatshe athiwa ngamasafire.

12Ngizakwakha imiphotshongo yakho ngamatshe athiwa yiagate,

lamasango akho ngamatshe athiwa yirubi,

lomduli wakho wonke ngamatshe amahle.

13Wonke amadodana akho azafundiswa yiNkosi,

lokuphumelela kwawo kuzakuba kukhulu.

14Uzakuqiniswa ngokulunga;

uzavikeleka ekucindezeleni, ungesabi;

uvikeleke kokwesabekayo, kakuyikusondela kuwe.

15Uba uhlaselwa, lokho kuzabe kungaveli kimi,

loba ngubani olwa lawe, uzakwahlulwa ngenxa yakho.

16Kuyimi odale umkhandi ovuthela umlilo wamalahle,

enze izikhali zomsebenzi wakhe.

Kuyimi futhi odale umchithi ukuba achithe.

17Kakulasikhali esikhandelwa wena esizakuphumelela;

bonke abakumangalelayo bazakwahluleka.

Sinjalo isabelo sezinceku zeNkosi,

lokulunga kwazo okuvela kimi, kutsho iNkosi.