1 Kho 22 - Ndebele Bible (iBhayibhili Elingcwele) 1978

UMikaya ukhuluma ngokunqotshwa kukaAhabi loJehoshafati

1Kwaba yiminyaka emithathu kungekho ukulwa phakathi kweSiriya loIsrayeli.2 Lan 18:2–34

2Kodwa ngomnyaka wesithathu uJehoshafati inkosi yakoJuda wafika enkosini yakoIsrayeli.

3Inkosi yakoIsrayeli yathi encekwini zayo: Liyazi ukuthi iRamothi‐Gileyadi lingelethu, kodwa siphongukuhlala nje, singalithathi enkosini yaseSiriya na?

4Yasisithi kuJehoshafati: Uzaphuma lami ukuyakulwa eRamothi‐Gileyadi na? UJehoshafati wathi kuyo: Okwami ngokwakho, lami uqobo labantu bami kanye lamabhiza ami.

5UJehoshafati wasesithi enkosini yakoIsrayeli: Akubuze eNkosini uNkulunkulu kuqala.

6Inkosi yakoIsrayeli yasibuthanisa abaprofethi ababengamakhulu amane, yathi kubo: Ngiyehlasela iRamothi‐Gileyadi kumbe ngingayi na? Bona bathi: Hamba, ngoba iNkosi izalinikela esandleni sakho.

7UJehoshafati wasesithi: Kakukho yini lapha omunye umprofethi weNkosi uNkulunkulu esingambuza na?

8Inkosi yakoIsrayeli yathi kuye: Kusekhona omunye umuntu esingabuza ngaye eNkosini uNkulunkulu, nguMikaya indodana kaImla, kodwa kangimthandi ngoba kazake akhulume okuhle ngami, uhlala ekhuluma okubi. UJehoshafati wathi: Nkosi, ungatsho njalo.

9Inkosi yakoIsrayeli yasibiza induna yathi kuyo: Ngilethela masinyane uMikaya indodana kaImla.

10Inkosi yakoIsrayeli loJehoshafati inkosi yakoJuda babehlezi ezihlalweni zabo zobukhosi, begqoke izambatho zabo zobukhosi, besesizeni ngasesangweni leSamariya, bonke abaprofethi babeprofetha phambi kwabo.

11UZedekiya indodana kaKenana wazenzela impondo zensimbi, wathi kuAhabi: INkosi ithi: Ngalezimpondo uzahlaba amaSiriya uze uwaqede.

12Labo bonke abaprofethi batsho njalo, bathi: Hamba uyenqoba iRamothi‐Gileyadi, iNkosi izalinikela esandleni sakho.

13Isithunywa esasiyebiza uMikaya sathi kuye: Amazwi abaprofethi ayathandeka wonke enkosini; lelizwi lakho kalifane lawabo, ukhulume okuthandekayo.

14Kodwa uMikaya wathi: Ngifunga iNkosi uNkulunkulu, lokho iNkosi ekutshoyo kimi ngizakukukhuluma.

15Esefikile enkosini uAhabi, inkosi yathi kuye: Mikaya, siyehlasela iRamothi‐Gileyadi kumbe singayi na? Yena wathi kuyo: Hambani, lizanqoba; iNkosi izanikela iRamothi‐Gileyadi ezandleni zenu.

16Kodwa inkosi uAhabi yathi kuye: Ngizakukufungisa kuze kube kangaki ukuba ungitshele iqiniso lodwa ebizweni leNkosi uNkulunkulu na?

17Yena wathi: Ngabona uIsrayeli wonke echithekile phezu kwezintaba njengezimvu ezingelamalusi; iNkosi yathi: Laba kabalamkhokheli, kabazibuyelele kuhle emakhaya.Nani 27:17; Mat 9:36; Mark 6:34

18Inkosi yakoIsrayeli yasisithi kuJehoshafati: Kangikutshelanga yini ukuthi kayikukhuluma okuhle ngami kodwa okubi kuphela na?

19UMikaya wasesithi: Zwaninike ilizwi leNkosi uNkulunkulu. Ngayibona ihlezi esihlalweni sayo sobukhosi, lexuku lonke lasezulwini limi phansi kwayo ngakwesokunene langakwesokhohlo;

20iNkosi yathi: Ngubani ozakhohlisa uAhabi ukuba ahambe ayefela eRamothi‐Gileyadi na? Omunye watsho okunye, lomunye okunye.

21Kwasekuphuma umoya, wema phambi kweNkosi wathi: Ngizamkhohlisa mina.

22INkosi yathi kuye: Kanjani na? Yena wathi: Ngizahamba ngibe ngumoya wokuqamba amanga emilonyeni yabo bonke abaprofethi bakhe. INkosi yathi: Impela uzamkhohlisa; hambake wenze njalo.

23Ngakhoke iNkosi ifakile umoya wokuqamba amanga emilonyeni yalabaprofethi bakho, ngoba iNkosi ikumisele okubi.

24UZedekiya indodana kaKenana wasesondela, wawakala uMikaya esihlathini, wathi: Umoya weNkosi uNkulunkulu wasuka njani kimi ukuyakhuluma kuwe na?

25UMikaya wathi: Wena uqobo uzakukubona lokhu mhla ubalekela ezindlini ezingaphakathi ukuyacatsha.

