Dute 23 - Ndebele Bible (iBhayibhili Elingcwele) 1978

Abangavunyelwa ukungena ebandleni leNkosi

1Umuntu olimele emasendeni, loba oqunywe amaphambili, angangeni ebandleni leNkosi.

2Ozelwe ngobufebe angangeni ebandleni leNkosi, longowenzalo yakhe kayikungena, kuze kube sesizukulwaneni setshumi.

3Umuntu waseAmoni lowaseMowabi lenzalo yabo bangangeni ebandleni leNkosi kuze kube sesizukulwaneni setshumi;Neh 13:1, 2

4ngoba kabalihlangabezanga endleleni ukulinika ukudla lamanzi ekuphumeni kwenu eGibithe; futhi baqatsha uBalami indodana kaBeyori owasePethori laseMesopotamiya ukuba aliqalekise.Nani 22:1–6

5Kodwake iNkosi uNkulunkulu wenu kayimlalelanga uBalami, yaphendula isiqalekiso saba yisibusiso kini, ngoba yalithanda.Nani 23:7—24:9

6Kalisoze libenzele ukuthula lenhlanhla zonke insuku zenu, kuze kube nini lanini.

7Lingazondi owaseEdoma, ngoba ungumfowenu; lingazondi umGibithe, ngoba lalihlala elizweni lakibo.

8Abantwana besizukulwana sesithathu abazalwa yibo bangangena ebandleni leNkosi.

Ukuhlambuluka kwamathente

9Lapho lisezihonqweni, lisilwa lezitha zenu, lizakuzigcina kukho konke okubi.

10Uba ekhona phakathi kwenu umuntu ongahlambulukanga ngenxa yokwenzeke kuye ebusuku, uzakuphumela ngaphandle kwezihonqo, angangeni kuzo;

11kusihlwa uzakugeza ngamanzi, abuyele ezihonqweni lapho ilanga selitshonile.

12Kakube khona indawo ngaphandle kwezihonqo yokuyela ngaphandle,

13libe lezimbo phakathi kwezikhali zenu; nxa lisiya ngaphandle limbe ngazo, ligqibele ngomhlabathi amaphumelo.

14Ngoba iNkosi uNkulunkulu wenu iyahamba phakathi kwezihonqo zenu, ukuba ililondoloze, inikele izitha zenu kini. Ngakhoke izihonqo zenu kazibe ngcwele, ukuba ingaboni lutho olungahlambulukanga phakathi kwenu, ilifulathele.

Imilayo emayelana lezigqili, lamawule, lomvuzo

15Lingasibuyiseli kumniniso isigqili esibalekele kini;

16sizakuhlala phakathi kwenu, endaweni esiyikhethayo, komunye wemizi yenu lapho sithanda khona; lingasixotshi.

17Kakungabi khona iwule elethempeli phakathi kwabesifazana bakoIsrayeli, kungabi lomunye wamadoda akoIsrayeli ophingayo.Levi 19:29

18Lingalethi amaholo ewule lemali yokuphinga kwamadoda endlini yeNkosi uNkulunkulu wenu ukuba ligcwalise isithembiso ngayo; ngoba lezizinto ziyisinengiso eNkosini uNkulunkulu wenu.

19Lingeboleki umfowenu ukuzuza inzalo yemali, loba umvuzo wokudla, loba umvuzo walokho okwebolekwa ngomvuzo.Eks 22:25; Levi 25:36, 37; Dute 15:7–11

20Lingeboleka owezizweni ngomvuzo, kodwa lingeboleki umfowenu ngomvuzo, ukuba iNkosi uNkulunkulu wenu ilibusise kukho konke elizakukwenza elizweni elingena kulo ukulithumba.

21Nxa lisenza isithembiso eNkosini uNkulunkulu wenu, lingalibali ukusigcwalisa; ngoba impela iNkosi uNkulunkulu wenu izakukubiza kini; ukungasigcwalisi kuzakuba yisono senu.Nani 30:1–16; Mat 5:33

22Kodwa uba ungathembisanga, kawuyikuba lesono.

23Nanzelelani ukuba lenze lokho elikukhulume ngomlomo wenu; ngoba lokho elikuthembise ngomlomo wenu likuthembisile ngokuvuma eNkosini uNkulunkulu wenu.

24Nxa lingena esivinini somakhelwana wenu, lingadla izithelo zevini lize lisuthe njengokuthanda kwenu; kodwa lingazikheli esitsheni senu.

25Nxa lingena ensimini yomakhelwana elamabele, lingazikha izikhwebu ngesandla; kodwa lingawaqumi amabele akhe ngesikela.