2 Kho 2 - Ndebele Bible (iBhayibhili Elingcwele) 1978

UElija wenyukela ezulwini

1Kwathi iNkosi isizathatha uElija imuse ezulwini ngesivunguzane, uElija loElisha babehamba bevela eGiligali.

2UElija wathi kuElisha: Akusale lapha, ngoba iNkosi ingithumile eBetheli. Kodwa uElisha wathi: Ngifunga iNkosi uNkulunkulu kanye lawe, kangiyikwahlukana lawe. Basebesiyake eBetheli.

3Ixuku labaprofethi ababeseBetheli leza kuElisha, lathi kuye: Uyazi yini ukuthi iNkosi uNkulunkulu izakukuthathela inkosi yakho lamhla na? Yena wathi: Yebo, ngiyazi, thulani lina.

4UElija wasesithi kuElisha: Akusale lapha, ngoba iNkosi ingithumile eJeriko. Kodwa yena wathi: Ngifunga iNkosi uNkulunkulu kanye lawe, kangiyikwahlukana lawe. Basebefika eJeriko.

5Ixuku labaprofethi ababeseJeriko leza kuElisha, lathi kuye: Uyazi yini ukuthi lamhla iNkosi uNkulunkulu izakukuthathela inkosi yakho na? Yena wathi: Yebo, ngiyazi; thulani lina.

6UElija wasesithi kuye: Akusale lapha, ngoba iNkosi isangithumile eJordani. Kodwa yena wathi: Ngifunga iNkosi uNkulunkulu kanye lawe, kangiyikwahlukana lawe. Basebehamba bobabili.

7Amadoda angamatshumi amahlanu exukwini labaprofethi abalandela, ema bucwala labo, bona bobabili besemi ngaseJordani.

8UElija wasethatha ingubo yakhe, wayigoqa, watshaya amanzi ngayo, adabuka phakathi, bobabili bachapha emhlabathini owomileyo.

9Sebechaphile uElija wathi kuElisha: Cela engingakwenzela khona ngingakususwa kuwe. UElisha wathi: Ngicela ukuba unginike isabelo esiphindwe kabili somoya wakho.Dute 21:17

10Yena wathi: Ucele ulutho olulukhuni; kodwa uba ungibona lapha ngisuswa kuwe, kuzakuba njengokucela kwakho; uba ungangiboni, kakuyikuba njalo.

11Besahamba belokhu bekhuluma, kwafika inqola yokulwa yomlilo lamabhiza omlilo kwabehlukanisa. UElija wenyukela ezulwini ngesivunguzane.

12Kwathi uElisha ekubona lokhu wamemeza wathi: Baba! Baba! inqola yakoIsrayeli labamabhiza ayo! Kazabe esambona. Wasedabula izigqoko zakhe, zaba yiziqa ezimbili.2 Kho 13:14

13Wadobha ingubo kaElija ebiwile, wabuyela emuva, wema okhunjini lweJordani.

14Wasetshaya amanzi ngengubo kaElija ebiwile kuye esithi: Ingaphi iNkosi, uNkulunkulu kaElija na? Kwathi esewatshayile amanzi, adabuka phakathi; wasewela.

UElisha ungumprofethi

15Kwathi ixuku labaprofethi ababeseJeriko bembona echapha esiza bathi: Umoya kaElija usungenile kuElisha. Bamhlangabeza, bakhothama phambi kwakhe.

16Bathi kuye: Inceku zakho zilamadoda aqinileyo angamatshumi amahlanu; akuwavumele ahambe ayedinga inkosi yakho; mhlawumbe umoya weNkosi uNkulunkulu umthethe wamphosela entabeni ethile, loba esihotsheni esithile. Yena wathi: Atshi bo, lingabathumi.

17Bamphikelela waze wadinwa; wasesithi: Bathumeni. Basebewathuma amadoda angamatshumi amahlanu; amdinga uElija insuku ezintathu, kodwa amswela.

18Abuyela kuye esesekhona eJeriko, yena wathi kuwo: Kangitshongo yini kini ukuthi lingahambi?

19Abantu bomuzi bathi kuElisha: Indawo yalumuzi yinhle njengoba inkosi yethu izibonela; kodwa amanzi akhona mabi, lomhlabathi kawuvundanga.

20Yena wathi: Ngilethelani umganu omutsha, lifake itshwayi phakathi kwawo. Basebewuletha.

21Wasesiya emthonjeni, waphosela itshwayi phakathi kwawo esithi: INkosi ithi: Sengiwenzile aba mahle lamanzi; kakusayikuba khona ukufa lokuphunza okuzabangwa yiwo.

22Amanzi asesiba mahle kwaze kwaba lamuhla, njengokutsho kukaElisha.

23Wasuka lapho, waya eBetheli; kwathi esahamba endleleni kwaphuma okungabafanyana okuthile emzini, kwamhleka kusithi: Hamba, wena mpandla ndini! Hamba, wena mpandla ndini!

24Wanyemukula, wathi ukuba ababone wabaqalekisa ngebizo leNkosi. Kwaphuma ehlathini amabhere amabili amasikazi, abulala abangamatshumi amane lambili kulabo abafanyana.

25Wasuka lapho, waya entabeni iKarmeli, wasebuyela eSamariya.