Jer 18 - Ndebele Bible (iBhayibhili Elingcwele) 1978

UJeremiya uya endlini yombumbi

1Ilizwi leNkosi elafika kuJeremiya lathi:

2Suka, wehlele endlini yombumbi wembiza, ngizakukutshela amazwi ami khona.

3Ngasengisehlela endlini yombumbi wembiza, ngamfica esebenza umsebenzi wakhe ngevili lokubumba.

4Imbiza ayeyibumba ngebumba yonakala ezandleni zakhe; waseyidiliza, wenza enye imbiza njengokubona kwakhe.

5Laselifika ilizwi leNkosi kimi lisithi:

6Wena ndlu kaIsrayeli, ngingeze ngenza kini lokho okwenziweyo ngumbumbi wembiza na? kutsho iNkosi. Njengebumba esandleni sombumbi wembiza, lani linjalo esandleni sami, lina ndlu kaIsrayeli.

7Langasiphi isikhathi uba ngikhuluma ngesizwe langombuso ukuthi ngizakukusiphuna, ngikudilize, ngikuchithe,

8uba lesosizwe engakhulume ngaso sitshiya ububi baso, ngizazisola ngokubi ebengisithi ngizakubenza kiso.

9Langasiphi isikhathi engikhuluma ngesizwe langombuso ukuthi ngizakukwakha ngikumise,

10uba lesosizwe sisenza okubi phambi kwami, singalaleli ilizwi lami, ngizazisola ngokuhle ebengisithi ngizakukwenza kiso.

11Ngakhoke tshono ebantwini bakoJuda lakwabakhileyo eJerusalema ukuthi: INkosi ithi: Khangelani, ngilibumbela okubi, ngenza amacebo ngani. Tshiyani ububi benu bonke, lilungise indlela zenu lezenzo zenu.

12Kodwa bona bathi: Lokho kakusizi lutho. Sizalandela awethu amacebo, sonke senze ngenkani yenhliziyo zethu ezimbi.

13Ngakhoke iNkosi ithi: Buzani phakathi kwezizwe,

ukuthi ngubani owake wezwa okunjengalokhu na?

Intombi uIsrayeli yenzile into eyesabekayo.

14Ungqoqwane angazitshiya yini ingqonga zaseLebanoni,

lamanzi aqandayo ageleza ezintabeni azakutsha na?

15Kodwa abantu bami bangikhohliwe,

batshisela onkulunkulu bamanga impepha;

bakhubeka endleleni zabo, emigwaqweni yasendulo,

baphambukela ezindledlaneni, kabahambanga ngemigwaqo;

16benza ilizwe labo laba ngelesabekayo

lento yokuncifelwa kuze kube nininini;

bonke abedlula khona bayethuka, banikina amakhanda abo.

17Njengomoya wasempumalanga ngizabachitha phambi kwezitha zabo,

ngizabafulathela, bangaboni ubuso bami,

ngosuku lokuchitheka kwabo.

Abantu benzela uJeremiya amacebo amabi

18Basebesithi: Wozani simenzele amacebo amabi uJeremiya; ngoba kuzabe kulokhu kukhona abapristi ukusifundisa, labahlakaniphileyo ukuseluleka, labaprofethi ukutshumayela ilizwi. Wozani simenzele amacebo, singananzi wonke amazwi akhe.

19Ngizwa, wena Nkosi, ulalele lokho izitha zami ezikukhulumayo ngami.

20Okuhle kuyaphindiselwa ngokubi na?

Ngoba bangimbele umgodi.

Khumbula ukuthi ngema phambi kwakho ukubakhulumela okuhle

ukuthinta ulaka lwakho kibo.

21Ngalokhoke nikela abantwana babo endlaleni,

ubanikele ekubulaweni empini;

abafazi babo balahlekelwe ngabantwana, babe ngabafelwakazi,

lamadoda abo abulawe ngumkhuhlane,

lamajaha abo abulawe empini.

22Kakuzwakale ukukhala endlini zabo,

lapho bejunywa yimpi.

Ngoba bengimbele umgodi ukungibamba,

bazithiya ngomjibila inyawo zami.

23Kanti, wena Nkosi, uyawazi amacebo abo okungibulala.

Ungathetheleli ububi babo,

lezono zabo ungazicimi phambi kwakho.

Kodwa kabawe phambi kwakho,

ubavukele wena ngesikhathi sokuthukuthela kwakho.