Hubo 58 - Ndebele Bible (iBhayibhili Elingcwele) 1978

Ukucela ukuba ababi bachithwe

1Imbala liyahlulela ngokulungileyo lina bakhulu na?

Liyabahlulela abantu ngeqiniso na?

2Ingani enhliziyweni zenu lithama okubi,

lezandla zenu zenza okubi emhlabeni.

3Ababi balahleka kusukela esiswini,

bayaphambuka kusukela ekuzalweni kwabo, beqamba amanga.

4Ubuhlungu babo bunjengobuhlungu benyoka,

banjengebululu elingezwayo, elivimba indlebe zalo,

5ukuze lingezwa ilizwi lezinyanga ezilumba amalumbo ngokuhlakanipha.

6Nkulunkulu, yaphula amazinyo omlomo wabo,

uphohloze amazinyo emihlathi yezilwane, Nkosi.

7Kabanyamalale njengamanzi agelezayo;

njengotshani kabanyathelwe phansi babune.

8Kababe njengomnenke oncibilika uphele;

kababe njengomphunzo ongasoze ubone ilanga.

9Imbiza zenu zingakafudumali ngomlilo wameva

aluhlaza ingabe avuthayo, uzakubaphephula bona.

10Olungileyo uzakuthokoza lapho ebona impindiselo,

uzakugezisa inyawo zakhe egazini lababi.

11Abantu bazakuthi: Impela ukhona umvuzo wolungileyo,

impela ukhona uNkulunkulu owahlulela umhlaba.