1Umoya kaNkulunkulu wehlela phezu kukaAzariya indodana kaOdedi;
2waphuma ukuhlangabezana loAsa, wathi kuye: Lalela, Asa, lani lonke abakoJuda labakoBenjamini; iNkosi uNkulunkulu ilani nxa lani liselayo. Uba liyidinga, izalivumela ukuba liyifumane; kodwa uba liyilahla, layo izalilahla.
3Isikhathi eside abakoIsrayeli babengelaye uNkulunkulu weqiniso, bengelaye umpristi wokubafundisa, bengelawo umlayo.
4Kodwa kwathi osizini lwabo baphendukela eNkosini, uNkulunkulu kaIsrayeli, bamdinga, wabavumela ukuba bamfumane.
5Ngalezozikhathi kwakungelakuthula ekuhambeni kwabantu, ngoba bonke abantu bamazwe behlelwa zinhlupheko ezinengi.
6Kwakukhona ukuchitheka endaweni zonke, isizwe sisilwa lesizwe, lomuzi usilwa lomuzi, ngoba uNkulunkulu wabehlisela inhlobo zonke zosizi.
7Kodwa lina manini isibindi, liqine, ngoba umsebenzi wenu uzakuba lomvuzo.
8Lapho uAsa ewezwa wonke lamazwi kaAzariya indodana kaOdedi, waqunga isibindi, wakhupha zonke izithombe eziyisinengiso elizweni lonke lakoJuda lakoBenjamini lemizini ayeyithumbile entabeni zakoEfrayimi, walungisa ialtare leNkosi elalingaphambi komkoto wethempeli.
9Wabuthanisa bonke abakoJuda labakoBenjamini lalabo ababevela koEfrayimi lakoManase lakoSimeyoni ababehlala phakathi kwabo; ngoba abantu abanengi babalekela kuye bevela koIsrayeli lapho bebona ukuthi iNkosi uNkulunkulu wakhe yayilaye.
10Babuthana eJerusalema ngomnyaka wetshumi lanhlanu wokubusa kukaAsa, ngenyanga yesithathu.
11Bayihlabela iNkosi uNkulunkulu ngalolosuku empangweni ababeyilethile inkabi ezingamakhulu ayisikhombisa lezimvu ezizinkulungwane eziyisikhombisa.
12Benza isivumelwano sokuba bayidinge iNkosi, uNkulunkulu wabokhokho babo, ngenhliziyo yabo yonke langomoya wabo wonke;
13bathi lowo ongayidingi iNkosi uNkulunkulu kaIsrayeli uzabulawa, omutsha lomdala, owesilisa lowesifazana.
14Bafunga isifungo eNkosini ngokumemeza langokukhala kwempondo.
15Bonke abakoJuda bathokoza ngesifungo, ngoba babefungile ngenhliziyo yabo yonke, beyidingile ngeqiniso, yabavumela ukuyifumana; ngakho iNkosi uNkulunkulu yabanika ukuthula inxa zonke.
16Inkosi uAsa yakhupha loninakhulu uMahaka esikhundleni sokuba yindlovukazi, ngoba wayemenzele unkulunkulukazi uAshera isithombe esinengisayo. UAsa wasigamula isithombe, wasigxoba, wasitshisela esifuleni iKidroni.
17Kanti indawo eziphakemeyo zokukhonzela kazivalwanga koIsrayeli; kodwa inhliziyo kaAsa yayiqotho insuku zakhe zonke.
18Wangenisa endlini kaNkulunkulu izinto uyise ayezahlukanisele iNkosi, kanye lezakhe izinto ezahlukaniselwe iNkosi, isiliva legolide lezitsha.
19Kakusabanga khona impi kwaze kwaba ngumnyaka wamatshumi amathathu lanhlanu wokubusa kukaAsa.
Who We AreWhat We EelieveWhat We Do
2025 by iamachristian.org,Inc All rights reserved.
