Jer 12 - Ndebele Bible (iBhayibhili Elingcwele) 1978

Ukusola kukaJeremiya

1Ulungile, wena Nkosi, loba ngisola kuwe;

kanti ngizabeka ukusola kwami phambi kwakho.

Kungani indlela yababi iphumelela na?

Kungani bephumelela bonke ababi?

2Uyabahlanyela wena, bamile, bakhule, bathele izithelo,

bathanda ukukhuluma ngawe,

kanti inhliziyo zabo zikhatshana lawe.

3Kodwa, wena Nkosi, uyangazi, uyangibona,

uyahlola inhliziyo yami ukuba injani kuwe.

Bakhuphe njengezimvu zokuhlatshwa,

ubalungisele usuku lokuhlatshwa.

4Koze kube nini ilizwe likhala,

lotshani bonke beganga bubuna na?

Ngenxa yobubi balabo abakhileyo khona inyamazana lenyoni ziyabhubha,

ngoba abantu bathi: INkosi kayiyikubona esikwenzayo.

5Uba ugijimile ngenyawo labantu, bakudinisa,

uzancintanisana njani lamabhiza na?

Uba ungaqinanga elizweni elilokuthula,

uzakwenza njani emahlathini aseJordani na?

6Ngoba abafowenu kanye lendlu kayihlo labo bakukhohlisile,

bakuzingela;

ungabathembi, loba bekhuluma amazwi amnandi kuwe.

Usizi lweNkosi

7INkosi ithi: Ngiyitshiyile indlu yami, ngibalahlile abantu bami;

nginikele othandekayo wami ezandleni zezitha zakhe.

8Abantu bami kimi sebenjengesilwane ehlathini,

bayangibhongela, ngakho ngiyabazonda.

9Ilizwe lami linjengenyoni elamabalabala na?

Inyoni ezilesihluku ziyayihlasela inxa zonke na?

Wozani, lina zilo,

wozani, lonke ukuba lidle,

10Abelusi abanengi basichithile isivini sami,

basinyathezela phansi isabelo sami,

isabelo sami esihle basenza saba yinkangala engelalutho.

11Basenzile saba yinkangala, sichithekile, siyakhala kimi;

ilizwe lonke lichithekile,

kodwa kakulamuntu ozihlupha ngakho.

12Abaphangi bafikile phezu kwawo wonke amadundulu angelalutho asenkangala,

ngoba umkhonto weNkosi uyadla kusukela komunye umkhawulo welizwe kusiya komunye,

kakho olokuthula.

13Bahlanyele amabele, bavuna ameva,

bazidinise ngokusebenza, kodwa kabazuzanga lutho.

Bazakuba lenhloni ngezivuno zabo,

ngenxa yolaka oluvuthayo lweNkosi.

14INkosi ithi mayelana labo bonke omakhelwana ababi abalihlaselayo ilizwe engilinike abantu bami bakoIsrayeli ukuba libe yilizwe labo: Ngizakubasiphuna elizweni labo, ngiyisiphune indlu yakoJuda, ngiyisuse phakathi kwabo.

15Ngemva kokubasiphuna kwami, ngizabuya ngibe lesihawu kubo, ngibabuyise futhi kube yilowo lalowo endaweni yakhe lelizweni lakibo.

16Kuzakuthi uba bezazifunda kuhle indlela zabantu bami, bafunge ibizo lami bathi: Ngifunga iNkosi; njengalokho bafundisa abantu bami ukufunga uBali, bazakwakha phakathi kwabantu bami.

17Kodwa lesosizwe esingalaleliyo ngizasisiphuna impela, ngisibhubhise, kutsho iNkosi.