Isa 65 - Ndebele Bible (iBhayibhili Elingcwele) 1978

Abavukela iNkosi bazakutshaywa

1INkosi yathi: Ngangilungele ukudingwa yilaba abangangicelanga;

ngangilungele ukufunyanwa yilabo abangangidinganga.

Ngathi: Ngilapha, ngilapha;

kuso isizwe esasingakhuleki ebizweni lami.

2Ngelula izandla zami usuku lonke kubo abantu abahlamukayo,

abahamba ngendlela engalunganga,

belandela imicabango yabo;

3abantu abangithukuthelisayo njalonjalo,

besenza imihlatshelo emasimini,

betshisa impepha phezu kwezitina;

4abahlala emalibeni bekhonza imimoya emibi,

balala endaweni ezisithekileyo,

badle inyama yengulube,

benatha umhluzi wokunengekayo emiganwini yabo;

5abathi: Ungasondeli kimi,

ngoba ngahlukanisiwe lawe.

Laba banjengentuthu emakhaleni ami,

lomlilo otshisayo usuku lonke.

6Khangela, kulotshiwe phambi kwami ukuthi:

Kangiyikuthula, kodwa ngizakuphindisela,

yebo, ngizaphindisela

7ububi babo lobubi baboyise kanyekanye, itsho iNkosi.

Ngoba batshisa impepha phezu kwezintaba,

bangithuka phezu kwamaqaqa,

ngizabaphindisela ngokubafaneleyo.

8INkosi ithi: Lapho ihlukuzo lezithelo zevini lilewayini elihle,

abantu bathi: Ungaloni, ngoba liphethe isibusiso;

ngakhoke ngenxa yenceku zami kangiyikubhubhisa bonke abantu.

9Ngizamvezela abantwana uJakobe,

ngimvezele loJuda izindlalifa zentaba zami;

okhethiweyo wami uzakwakha khona,

lezinceku zami zihlale khona.

10ISharoni izakuba lidlelo lemihlambi,

lesihotsha saseAkori sibe yisibaya sezinkomo zabantu bami abangidingayo.

11Kodwa lina elitshiya iNkosi,

likhohlwe intaba yami engcwele,

liphakulele unkulunkulu uNhlanhla ukudla,

limgcwalisele inkezo ngewayini elixutshiweyo unkulunkulu uSimiselo,

12ngizakulimisela umkhonto,

lonke lizakhothamela ukuhlatshwa;

ngoba kwathi lapho ngilibiza, kalasabele,

lalapho ngikhuluma, kalilalelanga,

kodwa lenza okubi emehlweni ami,

lakhetha lokho engingakuthandiyo.

13Ngakhoke iNkosi uNkulunkulu ithi:

Inceku zami zizakudla, kodwa lina lizalamba:

inceku zami zizanatha, kodwa lina lome;

inceku zami zizathokoza, lina liyangeke;

14yebo, inceku zami zizahlabela ngokuthokoza,

kodwa lina likhale ngenxa yokudabuka kwenhliziyo,

lilile ngenxa yobuhlungu bomoya.

15Ibizo lenu lizasetshenziswa njengesiqalekiso ngabakhethiweyo bami,

leNkosi uNkulunkulu izakulibulala;

kodwa inceku zayo izakuzibiza ngelinye ibizo,

16kuze kuthi lowo ozibusisayo emhlabeni

azibusise ngoNkulunkulu weqiniso,

lalowo ofungayo emhlabeni afunge ngoNkulunkulu weqiniso;

ngoba inhlupheko zakuqala sezikhohlakele,

zisithekile emehlweni ami.

Izulu elitsha lomhlaba omutsha

17Khangela, ngiyadala izulu elitsha lomhlaba omutsha,

izinto zakuqala kazisayikukhunjulwa,

kazisayikuphinda zifike engqondweni.

18Jabulani, lithokoze njalonjalo ngalokhu engikudalayo,

ngoba ngenza iJerusalema libe yintokozo,

labantu balo babe yinjabulo.

19Ngizathokoza ngeJerusalema, ngijabule ngabantu bami;

kakusayikuzwakala kulo ilizwi lokukhala lelizwi lokulila.

20Kusukela lapho kakusayikuba khona ofa ebantwaneni,

lixhegu elingaphelelisi insuku zalo,

ngoba ofa eselekhulu leminyaka kuzakuthiwa mutsha,

lalowo ongafinyeleli ekhulwini leminyaka uzabe ngoqalekisiweyo.

21Abantu bazakwakha izindlu, bahlale kuzo,

bahlanyele izivini, badle izithelo zazo.

22Kabayikwakha, kuhlale omunye;

kabayikuhlanyela, kudle omunye;

ngoba insuku zabantu bami zizakuba njengensuku zesihlahla,

labakhethiweyo bami bazakudla izithelo zomsebenzi wabo.

23Kabayikusebenzela ize,

loba bazalele abantwana ukuhlupheka;

ngoba bazakuba yinzalo yababusisiweyo beNkosi,

kanye labantwana babo emva kwabo.

24Kuzakuthi bengakakhuleki kimi ngibaphendule,

lalapho besakhuluma ngizwe.

25Impisi izakudla ndawonye lewundlu,

lesilwane sidle utshani njengenkomo,

lothuli lube yikudla kwenyoka.

Kaziyikulimaza, zibhubhise, kuyo yonke intaba yami engcwele,

itsho iNkosi.