Hubo 72 - Ndebele Bible (iBhayibhili Elingcwele) 1978

Ukukhulekela inkosi

1Nkulunkulu, nika inkosi izahlulelo zakho

lendodana yenkosi ukulunga kwakho.

2Kayahlulele abantu bakho ngokulunga,

lezihlupheki zakho ngemfanelo.

3Izintaba kazilethele abantu ukuthula,

lamaqaqa ukulunga.

4Ibavikele abahluphekayo babantu,

ikhulule abaswelayo, ifohloze abacindezelayo.

5Kayihlale njalo lisekhona ilanga, kusekhona lenyanga,

kuzo zonke izizukulwana.

6Kayibe njengezulu elehlela otshanini,

njengezihlambo ezithambisa umhlaba.

7Ensukwini zayo ukulunga kakuphumelele,

lokuthula kwande, ize iphele inyanga.

8Izabusa kusukela kolunye ulwandle kuze kufike kolunye,

kusukela emfuleni iYufrathi kuze kufike emikhawulweni yomhlaba.

9Abahlala enkangala bazakhothama phansi kwayo;

izitha zayo zizakhotha uthuli.

10Amakhosi aseTarshishi lawasezihlengeni azaletha izipho,

amakhosi aseSheba laseSeba alethe izipho.

11Amakhosi wonke azakuwa phansi phambi kwayo,

izizwe zonke ziyikhonze.

12Ngoba iyamkhulula ohluphekayo lapho ekhala,

longumyanga ongelamsizi.

13Ilesihawu kobuthakathaka lakoswelayo,

iyabakhulula abaswelayo.

14Iyabakhulula ekucindezelweni lasebubini;

baligugu emehlweni ayo.

15Kayiphile njalo,

kayinikwe igolide laseSheba,

ikhulekelwe njalonjalo, ibusiswe insuku zonke.

16Kakube khona inala yamabele

elizweni lasezingqongeni zezintaba;

izithelo zakhona zihatshazele njengeLebanoni;

imizi kayigcwale abantu njengomhlaba ogcwele utshani.

17Ibizo layo kalime kuze kube nini lanini,

lodumo lwayo luqhubeke njalo lisekhona ilanga.

Abantu kababusiswe ngayo,

lezizwe zonke zithi: Ibusisiwe.

18Kayibongwe iNkosi uNkulunkulu kaIsrayeli,

onguye yedwa owenza izinto ezimangalisayo.

19Kalibongwe ibizo lakhe elilodumo kuze kube nininini;

umhlaba wonke ugcwale ubukhosi bakhe.

Ameni, Ameni!

20Imikhuleko kaDavida indodana kaJese isiphelile.