Dute 21 - Ndebele Bible (iBhayibhili Elingcwele) 1978

Umlayo ngomuntu obuleweyo ongaziwayo

1Elizweni iNkosi uNkulunkulu wenu elinika lona ukuba libe ngelenu uba kufunyaniswa umuntu obuleweyo elele egangeni, kungaziwa ukuthi ngubani ombuleleyo,

2abalisa labahluleli benu bazakuza, balinganise ummango phakathi kobuleweyo lemizi eseduze.

3Abalisa bomuzi oseduze lobuleweyo bazathatha ithokazi elingakhwelwanga, elingazanga libotshelwe ejogweni,

4balehlisele esigodini esilamanzi angacimiyo, esingalinywanga lesingahlanyelwanga, bephule intamo yalo lapho.

5Abapristi, amadodana kaLevi, bazakusondela; ngoba iNkosi uNkulunkulu wenu ibakhethile ukuba bayikhonze, babusise ebizweni layo, lokuba ngamazwi abo kungaqunywa indaba zokuxabana lokutshaya.

6Bonke abalisa balowomuzi oseduze lobuleweyo bazagezela izandla zabo phezu kwethokazi elephulwe intamo yalo esigodini,

7bafakaze bathi: Izandla zethu kazichithanga leligazi, lamehlo ethu kawakubonanga okwenzekileyo.

8Nkosi, bathethelele abantu bakho bakoIsrayeli owabahlengayo, ungavumeli ukuba babekwe icala legazi elingelacala, kodwa bathethelelwe lona.

9Ngalokhu lizaqeda icala legazi elingelacala phakathi kwenu nxa lisenza okulungileyo emehlweni eNkosi.

Ukuphathwa kwabesifazana abathunjiweyo

10Lapho uphuma impi ukuyahlasela izitha zakho, iNkosi uNkulunkulu wakho izinikele ezandleni zakho, uzithumbe,

11ubusubona owesifazana omuhle omfisayo phakathi kwabathunjiweyo, uthande ukumthatha abe ngumkakho,

12uzakumusa emzini wakho, aphuce ikhanda lakhe, aqume inzipho zakhe,

13akhumule ingubo zokuthunjwa kwakhe, ahlale emzini wakho elilela uyise lonina yonke inyanga, andubana amthathe, ube yindoda yakhe laye abe ngumkakho.

14Uba ungasamthandi, uzamyekela ukuba ahambe aye lapho ethanda khona; kodwa ungamthengisi ngemali, ungamphathi njengesigqili, ngoba usumonile.

Ilifa lobuzibulo

15Uba umuntu elabafazi ababili, omunye ethandwa nguye lomunye engamthandi, bobabili bamzalele abantwana, njalo uba indodana elizibulo ingumntwana womfazi ongathandwayo,

16kuzakuthi mhla enika amadodana akhe impahla yakhe ibe yilifa lawo, angayiphathi indodana yomfazi othandwayo ngokungathi ilizibulo, angayithandi kakhulu kulendodana yongathandwayo elizibulo loqobo;

17kodwa kavume ukuthi indodana yongathandwayo yilona izibulo, ayinike isabelo esiphindwe kabili sempahla yakhe yonke, ngoba ilizibulo lakhe, ilelungelo lobuzibulo.

Ukuphathwa kwabantwana abalenkani

18Uba umuntu elendodana elenkani lengezwayo, engalaleli ilizwi likayise lelikanina, ingabezwa lanxa beyitshaya,

19bazayibamba, bayise kubalisa bomuzi wakibo, enkundleni yaleyondawo,

20bathi kubalisa bomuzi: Lindodana yethu ilenkani, kayizwa, kayilaleli ilizwi lethu; iyisiminzi lesidakwa.

21Ng’khona wonke amadoda alowomuzi azayikhanda ngamatshe. Ngalokho lizaqeda ububi phakathi kwenu; wonke uIsrayeli uzakuzwa, esabe.

Umlayo ngomuntu ophanyekwayo

22Uba umuntu owenze icala elifanele ukufa ebulawa, lizamphanyeka esihlahleni,

23isidumbu sakhe singahlali esihlahleni ubusuku bonke, kodwa lizamlahla ngalona lolosuku, ngoba umuntu ophanyekiweyo uqalekisiwe nguNkulunkulu. Lingangcolisi ilizwe lenu iNkosi uNkulunkulu wenu elinika lona ukuba ngelenu.