Nani 35 - Ndebele Bible (iBhayibhili Elingcwele) 1978

Imizi yamaLevi

1INkosi yakhuluma kuMose emagcekeni aseMowabi, ngaseJordani eduze leJeriko, yathi:Josh 21:1–42

2Laya abakoIsrayeli ukuba bakhethe imizi elizweni labo, bayinike amaLevi ukuze ahlale kiyo; futhi linike amaLevi amadlelo eduze lemizi yawo.

3Imizi leyo izakuba ngeyawo ukuba ahlale kiyo, lamadlelo awo abe ngawenkomo zawo lawezifuyo zawo zonke.

4Amadlelo emizi elizakuwanika wona amaLevi azakuba lebanga eliyizingalo eziyinkulungwane kusukela emthangaleni womuzi inxa zonke.

5Lizakulinganisa ngaphandle komuzi izingalo ezizinkulungwane ezimbili ngasempumalanga, lezingalo ezizinkulungwane ezimbili ngaseningizimu, lezingalo ezizinkulungwane ezimbili ngasentshonalanga, lezingalo ezizinkulungwane ezimbili ngasenyakatho, umuzi ube phakathi. Lokho kuzakuba ngamadlelo emizi yawo.

6Imizi elizakuyinika amaLevi izakuba yimizi eziyisithupha yokuphephela, lapho umbulali angabalekela khona; ngaphandle kwayo liwanike imizi engamatshumi amane lambili.

7Ngakho yonke imizi elizayinika amaLevi izakuba yile engamatshumi amane lesificaminwembili kanye lamadlelo ayo.

8Mayelana lemizi elizakuyikhetha elizweni labakoIsrayeli, thathani ezizweni ezinkulu imizi eminengi, lithathe ezizweni ezincinyane imizi emilutshwana; yileso lalesosizwe sizakunika amaLevi imizi njengelizwe esaliphiwayo.

Imizi yokuphephela

9INkosi yathi kuMose:Josh 20:1–9

10Tshono ebantwini bakoIsrayeli uthi: Lapho lichapha iJordani lingene elizweni laseKanani,

11khethani imizi ibe yimizi yenu yokuphephela, ukuba umbulali obulala umuntu kungesikho ngabomu aphephele kuyo.

12Yona izakuba yimizi yenu yokuphephela kumphindiseli, ukuba umbulali angabulawa engakemi phambi kwebandla ahlulelwe.

13Imizi elizakuyinika izakuba yimizi eyisithupha yokuphephela.

14Lizakukhetha imizi emithathu ngaphetsheya kweJordani, lemizi emithathu elizweni laseKanani, ibe yimizi yokuphephela.

15Limizi eyisithupha izakuba ngeyokuphephela kwabakoIsrayeli, lakwabemzini lakwabezizweni abaphakathi kwabo, ukuba obulala umuntu kungesikho ngabomu aphephele kiyo.

16Uba umuntu etshaya omunye ngento yensimbi ambulale, ungumbulali; kabulawe lumbulali.

17Uba emtshaya ngelitshe elingabulala umuntu, ambulale, ungumbulali; kabulawe lumbulali.

18Uba emtshaya ngenduku engabulala umuntu, ambulale, ungumbulali; kabulawe.

19Umphindiseli wegazi kambulale umbulali lapho ehlangana laye.

20Uba umbulali ejuma omunye ngoba emzonda, loba emjikijela ngesikhali ambulale,

21loba emtshaya ngenqindi yakhe ngokumzonda ambulale, lowo otshayayo kabulawe, ungumbulali; umphindiseli wegazi kambulale umbulali lapho ehlangana laye.

22Kodwa uba emjuma engamzondi, loba emjikijela ngesikhali kungesikho ngabomu,

23loba emtshaya ngelitshe elingabulala umuntu engamboni, ambulale, lanxa engeyisiso isitha sakhe, futhi ebengathandi ukumlimaza,

24ibandla lizakwahlulela phakathi kombulali lomphindiseli wegazi ngezahlulelo lezi.

25Ibandla limophule umbulali esandleni somphindiseli wegazi, limbuyisele emzini lapho abephephele khona, ahlale kuwo, aze afe umpristi omkhulu owagcotshwa ngamagcobo angcwele.

26Kodwa uba umbulali ephumela ngaphandle komkhawulo womuzi wokuphephela abalekele kuwo,

27umphindiseli wegazi emfica ngaphandle komkhawulo womuzi wakhe wokuphephela, ambulale, kayikuba lacala legazi.

28Ngoba yena ngabe uhlala emzini wakhe wokuphephela, aze afe umpristi omkhulu; kodwa emva kokufa kompristi omkhulu umbulali angabuyela elizweni lakhe.

29Izinto lezi zizakuba yimithetho kini, ezizukulwaneni zenu zonke, kuyo yonke imizi yenu.

Umlayo omayelana labafakazayo lenhlawulo

30Uba umuntu ebulala omunye, umbulali uzabulawa nxa kulabofakazi; kodwa umuntu kayikubulawa ngobufakazi bomuntu munye nje.Dute 17:6; 19:15

31Futhi kaliyikwamukela inhlawulo endaweni yempilo yombulali olecala lokubulawa; kabulawe.

32Kaliyikwamukela inhlawulo ngaye ophephele emzini wokuphephela, ukuze abuyele elizweni, engakafi umpristi omkhulu.

33Kaliyikungcolisa ilizwe elihlala kilo; ngoba igazi lingcolisa ilizwe; kayikho inhlawulo yokuhlawula ilizwe ngegazi elichithekile kulo, kuphela ngegazi lomuntu olichithileyo.

34Kaliyikungcolisa ilizwe lenu, ilizwe engihlala kulo; ngoba mina Nkosi ngihlala phakathi kwabakoIsrayeli.