2 Lan 32 - Ndebele Bible (iBhayibhili Elingcwele) 1978

Ukuhlaselwa kwelizwe lakoJuda nguSenakeribi

1Ngemva kwalezizenzo zobuqotho zikaHezekiya uSenakeribi inkosi yaseAsiriya wafika ukuhlasela uJuda, wamisa maqondana lemizi ebiyelweyo eqonde ukuzithumbela yona.2 Kho 18:13–27; 19:14–19, 35–37; Isa 36:1–21

2Kwathi uHezekiya esebonile ukuba uSenakeribi uqonde ukuzakulwa leJerusalema,

3wacebisana lenduna zakhe lamaqhawe akhe ukuvala amanzi emithombo eyayingaphandle komuzi; bavumelana laye.

4Kwabuthaniswa abantu abanengi, bavala yonke imithombo lesifula esasigeleza phakathi kwelizwe, bathi: Amakhosi eAsiriya angawazuzi amanzi nxa efika lapha.

5UHezekiya waqinisa wakha wonke umduli owawusudilikile, wakha imiphotshongo phezu kwawo, langaphandle kwawo wakha omunye umduli; waqinisa idundulu elithiwa yiMilo emzini kaDavida. Wenza lezikhali lezihlangu ezinengi.

6Wabekela abantu induna zokulwa, wazibizela egcekeni elingasesangweni lomuzi, waziqinisa esithi:

7Qinani lime isibindi; lingesabi litshaywe luvalo phambi kwenkosi yeAsiriya kanye lempi yonke yayo; ngoba kukhona kithi omkhulu kulaye.

8Yena ulamandla omuntu, kodwa thina sileNkosi uNkulunkulu wethu ukusisiza lokusilwela. Abantu bazuza isibindi ngamazwi kaHezekiya inkosi yakoJuda.

9Ngemva kwalokho uSenakeribi inkosi yaseAsiriya eseLakishi lezimpi zakhe zonke, wathumela inceku zakhe eJerusalema kuHezekiya inkosi yakoJuda lakubo bonke abantu bakoJuda ababeseJerusalema, wathi:

10USenakeribi inkosi yaseAsiriya uthi: Lithembeni ukuba lihlalele ukuvinjezelwa eJerusalema na?

11UHezekiya kalikhohlisi yini ukuba alinikele ukubulawa yindlala langumhawu ngokulitshela ukuthi iNkosi uNkulunkulu wenu izalikhulula esandleni senkosi yaseAsiriya na?

12Kasuye yini lo uHezekiya owavala indawo zayo eziphakemeyo zokukhonzela, wadiliza ama‐altare ayo, watshela abakoJuda labaseJerusalema ukuba bafanele bakhuleke phambi kwealtare libe linye, batshisele kulo imihlatshelo na?

13Kalikwazi yini lokho engikwenzileyo mina labokhokho kubo bonke abantu bamanye amazwe na? Onkulunkulu bezizwe zalawomazwe babelawo yini amandla okukhulula amazwe abo esandleni sami na?

14Nguwuphi kubo bonke onkulunkulu balezozizwe okhokho abazichithayo owaba lamandla okukhulula abantu bakhe esandleni sami, ukuba uNkulunkulu wenu abe lamandla okulikhulula lina esandleni sami na?

15Ngalokhoke lingamvumeli uHezekiya ukuba alikhohlise aliduhise ngalindlela, lingamkholwa, ngoba kakukho unkulunkulu owasiphi isizwe lowawuphi umbuso obe lamandla okukhulula abantu bakhe esandleni sami lesabokhokho bami. Phoke, owenu uNkulunkulu angalikhulula kanjani esandleni sami na?

16Inceku zikaSenakeribi zatsho lokunye ngeNkosi uNkulunkulu langenceku yayo uHezekiya.

17USenakeribi wagwala incwadi zokuklolodela iNkosi uNkulunkulu kaIsrayeli lokuyeyisa wathi: Njengonkulunkulu balezozizwe zalawomazwe abangakhululanga abantu babo esandleni sami, loNkulunkulu kaHezekiya kayikukhulula abantu bakhe esandleni sami.

