uNahume 3 - Ndebele Bible (iBhayibhili Elingcwele) 1978

Ukuchithwa kweNineve

1Maye kumuzi ogcwele igazi, wonke ugcwele amanga lempango!

Ukuphanga kakupheli kiwo.

2Zwanini ukukhala kwesiswepu lomsindo wokugedlezela kwamavili,

lowamabhiza amathayo, lowenqola zokulwa ezigijimayo.

3Abagadi bamabhiza bayasukela;

kubonakala ukuphazima komhedla, lokucwazimula komkhonto;

banengi ababuleweyo;

kukhona inqwaba zezidumbu,

izidumbu ezinengi ezingelakuphela;

abantu bayakhubeka phezu kwazo.

4Konke lokhu kungenxa yokuphinga okunengi kwesiphingi esibukekayo

langenxa yamalumbo aso abulalayo,

esithengisa izizwe ngokuphinga kwaso

labantu ngamalumbo aso.

5Khangela, ngimelene lawe, kutsho iNkosi yamabandla;

ngizakwambula izidwaba zakho,

ngitshengise izizwe ubunqunu bakho, lemibuso ihlazo lakho.

6Ngizaphosela amanyala phezu kwakho,

ngikuthele ihlazo,

ngikwenze ube yinto yokubukelwa.

7Bonke abakubonayo bazakukubalekela, bathi:

INineve lichithekile.

Ngubani ozalililela na?

Ngizakulidingela ngaphi abaduduzi na?

8Wena Nineve, ungcono yini kulomuzi waseThebesi

owawungasemfuleni uNile, uzingelezelwe ngamanzi,

omthangala wawo wawululwandle, lamanzi engumduli wawo na?

9IEtiyopiya leGibithe kwakungamandla alo angelakuphela;

iPuti leLibiya kwakungabasizi balo.

10Kanti lathunjwa laya ekuthunjweni,

lezingane zalo zachotshozwa engonsini zazo zonke indlela;

kwenziwa inkatho ngezikhulu zalo,

labo bonke abakhulu balo babotshwa ngamaketane.

11Laweke uzadakwa, uyendezele;

udinge isiphephelo sokubalekela izitha.

12Inqaba zakho zonke zinjengezihlahla zemikhiwa ezilezithelo ezivuthiweyo,

uba zinyikinywa, izithelo ziwela emlonyeni wodlayo.

13Amabutho akho anjengabesifazana nje.

Amasango elizwe lakho avulekele izitha zakho;

umlilo uyiqedile imigoqo yawo.

14Zikhelela amanzi ulungisele ukuvinjezelwa,

uqinise inqaba zakho;

ngena odakeni, uxove ibumba,

ulungise ibhokisi lokubumba izitina.

15Lalapho umlilo uzakukuqeda, lempi ikubulale.

Zandise njengesikhongwane, uzandise njengezintethe.

16Wandise abathengisi bakho baze badlule inkanyezi zezulu.

Kodwa kabasekho njengesikhongwane eselula impiko zaso, siphaphe, sihambe.

17Izikhulu zakho zinjengezintethe,

lababhali bakho banjengomhlambi wesikhongwane esihlala othangweni

ngosuku oluqandayo;

lapho ilanga seliphumile, siyasuka siphaphe,

singabe sizaziwa ukuba singaphi.

18Abelusi bakho balele, nkosi yaseAsiriya,

lezikhulu zakho ziyawozela.

Abantu bakho bahlakazekile ezintabeni,

kakho obabuthayo.

19Kakukho okukupholisa ukulimala kwakho,

inxeba lakho libi;

bonke abezwa umbiko ngawe batshaya izandla.

Ngoba ngubani obungafinyelelanga kuye ububi bakho na?