Isa 42 - Ndebele Bible (iBhayibhili Elingcwele) 1978

Inceku yeNkosi

1INkosi ithi: Khangela inceku yami engiyisekelayo,

okhethiweyo wami, othokoza ngaye umphefumulo wami;

ngibekile umoya wami phezu kwakhe,

ukuze alethele izizwe ukulunga.

2Kayikumemeza, adazuluke, azwakalise ilizwi lakhe ezindleleni.

3Umhlanga ofecekileyo kayikuwephula,

lentambo yesibane ethunqayo kayikuyicitsha;

uzakuletha ukulunga okuyikho.

4Kayikudinwa aphele amandla,

aze amise ukulunga emhlabeni;

lamazwe angasolwandle azakulindela umlayo wakhe.

5Utsho kanje uNkulunkulu, iNkosi,

owadala iphezulu, walendlala,

lowenza umhlaba lalokho okukuwo,

lonika abantu abakuwo umphefumulo,

lomoya kwabahamba kuwo,

6uthi: Mina Nkosi, ngikubizile ngokulunga,

ngakubamba ngesandla, ngakulondoloza.

Ngawe ngenza isivumelwano labantu bonke,

ngakubeka ube yikukhanya ezizweni,

7ukuba uvule amehlo eziphofu,

ukhuphe izibotshwa entolongweni,

lasesiseleni esimnyana abahlezi kuso.

8NgiyiNkosi, yilo lelo ibizo lami;

kangiyikunika omunye ubukhosi bami,

lezithombe ezibaziweyo udumo lwami.

9Izinto engazibikezela kuqala sezifikile;

sengimemezela izinto ezintsha;

zingakaveli ngiyakutshela ngazo.

Ingoma entsha yokudumisa iNkosi

10Hlabelelani iNkosi ingoma entsha,

liyidumise emhlabeni wonke.

Luhlokome ulwandle lakho konke okukilo,

lamazwe angasolwandle, labo abakhe kiwo.

11Inkangala kanye lemizi ekiyo kujabule,

lemizi yabakoKedari;

batshotshe ngokuthokoza abakhileyo baseSela,

benanele besezingqongeni zezintaba.

12Kabayidumise iNkosi,

bamemezele udumo lwayo emazweni angasolwandle.

13INkosi iyaphuma njengeqhawe,

itshisekela ukulwa njengendoda yempi;

iyamemeza isiga sempi,

izinqobe izitha zayo.

14Sekuyisikhathi eside ngithule, kutsho iNkosi,

ngithule ngazibamba;

khathesi sengizakukhala njengowesifazana obelethayo,

ngikhefuzele kakhulu.

15Ngizakubhidliza izintaba lamaqaqa,

ngomise konke okuluhlaza okukuzo,

ngiphendule imifula ibe yinkangala,

ngomise leziziba zayo.

16Ngizakhokhela iziphofu ezindleleni ezingayaziyo,

ngiziqondise ezindleleni ezingazaziyo,

ngiphendule umnyama phambi kwazo ube yikukhanya,

ngihlelembe lezindawo ezingamaxhakaxhaka.

Yizo lezizinto engizakuzenza, ngingaziyekeli.

17Labo abathemba izithombe abathi zingonkulunkulu babo bazakwehliswa bayangeke.

UIsrayeli wahlupheka ngenxa yokungalaleli umlayo weNkosi

18INkosi ithi: Zwanini lina zacuthe,

likhangele lani ziphofu ukuze libone.

19Kambe ngubani oyisiphofu ukwedlula inceku yami,

loyisacuthe njengesigijimi sami engisithumayo?

Ngubani oyisiphofu njengothembekileyo wami,

oyisiphofu njengenceku yeNkosi na?

20Iyabona izinto ezinengi, kodwa kayiziqaphelisi;

indlebe zayo zivulekile, kodwa kayizwa.

21Kwayithokozisa iNkosi ngenxa yokulunga kwayo

ukuba ikhulise umlayo wayo, iwenze ube lodumo.

22Kodwa nampa abantu abaphangiweyo,

bavalelwa eziseleni, bafihlwa ezintolongweni;

bangabokuphangwa, kungabi khona obalamulelayo;

yebo, bayimpango, kungabi khona othi: Buyiselani.

23Ngubani phakathi kwenu ozakulalela lokhu,

aqaphelisise ukuze azwele isikhathi esizayo na?

24Ngubani owanikela uJakobe kumphangi na?

loIsrayeli kwabaphangayo na?

Kwakungesiyo iNkosi esone kuyo yini,

esingavumanga ukuhamba endleleni zayo,

lesingalalelanga umlayo wayo na?

25Yehlisela phezu kwakhe ukuvutha kolaka lwayo lamandla empi;

yamfaka phakathi komlilo, kodwa kaqedisisanga;

yamtshisa, kodwa kalalelanga.