Hubo 97 - Ndebele Bible (iBhayibhili Elingcwele) 1978

Ukubusa lamandla eNkosi

1INkosi iyabusa; kawuthokoze umhlaba,

ajabule wonke amazwe angasolwandle.

2Iphahliwe ngamayezi lomnyama;

ukulunga lokwahlulela kuyisisekelo sesihlalo sayo sobukhosi.

3Umlilo uyavutha phambi kwayo,

utshise izitha zayo inxa zonke.

4Imibane yayo iyakhanyisa umhlaba;

umhlaba uyakubona, uthuthumele.

5Izintaba ziyancibilika njengengcino phambi kweNkosi,

phambi kweNkosi yomhlaba wonke.

6Amazulu ayatshumayela ukulunga kwayo;

labantu bonke bayayibona inkazimulo yayo.

7Bayayangeka bonke abakhonza izithombe,

abazikhukhumeza ngezithombe eziyize;

onkulunkulu bonke bayakhothama phambi kwayo.

8IZiyone liyezwa, lithokoze,

labakoJuda bayathaba ngenxa yezahlulelo zakho, Nkosi.

9Ngoba wena, Nkosi, ungoPhezukonke emhlabeni wonke,

uyabedlula onkulunkulu bonke.

10INkosi iyabathanda labo abazonda okubi;

iyagcina ukuphila kwabangcwele bayo,

ibakhulule esandleni somubi.

11Ukukhanya kuyabaphumela abalungileyo,

lokuthokoza abanhliziyo eqotho.

12Thokozani eNkosini, lina balungileyo,

libonge ibizo layo elingcwele.