18Inceku zamemeza ngelizwi elikhulu ngolimi lwakoJuda ebantwini baseJerusalema ababephezu komduli ukubethusa lokubesabisa ukuze bawuthumbe umuzi.

19Zakhuluma ngoNkulunkulu waseJerusalema njengokukhuluma kwazo ngonkulunkulu bezinye izizwe zasemhlabeni abangumsebenzi wabantu.

Ukukhululwa kwelizwe lakoJuda

20UHezekiya inkosi loIsaya umprofethi indodana kaAmozi bakhuleka ngenxa yalokhu, ukukhala kwabo kwafinyelela ezulwini.

21INkosi yathumela isithunywa esabulala amaqhawe wonke labaphathi bezimpi lezinduna ezihonqweni zenkosi yaseAsiriya. Yona yabuyela elizweni layo ilenhloni. Isingenile endlini kankulunkulu wayo, abanye kumadodana ayo bayibulalela khona ngomkhonto.

22Ngokunjalo iNkosi yamsiza uHezekiya labaseJerusalema esandleni sikaSenakeribi inkosi yaseAsiriya lezandleni zezitha zakhe zonke; yabanika ukuthula inxa zonke.

23Abanengi baletha iziphiwo eNkosini uNkulunkulu eJerusalema lezinto eziligugu kuHezekiya inkosi yakoJuda okwamenza wahlonitshwa yizo zonke izizwe kusukela kulesosikhathi.

Ukugula kukaHezekiya

24Ngalezonsuku uHezekiya wagula, waphos’ukufa; wakhuleka eNkosini eyamphendulayo, yamnika isibonakaliso.2 Kho 20:1–3, 12–19; Isa 38:1–3; 39:1–8

25Kodwa uHezekiya katshengisanga ukubonga ngokuhle enzelwe khona, ngoba inhliziyo yakhe yayisiziphakamisile. Ngakho ulaka lweNkosi lwehlela phezu kwabakoJuda labaseJerusalema.

26UHezekiya wasezithoba ngenxa yokuziphakamisa kwenhliziyo yakhe, yena labaseJerusalema, ngakho ulaka lweNkosi kalwehlelanga kibo futhi ensukwini zikaHezekiya.

Inkosi yaseBabiloni ithumela izithunywa kuHezekiya

27UHezekiya wayenothile kakhulu elodumo, wazakhela izindlu zenotho, eyesiliva leyegolide leyamatshe aligugu leyamakha, lezindlu zezihlangu lazo zonke inhlobo zezitsha ezibiza imali enengi;

28wakha leziphala zamabele lezewayini lezamafutha, lezibaya zenhlobo zonke zenkomo lezezimvu.

29Wazakhela lemizi, wazidingela izimvu lenkomo ezinengi, ngoba uNkulunkulu wayemnikile inotho enengi kakhulu.

30Nguye lo uHezekiya owavala umthombo wamanzi angaphezulu eGihoni, wawaqondisa ngasentshonalanga komuzi kaDavida. UHezekiya waphumelela kuyo yonke imisebenzi yakhe.

31Lasendabeni yezithunywa zezikhulu zaseBabiloni ezazithunywe kuye ukuzabuza ngesibonakaliso esasenziwe elizweni, uNkulunkulu wamyekela ukuba azenzele ngokuthanda kwakhe ukuba amhlole, abone konke okusenhliziyweni yakhe.

Ukufa kukaHezekiya

32Ezinye indaba zikaHezekiya lezenzo zakhe zonke ezinhle zilotshiwe embonweni kaIsaya umprofethi indodana kaAmozi, logwalweni lwamakhosi akoJuda lawakoIsrayeli.

33UHezekiya waya kwabaphansi, wangcwatshelwa ngaphezulu kwamaliba amadodana kaDavida; bonke abakoJuda labaseJerusalema bamenzela isililo esikhulu. UManase indodana yakhe waba yinkosi esikhundleni sakhe.