KwabaseFiliphi 4 - Ndebele Bible (iBhayibhili Elingcwele) 1978

UPawuli ubeluleka ngokuqina langokuzwana ekukholweni

1Ngakhoke, bazalwane, engibathandayo lengibalangathayo, lina ntokozo lomqhele wami, manini liqine ngokunjalo eNkosini, bathandekayo bami.

2Ngiyabalaya uYuwodiya loSintike ukuba babe lomqondo munye eNkosini.

3Ngiyakuncenga lawe, mnakwethu oqotho, siza labo abesifazana, ngoba basebenza kakhulu kanye lami evangelini, kanye loKlementi lezinye izisebenzi amabizo azo asencwadini yokuphila.

4Thokozani eNkosini njalonjalo; ngiyaphinda ngithi: Thokozani.

5Ukubekezela kwenu kakwaziwe yibo bonke abantu; iNkosi iseduze.

6Lingakhathazeki ngalutho, kodwa kukho konke izicelo zenu kazaziwe nguNkulunkulu ngokukhuleka langokunxusa kanye langokubonga.

7Ukuthula kukaNkulunkulu okudlula ukuqedisisa konke kuzakulondoloza inhliziyo zenu lemicabango yenu kuKristu Jesu.

8Elokucinake, bazalwane, konke okuliqiniso, konke okuhloniphekayo, konke okulungileyo, konke okuhlambulukileyo, konke okuhle, konke okulodumo oluhle, uba kukhona okudumisekayo, nakanani ngakho lokhu.

9Elakufundayo, lakwamukela, lakuzwa, lakubona kimi, kwenzeni lokho, ng’khona uNkulunkulu wokuthula ezakuba lani.

UPawuli ubonga isiphiwo abasithumela kuye eRoma

10Ngiyathokoza kakhulu eNkosini, ngokuthi khathesi selize lavuselela ukunginanzelela kwenu; belinginanzelela kambe, kodwa laswela ithuba.

11Kakusikho ukuthi ngitsho mayelana lokuswela kwami, ngoba sengifundile ukuba nganeliswe loba ngihlezi ngokunjani.

12Ngiyakwazi ukuswela, ngiyakwazi lokubusa; kukho konke lasezintweni zonke sengifundile ukusutha, lokulamba, lokubusa, lokuswela.

13Ngingakwenza konke ngaye ongiqinisayo.

14Kodwa lenze kuhle ngokuhlanganyela kwenu ekuhluphekeni kwami.

15Liyazi lani, lina baseFiliphi, ukuthi ekuqaleni kwevangeli ekusukeni kwami eMakedoniya kwakungekho bandla lelilodwa elahlanganyela lami endabeni yokupha lokwamukela, kuphela lina lodwa;2 Kor 11:9

16ngoba laseTesalonika lathumela okokungisiza kanye ingabe kabili.Seb 17:1

17Kangitsho ukuthi ngifuna isiphiwo, kodwa ngifuna isithelo esizakwandisa ukulunga kwenu.

18Kodwa ngilakho konke ngokupheleleyo; nganelisiwe nginikwe nguEpafrodithu iziphiwo elazithumelayo, eziliphunga elihle, umnikelo omuhle lowamukelekayo kuNkulunkulu.Eks 29:18

19UNkulunkulu wami uzakugcwalisa konke ukuswela kwenu ngobunengi benotho yakhe kuKristu Jesu.

20Akube udumo kuNkulunkulu onguBaba kuze kube nininini. Ameni.

Isicino

21Bingelelani bonke abangcwele abakuKristu Jesu. Abazalwane abalami lapha bayalibingelela.

22Bonke abangcwele bayalibingelela, ikakhulu labo abendlu kaKesari.

23Umusa weNkosi uJesu Kristu kawube lomoya wenu.