Eks 32 - Ndebele Bible (iBhayibhili Elingcwele) 1978

Ithole legolide

1Abantu sebebonile ukuthi uMose ulibele ukwehla entabeni, babuthana kuAroni bathi kuye: Suka, usenzele onkulunkulu abazakuhamba phambi kwethu; ngoba uMose lowo, umuntu owasikhupha elizweni laseGibithe, kasazi ukuthi wehlelwe yini.

7INkosi yasisithi kuMose: Suka wehle, ngoba abantu bakho owabakhupha eGibithe benzile okubi;

8baphambukile masinyane endleleni engabalaya ngayo; bazenzele ithole elikhandiweyo, balikhonza, balihlabela, bathi: Nangu unkulunkulu wakho, Israyeli, owakukhupha eGibithe.

9INkosi yathi kuMose: Sengibabonile lababantu ukuthi bangabantu abanhliziyo zilukhuni;

10ngakhoke ngiyekele ukuba ulaka lwami lubavuthele, ngibaqede; kodwa wena ngizakukwenza ube yisizwe esikhulu.

11Kodwa uMose wayincenga iNkosi uNkulunkulu wakhe wathi; Nkosi, ulaka lwakho lubavuthelelani abantu bakho owabakhupha elizweni laseGibithe ngamandla amakhulu langesandla esiqinileyo na?Nani 14:13–19

12AmaGibithe uzawavumelelani ukuba athi: Yayiqonde ukubenza okubi ngokubakhupha kwayo ukuba ibabulale ezintabeni, ibaqede emhlabeni na? Phenduka olakeni lwakho oluvuthayo, ungenzi okubi lokhu ebantwini bakho.

13Khumbula uAbrahama loIsaka loIsrayeli, inceku zakho, owazifunga kibo wathi: Ngizakwandisa inzalo yenu ibe ngangenkanyezi zasezulwini, ngiyinike lonke lelilizwe engikhulume ngalo, libe yilifa layo kuze kube nininini.Gen 22:16, 17; 17:8

14Ngakho iNkosi yasiphenduka ebubini eyayisithi izakubenza ebantwini bayo.

15UMose wasesuka, wehla entabeni ephethe amatshe amabili obufakazi, amatshe alotshwe inxa zombili.

16Amatshe ayengumsebenzi kaNkulunkulu, lombhalo wawungumbhalo kaNkulunkulu, ubhalwe ematsheni.

17UJoshuwa esezwile umsindo wabantu beklabalala, wathi kuMose: Kulomsindo wempi ezihonqweni.

18UMose wathi: Kakusumsindo wabathabela ukunqoba loba umsindo wabanqotshiweyo, kodwa kungumsindo wabahlabelayo engiwuzwayo.

19Kwathi esesondele emathenteni walibona ithole legolide kanye lokusina; ulaka lukaMose lwavutha, wawalahla amatshe ezandleni zakhe, wawaphahlazela phansi kwentaba.

20Wathatha ithole ababelenzile, walitshisa ngomlilo, walichola laze laba yimpuphu, wayivuvuzela emanzini, wabanathisa wona abantu bakoIsrayeli.

21UMose wathi kuAroni: Abantu laba benzeni ukuba ubehlisele isono esingaka na?

22UAroni wathi: Kalungavuthi ulaka lwenkosi yami; uyabazi abantu ukuthi bathanda ububi.

23Ngoba bathi kimi: Senzele onkulunkulu abazakuhamba phambi kwethu; ngoba uMose lowo owasikhupha elizweni laseGibithe, kasazi ukuthi usehlelwe yini.

24Ngasengisithi kubo: Olegolide kalikhumule. Basebenginika lona; ngaliphosela emlilweni, kwaphuma lelithole.

25Kwathi uMose esebonile ukuthi abantu badlubulundile, — ngoba uAroni wabayekela ukuba badlubulunde baze bayangeke ezitheni zabo —

26uMose wema esangweni lamathente, wathi: Ngubani ongoweNkosi? Keze kimi. Wonke amadodana kaLevi abuthana kuye.

27Wathi kuwo: INkosi uNkulunkulu kaIsrayeli ithi: Ilowo lalowo phakathi kwenu kahlome umkhonto wakhe, azule lamathente, asuke kwelinye isango aye kwelinye, abulale umfowabo lomngane wakhe lomakhelwana wakhe.

28Amadodana kaLevi enza njengokutsho kukaMose; kwabulawa abantu abayizinkulungwane ezintathu ngalolosuku.

29UMose wasesithi: Lamuhla lizahlukanisele iNkosi lina, kwaba yilowo lalowo wenu wanikela indodana yakhe lomfowabo, ukuba iNkosi ilibusise lamuhla.

30Kusisa uMose wathi ebantwini: Lenze isono esikhulu; khathesi sengizakukhuphukela eNkosini; mhlawumbe ngingenza indlela yokubuyisana esonweni senu.

31UMose wasebuyela eNkosini wathi: Maye! Lababantu benzile isono esikhulu, bazenzele onkulunkulu begolide.

32Kodwa uba ubathethelela isono — uba ungabathetheleli, ungisuse ogwalweni lwakho olulobileyo.Hubo 69:28; Isam 3:5

33INkosi yathi kuMose: Owonileyo kimi ngizamsusa ogwalweni lwami.

34Kodwa hambake, ubaholele abantu endaweni engikhulume ngayo kuwe; isithunywa sami sizakukwandulela. Kanti mhla ngibethekelelayo ngizabatshaya ngenxa yesono sabo.

35INkosi yabatshaya abantu ngenxa yethole ababelenzile, uAroni ayebenzele lona.