Eks 33 - Ndebele Bible (iBhayibhili Elingcwele) 1978

AbakoIsrayeli balaywa ukuba basuke eSinayi

1INkosi yathi kuMose: Khuphuka lapha wena labantu owabakhupha elizweni laseGibithe, uye elizweni engalifungela kuAbrahama lakuIsaka lakuJakobe ngathi: Inzalo yakho ngizakuyinika lona.Gen 12:7; 26:3; 28:13

2Ngizakuthuma isithunywa phambi kwakho, ngixotshe amaKanani lamaAmori lamaHethi lamaPerizi lamaHivi lamaJebusi.

3Uye elizweni eligcwele uchago lenyosi; kodwa kangiyikuhamba lani funa ngiliqede endleleni, ngoba lingabantu abanhliziyo zilukhuni.

4Kwathi lapho abantu sebewazwile lamazwi adabukisayo, bakhala; kakubanga lamuntu owafaka izigqizo zakhe;

5ngoba iNkosi yathi kuMose: Tshono ebantwini bakoIsrayeli uthi: Lingabantu abanhliziyo zilukhuni; uba ngihamba lani okwesikhathi nje, ngizaliqeda. Ngakhoke khuphani izigqizo zenu ukuba ngibone ukuthi ngizakwenzani kini.

6Ngakhoke abantu bakoIsrayeli bazihlubula izigqizo zabo kusukela entabeni yaseHorebe.

Ithente lokuhlangana

7UMose wayejwayele ukuthatha ithente alimise ngaphandle kwezihonqo, khatshana lazo; walibiza ngokuthi lithente lokuhlangana. Bonke ababedinga iNkosi baphuma baya ethenteni lokuhlangana elingaphandle kwezihonqo.

8Kwakuya kuthi lapho uMose ephuma ukuya ethenteni, bonke abantu basukume beme, kube yilowo lalowo emnyango wethente lakhe; bamjolozele uMose aze angene ethenteni;

9kuthi lapho uMose esengena ethenteni, insika yeyezi yehle, ime ngasemnyango wethente; iNkosi ibisikhuluma kuMose.

10Kuthi bonke abantu lapho beyibona insika yeyezi imi ngasemnyango wethente, basukume, badumise, kube yilowo lalowo eme emnyango wethente lakhe.

11Ngaleyondlela iNkosi yayikhuluma kuMose ikhangelene laye, njengomuntu ekhuluma lomngane wakhe. Lapho uMose esebuyele ezihonqweni, inceku yakhe uJoshuwa oyinsizwa, indodana kaNuni, kasukanga ethenteni.

INkosi yathembisa ukuhamba loMose

12UMose wathi eNkosini: Khangela, uthi kimi: Khupha lababantu; kodwa kawungitshengisanga ukuthi uzakuthuma ubani ukuba ahambe lami. Kodwa uthe: Ngiyakwazi ngebizo, futhi ufumene umusa emehlweni ami.

13Ngakhoke uba ngifumene umusa emehlweni akho, ngitshengisa indlela zakho khathesi, ukuba ngikwazi, ngifumane umusa emehlweni akho; khumbula futhi ukuthi isizwe lesi singabantu bakho.

14Yasisithi: Mina uqobo ngizahamba lawe, ngikuphumuze.

15Wathi kuyo: Uba wena uqobo ungahambi lami, ungasisusi lapha.

16Ngoba kuzakwaziwa kanjani ukuthi ngifumene umusa emehlweni akho, mina labantu bakho na? Kakwaziwa yini ngokuhamba kwakho lathi ukuze mina labantu bakho sahlukaniswe kubo bonke abantu abasemhlabeni na?

17INkosi yathi kuMose: Ngizakwenza lalokhu okutshoyo, ngoba ufumene umusa emehlweni ami, ngiyakwazi ngebizo.

18UMose wathi: Ngitshengisa inkazimulo yakho.

19Yathi: Ngizadlulisa phambi kwakho bonke ubuhle bami, ngimemezele ibizo leNkosi phambi kwakho. Ngizamhawukela lowo engithanda ukumhawukela, ngibe lomusa kulowo engithanda ukuba lomusa kuye.Roma 9:15

20Yathi futhi: Ungebone ubuso bami; ngoba kakho umuntu ongangibona, aphile.

21INkosi yathi: Nansi indawo phansi kwami lapho uzakuma khona edwaleni;

22kuzakuthi lapho inkazimulo yami isedlula, ngizakukufaka esikhexeni sedwala, ngikusithe ngesandla sami ngize ngidlulele phambili;

23besengisusa isandla sami ukuba ubone umhlane wami; kodwa ubuso bami kabuyikubonwa.