Umtshumayeli 7 - Ndebele Bible (iBhayibhili Elingcwele) 1978

Ukuhlakanipha kuhle ukwedlula konke

1Ibizo elihle lingcono kulamafutha amahle; losuku lokufa lungcono kulosuku lokuzalwa.Zaga 22:1

2Kungcono ukuya endlini yokulila kulendlini yedili; ngoba lokhu kuzakwehlela abantu bonke, abaphilayo kabakukhumbule lokhu.

3Usizi lungcono kulokuhleka, ngoba ngokudana kobuso umuntu angasizakala.

4Inhliziyo yomuntu ohlakaniphileyo isendlini yokulila, kodwa inhliziyo yesithutha isendlini yokuthokoza.

5Kungcono ukuzwa ukukhuza komuntu ohlakaniphileyo kulokuzwa ukuhlabela kwezithutha.

6Ngoba njengokuchachamba kwameva ngaphansi kwembiza kunjalo ukuhleka kwesithutha. Lokhu lakho kulize.

7Ngoba ukucindezela kwenza ohlakaniphileyo abe yisithutha, lokuthengwa ngesipho kuyona inhliziyo.

8Kungcono ukuphela kolutho kulokuqala kwalo; ukubekezela kungcono kulokuzigqaja.

9Ungaphangisi ukuthukuthela, ngoba ukuthukuthela ngokwezithutha.Jak 1:19

10Ungatsho ukuthi: Kwenziwa yini ukuba insuku zakuqala zibe ngcono kulalezi na? Ngoba kuyibuthutha ukubuza lokhu.

11Ukuhlakanipha kuhle njengelifa, kuyabasiza bonke abaphilayo.

12Ukuvikelwa yikuhlakanipha kuyafanana lokuvikelwa yimali; ukuhlakanipha kuyabasiza abantu abalakho ngokubanika ukuphila.

13Nakana ngomsebenzi kaNkulunkulu; ngubani ongelula lokho uNkulunkulu akugobisileyo na?

14Thokoza ngosuku lokuphumelela, ngosuku olubi ukhumbule ukuthi uNkulunkulu uzenzile zonke ukuze umuntu angakuboni okuzakwenzeka ngensuku ezizayo.

15Konke ngikubonile ekuphileni kwami okulize; ngibonile umuntu olungileyo esifa ekulungeni kwakhe, lomuntu omubi ehlala insuku ezinengi ekwenzeni kwakhe okubi.

16Ungabi ngolungileyo ngokudlulisayo, futhi ungahlakaniphi kakhulu; uzibulalelani na?

17Ungabi ngomubi ngokudlulisayo, futhi ungabi yisithutha; uzakufelani isikhathi sakho singakafiki na?

18Kuhle ukuba ubambelele kokunye, ungakuyekeli lokunye; ngoba umuntu omesabayo uNkulunkulu uzaphepha kukho kokubili.

19Ukuhlakanipha kuyamqinisa ohlakaniphileyo ukwedlula ababusi abalitshumi abaphakathi komuzi.

20Isibili kakulamuntu olungileyo emhlabeni owenza okuhle kokuphela engoni.

21Ungazilaleli zonke izinto ezikhulunywa ngabantu, funa uzwe ukukuthuka kwenceku yakho;

22ngoba uyazi ukuthi ngezikhathi ezinengi wena uqobo ubathukile abanye.

23Konke lokhu ngikuhlolile ngokuhlakanipha, ngathi: Ngizakuhlakanipha; kodwa kwaba khatshana lami.

24Uqobo lwezinto lukhatshana, luzikile lwatshona kakhulu ukwedlula ukuqedisisa komuntu.

25Ngaqala ukucabanga, ngamisela ingqondo yami ukudinga lokufuna ukuhlakanipha lokwazi isimo sezinto; ngafumanisa kuphela ukuthi kuyibuthutha ukuba ngomubi, lokuthi kuyikuhlanya ukwenza njengesithutha.

26Ngafumanisa ukuthi okubuhlungu kulokufa ngowesifazana ongumjibila, onhliziyo yakhe ilimbule, lengalo zakhe zingamaketane; umuntu othokozisa uNkulunkulu uyaphunyuka kuye, kodwa isoni uyasibamba.

27Umtshumayeli uthi: Khangela, yikho lokhu engikufumeneyo ekuhloleni kwami izinto nganye ukuba ngibone isimo sazo

28emva kokuhlola kwami okunengi okungelampumelelo. Ngafumanisa indoda eqotho eyodwa phakathi kwenkulungwane; kodwa kangifumanisanga loyeda owesifazana oqotho phakathi kwabo bonke.

29Yilokhu kuphela engikufumanisayo ukuthi uNkulunkulu wamenza umuntu waqonda; kodwa abantu bazenzela amacebo amanengi.