26Inkosi yakoIsrayeli yalaya ukuba uMikaya abanjwe, asiwe kuAmoni umbusi womuzi lakuJowashi indodana yenkosi,

27yathi: Valelani lumuntu entolongweni, limnike ukudla lamanzi alutshwana ngize ngibuye kuhle.

28UMikaya wathi: Uba ubuya kuhle, iNkosi izabe ingakhulumanga ngami.

29Inkosi yakoIsrayeli loJehoshafati inkosi yakoJuda baphuma baya eRamothi‐Gileyadi.

30Inkosi yakoIsrayeli yathi kuJehoshafati: Mina ngizazifihla, ngingene ekulweni, kodwa wena gqoka izambatho zakho zobukhosi. Inkosi yakoIsrayeli yasizifihla, yangena ekulweni.

31Inkosi yaseSiriya yayilayile izinduna zenqola zayo zokulwa ezingamatshumi amathathu lambili, yathi: Lingalwi lamuntu, lilwe lenkosi yakoIsrayeli kuphela.

32Kwathi induna zezinqola zokulwa zibona uJehoshafati zathi: Yiyo le sibili inkosi yakoIsrayeli. Zasezimsukela, yena wahlaba umkhosi.

33Lapho izinduna zezinqola zokulwa zibona ukuba kwakungesiyo inkosi yakoIsrayeli, zayekela ukuxotshana laye.

34Umuntu othile watshoka umtshoko wakhe engananzelele, wahlaba inkosi yakoIsrayeli ngaphansi kwesivikelo sesifuba; yasisithi kumtshayeli wenqola yayo yokulwa: Phenduka, ungikhuphe phakathi kokulwa’ ngoba sengilimele.

35Ukulwa kwaba nzima mhlalokho; inkosi yayisekelwe enqoleni yayo yokulwa ikhangele amaSiriya, yafa ntambama; igazi lenxeba layo lagelezela ngaphansi kwenqola yokulwa.

36Ekutshoneni kwelanga kwamenyezwa kuyo yonke impi kwathiwa: Bonke abantu kababuyele emizini yakibo, bonke babuyele emazweni akibo,

37ngoba inkosi isifile. Bayiletha eSamariya, bayingcwabela khona.

38Inqola yokulwa bayigezisa ngasechibini leSamariya, izinja zakhotha igazi layo, lamawule ageza ngalo, njengokutsho kwelizwi leNkosi uNkulunkulu.

39Ezinye indaba zikaAhabi, lakho konke akwenzayo, langendlu yempondo zendlovu ayakhayo, langemizi yonke ayakhayo, kulotshiwe ogwalweni lwezindaba zamakhosi akoIsrayeli.

40UAhabi waya kwabaphansi. UAhaziya indodana yakhe waba yinkosi esikhundleni sakhe.

Ukubusa kukaJehoshafati

41UJehoshafati indodana kaAsa waba yinkosi yakoJuda ngomnyaka wesine wokubusa kukaAhabi inkosi yakoIsrayeli.

42UJehoshafati wayeseleminyaka engamatshumi amathathu lanhlanu lapho eqalisa ukubusa; wabusa eJerusalema iminyaka engamatshumi amabili lanhlanu. Ibizo likanina lalinguAzuba indodakazi kaShilihi.

43Walandela zonke indlela zikaAsa uyise, kaphambukanga kuzo, wenza okulungileyo phambi kweNkosi. Kodwa indawo eziphakemeyo zokukhonzela kazivalwanga; abantu babelokhu benikela imihlatshelo, betshisa impepha endaweni eziphakemeyo.

44UJehoshafati wahlalisana ngokuthula lenkosi yakoIsrayeli.

45Ezinye indaba zikaJehoshafati, lobuqhawe bakhe, lokulwa kwakhe kulotshiwe ogwalweni lwezindaba zamakhosi akoJuda.

46Waqeda elizweni amadoda ayengamawule emathempelini ayesele ensukwini zikayise uAsa.

47Kwakungelankosi eEdoma, kwakukhona umbambeli.

48UJehoshafati wenza imikolo emikhulu yokuthwala impahla ukuyathwala igolide eOfiri; kodwa kayifikanga yephukela eEziyoni‐Geberi.

49UAhaziya indodana kaAhabi wathi kuJehoshafati: Inceku zami kazihambe lezakho emikolweni. Kodwa uJehoshafati kavumanga.

50UJehoshafati waya kwabaphansi, wangcwatshelwa kuboyise emzini kaDavida ukhokho wakhe. UJoramu indodana yakhe waba yinkosi esikhundleni sakhe.

Ukubusa kukaAhaziya koIsrayeli

51UAhaziya indodana kaAhabi waba yinkosi koIsrayeli eSamariya ngomnyaka wetshumi lesikhombisa wokubusa kukaJehoshafati inkosi yakoJuda; wabusa uIsrayeli iminyaka emibili.

52Wenza okubi phambi kweNkosi, walandela indlela zikayise, lendlela zikanina, lendlela zikaJerobowamu indodana kaNebati owenza uIsrayeli one.

53Wakhonza uBali, wakhuleka kuye, wayithukuthelisa iNkosi, uNkulunkulu kaIsrayeli njengokwenza konke kukayise.