1Lawomadoda amathathu aseyekela ukumphendula uJobe, ngoba wayecabanga ukuthi yena ulungile.
2Wasethukuthela uElihu indodana kaBarakeli waseBuzi, owosendo lukaRamu. Wathukuthelela uJobe ngoba ezitshaya olungileyo kuloNkulunkulu.
3Wabathukuthelela abangane bakaJobe abathathu ngoba bahluleka ukumphendula uJobe, benza ukuba uNkulunkulu abonakale engaqondanga.
4UElihu wayethule ukukhuluma loJobe ngoba babebadala kulaye.
5Kodwa lapho esebonile ukuba lababantu abathathu bayehluleka ukumphendula uJobe wathukuthela.
6Ngakho wasekhulumake uElihu indodana kaBarakeli waseBuzi, esithi:
Mina ngisemutsha ngeminyaka, lina libadala.
Ngakho bengilenhloni, ngesaba ukulitshela umcabango wami.
7Ngathi: Kakukhulume abadala,
abaleminyaka eminengi, bafundise ukuhlakanipha.
8Kodwa umoya kaNkulunkulu ukhona emuntwini,
lokuphefumula kukaSomandla kuyamnika umuntu ukuqedisisa.
9Kayisibo bodwa abadala abahlakaniphileyo,
labalupheleyo bodwa abaqedisisayo okulungileyo.
10Ngakhoke ngithi: Ake lingilalele,
lami ngitsho owami umcabango.
11Khangelani, ngiwalindele amazwi enu,
ngalalela ukukhuluma kwenu okuhlakaniphileyo,
lisadinga lokho elingakutsho.
12Ngalilalela lina, kakho loyedwa omehluleyo uJobe,
lowaphenduleyo amazwi akhe phakathi kwenu.
13Qaphelani ukuba lingatsho ukuthi: Sifumene ukuhlakanipha;
nguNkulunkulu ozamahlula, hayi umuntu.
14Kangiyikuphikisana laye njengani,
loba ngimphendule njengokumphendula kwenu.
15Behlulekile, kabasaphenduli,
kabaselalizwi lelilodwa.
16Ngibalindele yini uba bengakhulumi na?
Bemi, kabasaphenduli.
17Lami sengizakuphendula,
ngitsho umcabango wami.
18Ngoba ngigcwele amazwi,
umoya okimi uyangiqhubezela.
19Inhliziyo yami injengokugcwele iwayini okungelambobo,
njengemigodla emitsha yewayini esizakudabuka.
20Kuhle ngikhulume ukuze ngibhodle,
ngivule umlomo wami ngiphendule.
21Kangiyikukhetha umuntu,
loba ngimkhukhumeze nje.
22Ngoba kangikwazi ukukhukhumeza,
futhi uMenzi wami angangisusa masinyane.
Who We AreWhat We EelieveWhat We Do
2025 by iamachristian.org,Inc All rights reserved.
