1 Kho 11 - Ndebele Bible (iBhayibhili Elingcwele) 1978

Ukuduha kukaSolomoni

1Inkosi uSolomoni yayithanda abafazi abanengi bezizweni, kanye lendodakazi kaFaro, yathatha labesifazana baseMowabi labaseAmoni labaseEdoma labaseSidoni labamaHethi,Dute 17:17

2ababevela ezizweni iNkosi eyayikhulume ngabo kwabakoIsrayeli yathi: Kaliyikuthathana lazo, ngoba impela zizakuphendula inhliziyo zenu, zilandele onkulunkulu bazo. Phoke, uSolomoni wayebathanda kakhulu.Eks 34:16; Dute 7:3–4

3Wayelabafazi abangamakhulu ayisikhombisa ababengamakhosikazi, labanye abafazi abangamakhulu amathathu; baphambukisa inhliziyo yakhe kuNkulunkulu.

4Ngoba kwathi uSolomoni eseluphele abafazi bakhe baphambulela inhliziyo yakhe kwabanye onkulunkulu, kayaze yabambelela ngokupheleleyo eNkosini uNkulunkulu wakhe njengenhliziyo kayise uDavida.

5Ngoba uSolomoni walandela uAshitorethi unkulunkulukazi waseSidoni, loMilkomu unkulunkulu onengekayo wamaAmoni.

6Wenza okubi phambi kweNkosi, kayilandelanga ngokupheleleyo iNkosi njengoyise uDavida.

7Wakhela uKemoshi unkulunkulu onengekayo wamaMowabi indawo ephakemeyo yokukhonzela, phezu kwentaba ngasempumalanga kweJerusalema, loMoloki unkulunkulu onengekayo wamaAmoni.

8Wabenzela njalo bonke abafazi bakhe bezizweni ababetshisa impepha, behlabela onkulunkulu babo.

9INkosi yamthukuthelela uSolomoni, ngoba inhliziyo yakhe yayiphambukile eNkosini, uNkulunkulu kaIsrayeli, eyayibonakele kuye kabili,

10yamlaya ukuba angalandeli abanye onkulunkulu; kodwa yena kakulalelanga lokhu okwatshiwo yiNkosi.

11Ngakho iNkosi yathi kuye: Ngoba ukwenzile lokhu, ungagcinanga isivumelwano sami lezimiso zami engakulaya zona, ngizahluthuna impela umbuso kuwe, ngiwunike inceku yakho.

12Kantike ngenxa kayihlo uDavida kangiyikukwenza ensukwini zakho, ngizakuwuhluthuna esandleni sendodana yakho.

13Kodwake kangiyikuwuhluthuna wonke; ngizamnika umntanakho isizwe sibe sinye ngenxa kaDavida inceku yami langenxa yeJerusalema engilikhethileyo.

Izitha zikaSolomoni

14INkosi yasimvusela uSolomoni isitha, uHadadi waseEdoma owayengowendlu yobukhosi eEdoma.

15Kwathi uDavida eseEdoma, uJowabi induna yempi wayangcwaba ababuleweyo, wabulala bonke abesilisa baseEdoma.

16— ngoba uJowabi labo bonke abakoIsrayeli bahlala khona inyanga eziyisithupha, waze waqeda bonke abesilisa baseEdoma —

17Kodwa uHadadi wabalekela eGibithe kanye labathile abaseEdoma ababeyizinceku zikayise, wayesesengumntwana omncinyane.

18Basuka eMidiyani, bayafika eParani, bathatha khona abantu abathile baya eGibithe, kuFaro inkosi yaseGibithe owanika uHadadi indlu lesabelo sokudla, wamnika lendawo.

19UHadadi wathandeka kakhulu kuFaro, waze wamendisela udadewabo womkakhe, udadewabo kaTapenesi inkosikazi.

20Wamzalela indodana uGenubathi, uTapenesi wamkhulisela endlini kaFaro, wahlala khona labantwana bakaFaro.

21Kwathi uHadadi esezwile eseGibithe ukuthi uDavida kasekho lokuthi uJowabi induna yempi sewafa, wathi kuFaro: Ake ungivumele ukuba ngiye elizweni lakithi.

22UFaro wathi kuye: Usweleni lapha ukuba ufise ukuya elizweni lakini na? Yena wathi kuFaro: Atshi, ngivumela nje ngihambe.

