Jer 28 - Ndebele Bible (iBhayibhili Elingcwele) 1978

UHananiya utshumayela amanga

1Kwathi kulowomnyaka, ekuqaleni kokubusa kukaZedekiya inkosi yakoJuda, ngenyanga yesihlanu yomnyaka wesine, uHananiya indodana kaAzuri, umprofethi ovela eGibeyoni, wathi kimi ethempelini phambi kwabapristi labantu bonke:2 Kho 24:18–20; 2 Lan 36:11–13

2INkosi yamabandla, uNkulunkulu kaIsrayeli, ithi: Ngilephulile ijogwe lenkosi yaseBabiloni.

3Ingakapheli iminyaka emibili ngizabuyisela kulindawo izitsha zonke zethempeli, ezathathwa nguNebukadineza inkosi yaseBabiloni kulindawo, wazisa eBabiloni.

4Ngibuyise kulindawo futhi uJekoniya indodana kaJehoyakimi, inkosi yakoJuda, labo bonke abathunjwayo koJuda basiwa eBabiloni, ngoba ngizalephula ijogwe lenkosi yaseBabiloni, kutsho iNkosi.

5Umprofethi uJeremiya wasekhuluma kumprofethi uHananiya phambi kwabapristi laphambi kwabantu bonke ababemi ethempelini,

6esithi: Kungathi kungaba njalo! Kungathi iNkosi ingenza njalo, yenze ukuba amazwi owatshumayelayo agcwaliseke, ibuyise kulindawo izitsha zethempeli, labo bonke abathunjelwa eBabiloni.

7Kanti zwana lelilizwi engilikhuluma kuwe laphambi kwalababantu.

8Abaprofethi ababephambi kwakho lababephambi kwami, kusukela endulo, batshumayela ngempi, langendlala, langomkhuhlane, emazweni amanengi lasemibusweni emikhulu.

9Kodwa lowomprofethi otshumayela ngokuthula, lapho seligcwalisekile ilizwi lakhe, kuzabonakala ukuthi ungumprofethi othunywe yiNkosi sibili.

10Umprofethi uHananiya waselisusa ijogwe entanyweni yomprofethi uJeremiya, walaphula.

11UHananiya wakhuluma phambi kwabantu bonke esithi: INkosi ithi: Ngokunjalo ngizalaphula ijogwe likaNebukadineza inkosi yaseBabiloni entanyeni yezizwe zonke, ingakapheli iminyaka emibili. UJeremiya umprofethi wasesuka ehamba.

12Laselifika ilizwi leNkosi kuJeremiya, uHananiya umprofethi eselaphulile ijogwe entanyeni yomprofethi uJeremiya, lathi:

13Hamba, utsho kuHananiya uthi: INkosi ithi: Wena wephule amajogwe esihlahla, kodwa mina ngizakwenza endaweni yawo amajogwe ensimbi.

14Ngoba iNkosi yamabandla, uNkulunkulu kaIsrayeli, ithi: Ngigaxile ijogwe lensimbi entanyeni yazo zonke lezizizwe ukuba zisebenzele uNebukadineza inkosi yaseBabiloni, futhi zizamsebenzela, ngoba ngimnikile lenyamazana zeganga.

15Umprofethi uJeremiya wasesithi kumprofethi uHananiya: Zwana, Hananiya, iNkosi kayikuthumanga, kodwa wenze lababantu ukuba bathembe amanga.

16Ngakho iNkosi ithi: Khangela, ngizakukususa emhlabeni; ngawona lo umnyaka nje uzakufa, ngoba utshumayele ukuhlamuka eNkosini.

17Wafa uHananiya umprofethi ngawona lowomnyaka ngenyanga yesikhombisa.