Gal 2 - Ndebele Bible (iBhayibhili Elingcwele) 1978

Umsebenzi kaPawuli wavunyelwa ngabaphostoli baseJerusalema

1Kwathi emva kweminyaka elitshumi lane ngaya futhi eJerusalema kanye loBarnabasi, ngathatha loTitosi futhi.Seb 11:30; 15:2

2Ngaya khona ngoba ngambulelwa nguNkulunkulu ukuba ngiye khona. Ngabalandisela ngevangeli engilitshumayela phakathi kwabezizwe, kodwa ngakwenza lokhu phambi kwabadumileyo bebodwa, funa mhlawumbe kungaba yikuthi ngigijimela ize, loba sengagijimela ize.

3Kodwa ngitsho loTitosi owayelami engumGriki kacindezelwanga ukuba asoke.

4Kodwa kwaba ngenxa yabazalwane bamanga abangeniswa ngensitha, abangena ngokunyenya ukuba bahlole ukukhululeka kwethu esilakho kuKristu Jesu, ukuze basenze izigqili.

5Kasibathobelanga ngokuzehlisela ngaphansi kwabo ngitsho okwesikhatshana nje, ukuze iqiniso levangeli lime njalo kini.

6Kodwa labo okuthiwa ngabadumileyo — loba bengobani kakutsho lutho kimi; uNkulunkulu kakhethi muntu — ngithi labo abadumileyo kabangelekelelanga ngalutho;Dute 10:17

7kodwa babona ukuthi nginikiwe ukutshumayela ivangeli kwabezizwe njengoPetro owanikwa ukutshumayela ivangeli kubaJuda.

8Ngoba uNkulunkulu owenza ukuba uPetro abe ngumphostoli wabaJuda wangenza lami ukuba ngibe ngumphostoli wabezizwe.

9Ngakhoke, bathi ukubona umusa engiwuphiweyo, oJakobe loKefasi loJohane abadume ngokuthi zinsika zebandla, banika mina loBarnabasi isandla sokunene sobudlelwano ukuba thina siye kwabezizwe, bona baye kubaJuda.

10Bacela lokhu kuphela ukuba sikhumbule abayanga, into lami engangikhuthalele ukuyenza.

UPawuli umelana loPetro. Umlayo kawulungisisi muntu

11Kodwa ekufikeni kukaKefasi eAntiyoki ngamelana laye ubuso lobuso, ngoba wayesoleka.

12Ngoba bengakafiki abathile abavela kuJakobe, wayesidla labezizwe; kodwa kuthe ukuba bafike, wamonyuka, wahlukana labo esesaba abokusoka.

13Labanye abaJuda bazenzisa kanye laye, waze wathatheka loBarnabasi ngokuzenzisa kwabo.

14Kodwa kuthe sengibonile ukuba kabahambi ngokweqiniso levangeli, ngathi kuKefasi phambi kwabo bonke: Uba wena ungumJuda, uhamba ngokwabezizwe ungahambi ngokwabaJuda, ungabacindezela kanjani abezizwe ukuba bahambe ngokwabaJuda na?

15Thina singabaJuda ngemvelo, kasisibo abezizwe, izoni.

16Kodwa siyazi ukuthi umuntu kalungisiswa ngemisebenzi yomlayo, kuphela ngokukholwa kuKristu Jesu; lathi sakholwa kuKristu ukuba silungisiswe ngokukholwa kuKristu kungesikho ngemisebenzi yomlayo; ngoba ngemisebenzi yomlayo kakuyikulungisiswa muntu.Hubo 143:2; Roma 3:20, 22

17Kodwa lapho sifuna ukulungisiswa ngoKristu, thina uqobo sifunyaniswe siyizoni, kanti uKristu uyisisebenzi sesono na? Phinde!

18Ngoba uba ngibuye ngakhe lokho engikudilizileyo, ngitshengisa ukuba ngingoweqa umlayo.

19Ngoba ngomlayo mina ngafa kuwo umlayo, ukuba ngiphilele uNkulunkulu.

20Ngibethelwe kanye loKristu; kakuseyimi ophilayo, kodwa uKristu uphila kimi; ukuphila engikuphila khathesi ngikuphila ngokukholwa iNdodana kaNkulunkulu eyangithandayo, yazinikela ngenxa yami.

21Kangiwutshayi ize umusa kaNkulunkulu, ngoba uba ukulunga kungomlayo, uKristu wafela ize.