23UNkulunkulu wabuya wamvusela uSolomoni esinye isitha, uRezoni indodana kaEliyada owayebalekile enkosini yakhe uHadadezeri inkosi yaseZoba.

24Yena wazibuthela abantu, waba ngumkhokheli wexuku lezigebengu; baya eDamaseko, bahlala khona, bamenza inkosi khona.

25Yena waba yisitha sabakoIsrayeli insuku zonke zikaSolomoni, wenza okubi njengoHadadi owazonda uIsrayeli waba yinkosi yaseEdoma.

26UJerobowamu indodana kaNebati owakoEfrayimi waseZereda owayeyinceku kaSolomoni, unina kwakuthiwa nguZeruwa engumfelwakazi, laye wayivukela inkosi.

27Yilokhu okwenza ayivukele inkosi. Kwathi uSolomoni esakha idundulu elithiwa yiMilo, wavala isikhala somuzi kayise uDavida.

28UJerobowamu wayengumuntu ohlakaniphileyo. Kwathi uSolomoni embona ukuthi ukhuthele, wambeka induna yazo zonke izibhalwa zakoJosefa.

29Ngolunye usuku uJerobowamu waphuma eJerusalema, umprofethi uAhija owaseShiloni wamfica endleleni. UAhija wayegqoke isigqoko esitsha; babebobabili egangeni.

30UAhija wasethatha isigqoko esitsha asigqokileyo, wasidabula iziqa ezilitshumi lambili,

31wathi kuJerobowamu: Zithathele lapha iziqa ezilitshumi, ngoba iNkosi, uNkulunkulu kaIsrayeli, ithi: Khangela, sengizahluthuna umbuso esandleni sikaSolomoni, ngikunike izizwe ezilitshumi.

32Kodwa yena uzasala lesizwe esisodwa ngenxa yenceku yami uDavida langenxa yeJerusalema, umuzi engiwukhethileyo ezizweni zonke zakoIsrayeli.

33Ngizakwenza lokhu ngoba ungitshiyile, wakhonza uAshitorethi unkulunkulukazi waseSidoni, loKemoshi unkulunkulu waseMowabi, loMilkomu unkulunkulu wamaAmoni, kahambanga ngendlela zami, enze okuhle phambi kwami, elondoloza izimiso zami lemithetho yami njengoyise uDavida.

34Kodwa loba kunjalo kangiyikuwususa wonke umbuso esandleni sakhe; uzabusa zonke insuku zokuphila kwakhe ngenxa kaDavida inceku yami engamkhethayo owagcina imilayo yami lezimiso zami.

35Ngizawususa umbuso esandleni sendodana yakhe, owezizwe ezilitshumi, ngiwunike wena.

36Ngizanika indodana yakhe isizwe sibe sinye ukuba uDavida inceku yami ahlale elesibane phambi kwami eJerusalema, umuzi engawukhethayo ukuba ibizo lami lidunyiselwe khona.

37Ngizakukubeka ukuba ubuse phezu kwakho konke okuthandayo ube yinkosi yakoIsrayeli.

38Uba ulalela konke engikulaya khona, uhambe ngendlela zami, wenze okulungileyo phambi kwami, ugcine izimiso zami lemilayo yami njengoDavida inceku yami, ngizakuba lawe, ngiwuqinise umbuso wakho njengokaDavida; ngizakukunika uIsrayeli,

39ngihluphe inzalo kaDavida, kodwa kungabi kokuphela.

40USolomoni wazama ukumbulala uJerobowamu, kodwa yena wasuka wabalekela eGibithe, kuShishaki inkosi yaseGibithe, wahlala khona, waze wafa uSolomoni.

Ukufa kukaSolomoni

41Ezinye indaba zikaSolomoni, lakho konke akwenzayo, lokuhlakanipha kwakhe, kulotshiwe ogwalweni lwezindaba zikaSolomoni.2 Lan 9:29–31

42Isikhathi uSolomoni abusa ngaso eJerusalema uIsrayeli wonke saba yiminyaka engamatshumi amane.

43Waya kwabaphansi, wangcwatshelwa emzini kaDavida, loRehobowamu indodana yakhe waba yinkosi esikhundleni sakhe.